Magare na Yankurije begukanye Huye Half Marathon yitabiriwe na Minisitiri Munyangaju

Yanditswe na Eric Tony Ukurikiyimfura
Kuya 18 Mutarama 2020 saa 03:30
Yasuwe :
0 0

Muhitira Félicien uzwi nka Magare na Yankurije Marthe ni bo begukanye isiganwa ryo gusiganwa ku maguru igice cya Marathon ‘’Huye Half Marathon’’ ryabaye bwa mbere kuri uyu wa Gatandatu tariki ya 18 Mutarama 2020 mu Karere ka Huye.

Iri siganwa ryo ku maguru ryitabiriwe kandi na Minisitiri wa Siporo, Munyangaju Aurore Mimosa, wasiganwe mu cyiciro cy’abishimisha (Run for fun), bo bakoraga intera y’ibilometero bitanu.

Isiganwa nk’iri ry’ibilometero bigera kuri 21, ryateguwe na Cercle Sportif de Butare (CSB ) ku bufatanye n’Ubuyozi bw’Akarere ka Huye, Ishyirahamwe Nyarwanda ry’Imikino Ngororamubiri (RAF), Minisiteri ya Siporo, Komite Olempike n’abandi bafatanyabikorwa barimo Skol, ryaherukaga kubera muri aka gace mu 1969.

Abasiganwa bahagurukiye imbere y’Inzu mberabyombi mu Mujyi wa Huye, bafata umuhanda ugana imbere y’ibiro by’Akarere, berekeze ku Karubanda n’i Ngoma mbere y’uko bagaruka mu Mujyi berekeza kuri Hotel Barthos banyuze kuri CHUB, bahindukira basubira mu Mujyi banyuze mu muhanda wo hasi, basubira mu nzira banyuzemo mu gihe bazasoreje muri Stade ya Huye.

Mu bagabo, uwa mbere yabaye Muhitira Félicien uzwi nka Magare ukinira Mountain Club, wakoresheje isaha imwe, iminota itanu, amasegonda 31 n’ibice 28, akurikirwa na Mutabazi Emmanuel wa Police AC mu gihe Rubayita Sirage wa NAS yabaye uwa gatatu.

Nimubona Yves waherukaga kwegukana Kigali Half Marathon, yabaye uwa kane, akurikirwa na mugenzi we bakinana muri APR, Hakizimana John mu gihe uwa gatandatu yabaye Ntirenganya Félix wa Police.

Mu bagore, isiganwa ryatsinzwe na Yankurije Marthe wa APR, wakoresheje isaha imwe, iminota 15, amasegonda 15 n’amasegonda atandatu, akurikirwa na mugenzi we, Musabyeyezu Adeline, amusize iminota itatu n’amasegonda 34.

Nyiranizeyimana Clémentine na we ukinira APR, yabaye uwa gatatu, Niyirora Premitive wa NAS aba uwa kane, Mukasakindi Claudette wa APR yabaye uwa gatanu naho uwa gatandatu aba Ibishatse Angelique wa Mountain Club.

Umukinnyi wa mbere muri buri cyiciro yahawe ibihumbi 200 Frw, uwa kabiri ibihumbi 150 Frw, uwa gatatu ibihumbi 100 Frw, uwa kane ibihumbi 80 Frw, uwa gatanu ibihumbi 60 Frw mu gihe uwa gatatu yahawe ibihumbi 50 Frw.

Aba bakinnyi bose bemerewe kandi kuzasura inzu ndangamurage zose ziri mu gihugu ku buntu.

Mu yindi mikino yabaye mu rwego rwo kwitegura iyi Huye Half Marathon, IPRC Huye yegukanye igikombe cya Basketball mu bakobwa itsinze ENDP Karubanda amanota 54-21 mu gihe muri Volleyball, yegukanye iki gikombe itsinze Regina Pacis amaseti 3-0 (25-13, 25-8 na 25-17).

Muri Basketball y’abagabo, IPRC Huye yegukanye igikombe itsinze UR Huye amanota 43-29.

Yankurije ukinira APR yabaye uwa mbere mu bakobwa
Muhitira Magare niwe wabaye uwa mbere mu bagabo
Abayobozi batandukanye barimo Minisitiri wa siporo bitabiriye iri siganwa
Minisitiri Munyangaju ahemba abitwaye neza muri iri siganwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .