Yannick Mukunzi asanga Amavubi ashobora kugorwa n’imikino azahuramo na Cap-Vert

Yanditswe na Kabera Haruna
Kuya 2 Nzeri 2020 saa 02:09
Yasuwe :
0 0

Umukinnyi wo hagati mu ikipe y’Igihugu ‘Amavubi’, Mukunzi Yannick, yavuze ko we na bagenzi be bashobora kugorwa n’imikino ibiri bazahuramo na Cap-Vert mu Ugushyingo mu gushaka itike y’Igikombe cya Afurika (CAN 2022) kizabera muri Cameroun.

Iyi mikino yombi yagombaga guhuza u Rwanda na Cap-Vert mu mpera za Werurwe, ariko isubikwa kubera icyorezo cya Coronavirus.

Impuzamashyirahamwe y’Umupira w’Amaguru muri Afurika, CAF, iheruka gushyira ahagaragara ingengabihe y’imikino mpuzamahanga, yemeza ko iyo mikino yombi izaba hagati ya tariki ya 9 n’iya 17 Ugushyingo 2020.

Aganira na Radio Rwanda kuri uyu wa Gatatu, Mukunzi Yannick, yavuze ko kuba ikipe y’Igihugu izajya gukina itariteguye bihagije, bishobora gukoma mu nkokora uko yagombaga kwitwara.

Ati “Nibyo koko Amavubi afite imikino mu Ugushyingo gusa ikibazo azagira ni uko wenda Shampiyona y’u Rwanda yatinze gutangira kuko hari hashize igihe abakinnyi badakina batanakorera n’imyitozo hamwe kubera icyi cyorezo cya COVID-19.”

“Bishobora kuzakoma mu nkokora abakinnyi bazaba bagize amahirwe yo guhamagarwa gusa ndizera ko bizagenda neza. ku giti cyanjye navuga ko niteguye neza ndamutse ngize amahirwe yo guhamagarwa n’umutoza w’ikipe y’Igihugu.”

Mukunzi Yannick akinira Sandvikens IF yo mu Cyiciro cya Gatatu muri Suède, aho iri ku mwanya wa gatandatu.

Mu gushaka itike ya CAN 2022, u Rwanda ni urwa nyuma mu itsinda F n’amanota 0, ni nyuma y’uko rutsinzwe na Mozambique ibitego 2-0 ndetse na Cameroun igitego 1-0 mu mikino ibiri imaze gukinwa, yombi yabaye mu Ugushyingo 2019.

Umupira w’amaguru uri muri Siporo zitarakomorerwa mu Rwanda nyuma yo guhagarikwa muri Werurwe kubera icyorezo cya Coronavirus.

Hari amakuru avuga ko ku wa Kabiri, muri Minisiteri ya Siporo habaye inama igamije kureba uburyo izindi siporo zirimo umupira w’amaguru zakwemerwa gusubukura muri uku kwezi.

FERWAFA yateganyije ko Shampiyona y’Icyiciro cya Mbere mu Rwanda mu mwaka w’imikino wa 2020/21, izatangira ku wa 30 Ukwakira mu gihe imikino ya play-offs z’Icyiciro cya Kabiri, izaba hagati ya tariki ya 12 na 17 Ukwakira.

Mukunzi Yannick yishimira igitego yatsindiye Amavubi akina na Seychelles mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .