Komite Olempike Mpuzamahanga yatangije ingando z’abana bakina Karate mu Rwanda (Amafoto)

Yanditswe na Eric Tony Ukurikiyimfura
Kuya 26 Ugushyingo 2019 saa 08:30
Yasuwe :
0 0

Ku nshuro ya mbere mu Rwanda hatangijwe ku mugaragaro ingando zateguwe muri gahunda ya Komite Olempike Mpuzamahanga igamije guteza imbere impano z’abana mu mikino itandukanye yitwa “IOC Young Leaders Programme”, igikorwa cyatangirijwe mu mukino wa Karate na Rugigana Jean Claude binyuze muri The Champions Karate Academy.

Izi ngando zateguwe muri gahunda ya Komite Olempike mpuzamahanga yo gushyigikira abakiri bato mu kuzamura no gushyira mu bikorwa imishinga yabo yo guteza imbere imikino, zatangiye tariki ya 1 Ugushyingo, zikazasozwa ku ya 31 Ukuboza.

Abana bibanzweho muri iyi gahunda yatangirijwe mu Mujyi wa Kigali ku wa Gatandatu ni abafite hagati y’imyaka ine na 16 bose bakina umukino wa Karate.

Rugigana Jean Claude wakoze uyu mushinga, yatangiye kuwushyira mu bikorwa nyuma yo kwitabira inama ya kane y’Urubyiruko ya Komite Olempike Mpuzamahanga yabereye i Lausanne Mu Busuwisi muri Nzeri uyu mwaka.

Ku Isi hose, abagize uyu muryango w’urubyiruko ruzwi nka IOC Youth Leaders ni 53 baturuka mu bihugu 40, barimo Rugigana nk’Umunyarwanda umwe rukumbi.

Rugigana Jean Claude avuga ko intego y’izi ngando ari ugufasha abana kuzamura urwego rwabo ndetse bagakura bafite indangagaciro Olempiki, bashobora guteza imbere umuryango Nyarwanda.

Ati” Imiryango irafunguye kuri wese ushaka kugira uruhare muri uyu mushinga. Intego yacu ni ugukoresha Siporo mu kwigisha abana indangagaciro Olempiki kugira ngo barusheho guteza imbere umuryango Nyarwanda n’aho batuye.”

Visi Perezida muri Komite Olempike y’u Rwanda, Rwemalika Félicité wari umushyitsi mukuru muri uyu muhango ndetse akaba asanzwe ari n’umwe mu bagize Komite Olempike Mpuzamahanga (IOC Member), yashimiye Rugigana wakoze uyu mushinga uzafasha abana gukuza impano zabo mu biruhuko.

Ati” Ni ibintu bishimishije cyane kandi bigaragaza intambwe y’iterambere uburyo itangirira mu bana bato. Biragaragaza ko barimo kubigisha uko bakwigirira icyizere noneho akaba ari bo bazayobora Siporo. Ni ibintu bishimishije ubona uko abana bakinaga, kandi harimo n’abakobwa. Ni byiza ko abana baza bagakorana n’abandi mu biruhuko aho kugira ngo bajye imbere ya za televiziyo.”

Nkuranyabihizi Noël washinze The Champions Karate Academy, yavuze ko bishimiye gufatanya na Komite Olempike Mpuzamahanga muri uyu mushinga, aho bizeye ko bizabafasha kwigisha abana benshi.

Ati” Twishimiye kuba abafatanyabikorwa na Komite Olempike Mpuzamahanga. Kuva mu 2017 ntangiza iri shuri ry’umukino wa Karate, tumaze kwigisha abana 600 tukaba twizeye ko gukorana n’ikigo nk’iki gishinzwe guteza imbere Siporo bizadufasha kwigisha abana baneshi bashoboka”

Uyu mushinga uzakorwa mu byiciro bitatu, aho icyiciro cyawo cya mbere kizaba hagati ya tariki ya 1 Ugushyingo na 31 Ukuboza. Icya kabiri kizaba hagati ya tariki ya 1 Nyakanga na 31 Kanama 2020 mu gihe icyiciro cya nyuma kizatangira tariki ya 1 Ugushyingo, gisozwe ku ya 31 Ukuboza 2020.

Kugeza ubu abana 70 ni bo bitabiriye icyiciro cya mbere ndetse byitezwe ko baziyongera bakagera kuri 200.

Komite Olempike Mpuzamahanga yatangije ingando z’abana bakina Karate mu Rwanda
Aba bana bahuriye muri Kigali Sports View Hotel ubwo hafungurwaga ku mugaragaro izi ngando ku wa Gatandatu
Abana bitabiriye izi ngando bari hagati y'imyaka ine na 16
Rugigana Jean Claude usanzwe ari umukozi wa Komite Olempike y'u Rwanda yakoze uyu mushinga uzamara umwaka
Nkuranyabahizi Noël washinze The Champions Karate Academy
Nzabanterura Eugene, umujyanama muri Komite Olempike y'u Rwanda
Visi Perezida muri Komite Olempike y’u Rwanda, Rwemalika Félicité wari umushyitsi mukuru muri uyu muhango ndetse akaba asanzwe ari n’umwe mu bagize Komite Olempike Mpuzamahanga (IOC Member)
Ababyeyi b'abana na bo bari bitabiriye uyu muhango
Icyiciro cya mbere cy'uyu mushinga kizarangira tariki ya 31 Ukuboza uyu mwaka
Abana batozwa kugira ikinyapfura no gukurana indangagaciro Olempiki
Komite Mpuzamahanga Olempike ishyigikiye iterambere ry'imikino itandukanye mu bakiri bato
Abana bagera kuri 70 kuri ubu nibo bitabiriye icyiciro cya mbere cy'izi ngando

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .