00:00:00 IGIHE NETWORK KN KINYARWANDA EN ENGLISH FR FRANCAIS

Abitabiriye CHOGM banyuzwe n’umukino wa Cricket wabereye i Gahanga

Yanditswe na Ntabareshya Jean de Dieu
Kuya 24 June 2022 saa 02:03
Yasuwe :

Mu gihe inama y’abakuru b’ibihugu na za Guverinoma byo mu Muryango wa Commonwealth iri kubera mu Rwanda irimbanyije, abayitabiriye bateguriwe uburyo butandukanye bwo kwidagadura harimo n’imikino itandukanye.

Kuri uyu wa Kane tariki ya 23 Kamena 2022, abitabiriye inama ya CHOGM banyuzwe n’umukino wabereye ku kibuga mpuzamahanga cya Cricket giherereye i Gahanga mu Karere ka Kicukiro.

Ku gicamunsi nibwo abantu batari bake bakoraniye kuri iki kibuga ngo birebere bimwe mu bihangange mu mukino wa Cricket byo mu bihugu bikoresha Icyongereza.

Umukino watangiye hakozwe amakipe abiri arimo ikipe ihagarariye ibihugu bya Afurika yari irangajwe imbere na Hamilton Masakadza wo muri Zimbabwe na Elton Chigumbura na we wo muri Zimbabwe ndetse n’Abanyarwanda batatu, Dennis Mukama, Didier Ndikubwimana na Diane Bimenyimana.

Ku rundi ruhande hari ikipe y’intoranywa mu bihugu bigize Commonwealth yarimo Kruger Van Wyk wo muri Nouvelle-Zelande, Umuhinde Dodda Ganesh, Umunyabigwi muri ruhago David Seaman, Umuhinde Dodo Ganesh, Eric Dusingizimana wabaye kapiteni w’ikipe y’igihugu ya Cricket, Clinton Rubagumya kapiteni w’ikipe y’u Rwanda ya Cricket, Henriette Ishimwe, Gisele Ishimwe n’abandi.

Umukino warangiye ikipe yari ihagarariye ibihugu bya Afurika itsinze ikipe y’intoranywa ya Commonwealth, amanota 154-130.

Umunyamabanga Uhoraho muri Minisiteri ya Siporo, Shema Maboko Didier, yavuze ko bahisemo gutegura umukino wa Cricket kubera ko ari umwe mu ihuriweho na benshi muri Commonwealth kandi ushobora gufasha abantu mu busabane no kumenyana.

Ati “Impamvu ya Cricket ni uko twarebye imikino ifite aho ihurira n’umuryango wa Commonwealth tunareba n’imikino ishoboira gutuma abantu bashobora guhura bagasabana. Twarebye n’ibyo abenshi mu bitabiriye iyi nama basabye ko umukino wa Cricket ari wo twazakoresha. Ni umukino urimo gutera imbere kandi muzi ko ibihugu byinshi biwukina ari ibiri muri uyu muryango.”

Shema Maboko Didier yavuze ko Minisiteri ya Siporo ifite ingamba zo guteza imbere imikino itandukanye cyane ko ari inshingano zayo by’umwihariko umukino wa Cricket binyuze mu kwagura ibikorwa remezo.

Minisiteri ya Siporo yiteze ko hari amahirwe y’ishoramari ashobora kuzava mu nama ya CHOGM aho abayitabiriye bashobora kubona ko mu Rwanda hari amahirwe y’ishoramari by’umwihariko mu mikino itandukanye.

Umunyabigwi wakanyujijeho muri Arsenal no mu ikipe y’Igihugu y’u Bwongereza mu mupira w’amaguru, David Seaman, yavuze ko gukina Cricket bituruka ku kuba ari byo yabanje gukina bityo ko ari umukino akunda akaba ari nayo mpamvu yitabiriye uw’uyu munsi.

Umuyobozi w’ishyirahamwe ry’Umukino wa Cricket mu Rwanda, Byiringiro Emmanuel yagaragaje ko igikorwa cyishimiwe kuko uko cyanateguwe ari nako cyagenze.

Uretse Cricket yakinwe uyu munsi, ku wa Kabiri nijoro habaye isiganwa ku maguru ryitabiriwe n’abatari bake ndetse hanateganyijwe umukino wa Golf uba kuri uyu wa Gatanu tariki ya 24 Kamena 2022.

Ikipe ya kabiri yari ihagarariye umugabane wa Afurika
Ikipe yari ihagarariye Commonwealth yatsinzwe

Umukino wa Cricket ukinwa ute?

Ubusanzwe umukino wa Cricket ukinwa n’amakipe abiri aba ahanganye binyuze mu gutera udupira no gutsinda amanota ibizwi mu mvugo zimenyerewe n’abakina uyu mukino nka Boring na batting.

Mu mikinire yawo, ikipe imwe iba igizwe n’abakinnyi 11, icyakora mu gukina imwe ishobora gutangira itera udupira ibizwi nka Boring indi igakina igamije kudukuramo no gutsinda amanota ari byo bizwi nka Batting.

Iyo ikipe igiye gutangira itera udupira, iyo bihanganye ikinisha abakinnyi babiri bagamije gukuramo twa dupira no kudukubita bagamije gushaka amanota. Mu buryo bwumvikanyweho ikipe imaze kumenya icyo iri butangirireho ihita yitegura.

Bitandukanye no mu yindi mikino aho usanga buri kipe igamije guhangana no gutsinda muri buri gice cy’umukino, muri Cricket ho igice kimwe gikinwa n’ikipe iri gushaka amanota (Batting) mu gihe indi iba yirinda ko hajyamo amanota menshi.

Uburyo amanota abarwa

Abakinnyi babiri b’ikipe iri gukora batting bayifasha gukora amanota. Iyo umukinnyi umwe akubise umupira ukajya kure bahita bumvikana ku buryo basimburana umwanya bikagira inota rimwe. Ibi bishobora gukorwa inshuro irenze imwe mu gihe umupira waba utaragaruka kandi uko inshuro ikorwa ni na ko amanota aba abarwa.

Iyo umukinnyi akubise agapira kakarenga ikibuga kadakoze hasi habarwa amanota atandatu kandi ashobora kwiyongera kuko ba bakinnyi babiri baba bemerewe guhinduranya imyanya ku buryo bibyara inota mu gihe ka gapira kataragera hasi.

Iyo uteye umupira unyuze hasi ukarenga habarwa amanota ane. Mu mikinire rero ikipe iri gutera twa dupira, iba yuzuye mu kibuga uko ari 11 aba baba bahanganye na ba bandi babiri bacunganye no kubabuza gutsinda amanota no kubakuramo.

Umukinnyi avamo ari uko ateye umupira bakawufatira mu kirere utaragwa hasi, cyangwa kwakundi bari guhinduranya hari uduti aba agomba kurinda iyo muri ya kipe igamije kubarinda ko mutsinda ikojeje umupira kuri utwo duti uwo mukinnyi biba bigaragaye ko yananiwe kuturinda avamo hakinjira undi.

Muri uyu mukino ntabwo harebwa ku isaha n’iminota runaka umukino uza kumara ahubwo biterwa n’imigendekere yawo hari na ho wateye imbere ushobora gukinwa ugasubikwa kuko wari utararangira bakazasubukura nyuma.

Buri kipe iba igomba gutera udupira 120 utwo ni natwo dushobora gutanga amanota cyangwa tugakuramo umukinnyi, icyakora iyo ikipe yananiwe gukuramo udupira no kudukubita ngo ibone amanota (batting) igice cyayo gishobora kurangira iyo abakinnyi bise bo kuri urwo ruhande barangije kuva mu kibuga.

Ahandi ikipe ishobora kutageza ku dupira 120 ni igihe yari iri gukina igamije kwishyura ngenzi yayo yatsinze muri ‘Inning’ ya mbere kuko iyo urengeje amanota iya mbere yari yagize umukino uhita urangira bidasabye ko umubare wa twa dupira ugera.

Ishyirahamwe ry’Umukino wa Cricket mu Rwanda ryemejwe n’impuzamashyirahamwe y’umukino wa Cricket ku Isi mu 2003, rifite akazi gakomeye ko kumenyekanisha uyu mukino ukiri kuzamuka mu bihugu bitandukanye kugira ngo na wo ugire abantu bashobora kuwukunda na cyane ko ushobora kongera ubusabane hagati y’abantu.

Minisitiri wa Siporo Munyangaju ni we wafunguye uyu mukino ku mugaragaro
Minisitiri Munyangaju n'Umuyobozi w'ishyirahamwe rya siporo muri Commonwealth, Dame Louise ni bo batangije uyu mukino
Abasifuzi n'abatoza bafashe ifoto y'urwibutso n'abayobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .