Ngarambe Yolanda yavuze ibyiza by’u Rwanda ku bakina imikino ngororamubiri (Video)

Yanditswe na Eric Tony Ukurikiyimfura
Kuya 14 Ukwakira 2019 saa 01:26
Yasuwe :
0 0

Umunyarwandakazi Ngarambe Yolanda ufite ubwenegihugu bwa Suède, yavuze ko Abanyarwanda bakina imikino ngororamubiri bafite amahirwe yo kuvukira mu gihugu giteye neza ku buryo bashobora kukitorezamo bakitwara neza mu marushanwa atandukanye.

Ngarambe Yolanda w’imyaka 28 ari mu Rwanda guhera ku wa Mbere w’icyumweru gishize, aho yitabiriye inama nyafurika y’Urubyiruko izwi nka “Youth Connekt Africa Summit” yahuje urubyiruko rusaga ibihumbi 10 rwaturutse mu bihugu bitandukanye bya Afurika.

Mu kiganiro cyihariye yagiranye na IGIHE, Ngarambe yavuze ko yatumiwe muri iyi nama kugira ngo asangize urubyiruko rwa Afurika uko rushobora kubyaza impano rufite cyangwa ibyo rukunda, bigahinduka akazi karwinjiriza amafaranga.

Ati” Natumiwe na Minisiteri y’Urubyiruko kugira ngo nganirize abazitabira Youth Connekt uko ibyo nkunda nabihinduyemo akazi kanjye n’uburyo ushobora kubikoresha bikavamo ikintu kizima.”

Uyu mukobwa wavukiye muri Suède ku babyeyi b’Abanyarwanda, yabwiye IGIHE ko ari inshuro ya gatanu ageze muri iki gihugu avuga ko ari cyiza ndetse ngo yishimira cyane Umujyi wa Rubavu (Gisenyi).

Ati” Ntabwo ari ubwa mbere, ndumva ari nk’inshuro ya gatanu nje, nkunda kuza buri myaka ine hamwe n’umuryango wanjye, ba marume, nyogokuru n’abandi baba inaha. [Aseka] Ni kure ya Suède ntabwo najya nza buri mwaka.”

“Ubwa mbere naje mfite imyaka umunani mu 1998. Ntabwo ngera henshi, nzi i Gisenyi ku mucanga. Nkunda kuhagenda, ni Umujyi muto kandi mwiza.”

Ngarambe yavuze ko yatangiye akina umupira w’amaguru, aho yashyiraga umupira imbere akawirukankana mbere y’uko avumbura ko ashobora kuvamo umukinnyi usiganwa ku maguru nabyo bikamuhesha ishuri ryiza.

Ati” Nkunda gusiganwa ku maguru kuko bituma ngera mu bihugu byinshi, ubu ndi mu Rwanda, mvuye muri Suède, njya nitoreza muri Leta Zunze ubumwe za Amerika. Natangiye nkina ruhago ndetse nari umuhanga kuko narihutaga cyane.”

“Aho ni ho naboneye ko nshobora gusiganwa ku maguru, ndabyishimira ndetse biba ubuzima bwanjye. Nagiye kwiga muri Amerika mbona Kaminuza imfata kubera gusiganwa ku maguru.”

Agaruka ku bihe yagiriye i Doha muri Qatar, aho aherutse kuba uwa 14 mu gusiganwa metero 1500 muri Shampiyona y’Isi y’imikino ngororamubiri yari akinnye bwa mbere, Ngarambe yavuze ko byamunejeje cyane dore ko yakoresheje iminota ine, amasegonda atatu n’ibice bine, ibihe bimwemerera kuba yakina imikino Olempiki.

Ati” Maze gukora amasiganwa atandukanye y’u Burayi harimo iryo mu nzu ryabereye muri Pologne kandi no mu cyumweru gishize nari muri Shampiyona y’Isi yabereye i Doha. Ni ryo rushanwa rikomeye maze kwitabira.”

“Hari ubushyuhe bwinshi, nagize amahirwe yo gukinana n’abakinnyi bakomeye ku Isi nubwo ntakinnye icyiciro cya nyuma. Nabaye uwa 14, ariko nazamutse ku rutonde ndetse ngira ibihe byiza by’imikino Olempiki. Byaranshimishije.”

Ngarambe yavuze ko abanyarwanda basiganwa ku maguru bagize amahirwe yo kuvukira mu gihugu cyiza kiri ku butumburuke bwo hejuru kuko we bimusaba kujya gushaka ahandi yitoreza mu bindi bihugu, avuye muri Suède.

Ati ”Mu Rwanda hari amahirwe menshi yo kuba umuntu yakwitwara neza. Nk’urugero mufite Stade nziza (Amahoro), muri ku butumburuke buri hejuru. Iyo ushaka gutera imbere ugira intego wiha, ukareba niba uzigeraho kandi ukihangana kuko ntibyakunda mu cyumweru kimwe cyangwa ukwezi, bisaba byibuze imyaka.”

Ngarambe Yolanda ngo afite intego zo kuzahagararira Suède mu mikino Olempiki izabera i Tokyo mu Buyapani mu mwaka utaha.

Ngarambe Yolanda asanga abanyarwanda bakina imikino ngororamubiri bafite amahirwe yo kuvukira mu gihugu cyiza
Ngarambe Yolanda yaje mu Rwanda nyuma yo kwitabira Shampiyona y'Isi y'imikino ngororamubiri, aba uwa 14 mu gusiganwa metero 1500
Ngarambe Yolanda yatanze ikiganiro muri Youth Connekt Africa Summit 2019 yabaye mu cyumweru gishize

Video: Hakizimana Alain


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza