Isano y’amaraso bamwe mu bakinnyi b’u Bufaransa begukanye Igikombe cy’Isi bafitanye na Afurika

Yanditswe na IGIHE
Kuya 16 Nyakanga 2018 saa 09:36
Yasuwe :
0 0

Ikipe y’Igihugu y’u Bufaransa yegukanye Igikombe cy’Isi cyaberaga mu Burusiya, yasize amateka nka kimwe mu bimenyetso by’uburyo iki gihugu cyahaye rugari abimukira, mu gihe hari ibindi bibacunaguza ibindi bigafunga imipaka yabyo ngo hatagira uwinjira.

Mu ikipe y’Igihugu y’u Bufaransa, birenga kuba byareberwa ku bakinnyi bafite uruhu rwirabura, kuko na Antoine Griezmann wahetse u Bufaransa muri iki gikombe, Se umubyara akomoka mu Budage ndetse mama we agakomoka muri Portugal.

Urebye muri iyi kipe yu Bufaransa yari mu Burusiya, wasangamo abakinnyi baturuka mu bihugu byinshi bagiye bajya gutura mu Bufaransa mu bihe bitandukanye, barimo abavukiyeyo n’abagiyeyo bakiri bato.

Si ibya vuba kuko mu myaka yo hambere bwagize abakinnyi bakomeye bakomoka muri Afurika barimo Zinedine Zidane‚ Samir Nasri na Karim Benzema bakomoka muri Algeria, Patrick Vieira ukomoka muri Senegal, Marcel Desailly w’Umunya-Ghana, Patrice Evra ufite ibisekuru muri Senegal/Guinea/Cap Vert‚ Claude Makelele wo muri Repubulika Iharanira Demokarasi ya Congo na Just Fontaine w’umunya-Maroc n’abandi.

Mu bakinnyi 23 iyi kipe yari yajyanye mu Burusiya uyu mwaka, 13 bafite inkomoko ku mugabane wa Afurika mu bihugu binyuranye ndetse iyo bashaka ni byo bari gukinira.

1. Paul Pogba

Yavukiye mu Bufaransa ku babyeyi b’abanya- Guinea ndetse bakuru be babiri Florentin na Mathias nabo bakina umupira bahisemo gukinira igihugu cy’abasekuruza.

Samuel Umtiti na Paul Pogba nka bamwe mu nkingi za mwamba z'ikipe y'u Bufaransa nabo bakomoka muri Afurika

2. Ousmane Dembélé

Dembele yavukiye i Vernon mu Bufaransa, ariko Se akomoka muri Mali naho nyina ni Umufaransa ukomoka muri Mauritania.

3. Kylian Mbappé

Uyu mukinnyi wanatowe nk’uwigaragaje kurusha abandi mu bakiri bato, yavukiye mu Bufaransa ku banyeyi b’Abanyafurika, Se ni Umunya-Cameroun naho nyina akaba Umunya-Algeria.

4. Samuel Umtiti

Uyu myugaririro wari ngenderwaho kuva irushanwa ryatangira, yavukiye i Yaoundé muri Cameroun, umuryango we wimukira mu Bufaransa afite imyaka ibiri aba ariho akurira.

5. Blaise Matuidi

Yavukiye mu mujyi wa Toulouse mu Bufaransa ku babyeyi b’abanya-Afurika, Se ni umunya-Angola naho nyina akaba umunye-Congo.

6. Presnel Kimpembe

Uyu myugariro usanzwe akinira Paris St Germain yavukiye mu Bufaransa, ariko Se akomoka muri Repubulika Iharanira Demokarasi ya Congo mu gihe nyina akomoka muri Haiti.

Abanyafurika benshi bari mu ikipe y'Igihugu y'u Bufaransa batuma irushaho gukundwa kuri uyu mugabane

7. Adil Rami

Uyu myugariro wa Marseille yavukiye mu Bufaransa ku babyeyi b’Abanya-Maroc.

8. Djibril Sidibé

Uyu myugariro w’imyaka 25 asanzwe akinira AS Monaco. Yavukiye mu Bufaransa ku babyeyi bakomoka muri Mali.

9. Benjamin Mendy

Uyu myugariro wa Manchester City yavukiye mu Bufaransa ku babyeyi bakomoka muri Sénégal.

10. N’Golo Kanté

Uyu mukinnyi ufatwa nk’umwe mu beza ku Isi mu bakina hagati mu kibuga bafasha ba myugariro, yavukiye mu Bufaransa ku babyeyi bakomoka muri Mali.

11. Steven Nzonzi

Nzonzi usanzwe ukinira Sevilla, yavukiye mu Bufaransa ku babyeyi bakomoka muri Repubulika Iharanira Demokarasi ya Congo.

12. Nabil Fekir

Uyu rutahizamu utarigeze abona umwanya uhagije mu gikombe cy’Isi, yavukiye mu Bufaransa ku babyeyi bo muri Algeria.

13. Steve Mandanda

Umunyezamu Mandanda we yavukiye i Kinshasa muri Repubulika Iharanira Demokarasi ya Congo mbere y’uko umuryango we wimukira mu Bufaransa ari muto aba ariho naho akurira.

U Bufaransa bufite abakinnyi benshi bakomoka muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza