00:00:00 IGIHE NETWORK KN KINYARWANDA EN ENGLISH FR FRANCAIS

Umwobo udasanzwe wateje impaka ku mukino wa Denmark na Autriche

Yanditswe na Mugisha Christian
Kuya 9 June 2022 saa 12:21
Yasuwe :

Abakinnyi b’Ikipe y’Igihugu ya Denmark bavumbuye umwobo udasanzwe wari hafi y’umurongo ugabanya ikibuga mo kabiri kuri Stade Ernst Happel i Vienne ubwo bakinaga n’Ikipe y’Igihugu ya Autriche mu mukino wa UEFA Nations League, irushanwa ry’amakipe y’i Burayi.

Mu mashusho yashyizwe ku mbuga nkoranyambaga, umukinnyi ukina aca ku mpande mu Ikipe ya Club Brugge, Andreas Skov Olsen, yagaragaje uburebure bw’uwo mwobo ashyiramo akaguru yereka bagenzi be indeshyo yawo.

Mu butumwa yatanze, yagize ati “Birashoboka ko uyu mwobo ureshya n’igice cya metero z’ubujyakuzimu. Byari hagati mu kibuga, umuntu yashoboraga kuvunika ukuguru, umwuga we washoboraga kurangirira hano.”

Icyakora nta mukinnyi n’umwe wahavunikiye kuko uwo mwobo udasanzwe wagaragaye umukino urangiye.

Ishyirahamwe ry’Umupira w’Amaguru muri Autriche ryihutiye guhamagara ababizobereyemo kugira ngo basuzume icyatumye biba.

Iki kibazo kibaye mu gihe n’ubundi Autriche ifite undi mukino wa UEFA Nations League kuri uyu wa Gatanu kuri Stade Ernst Happel, aho izaba icakirana n’Ikipe y’Igihugu y’u Bufaransa.

Igitekerezo kimwe cyatanzwe n’umufana cyerekana ko umuyoboro w’amazi munsi y’ikibuga ushobora kuba warangiritse bigatuma yose ajya ahantu hamwe bigatuma havamo umwobo munini.

Wari umukino udasanzwe kuko watangiye ndetse urangira mu bihe bitamenyerewe aho umukino watinzeho iminota 90 kugira ngo utangire kubera ibura ry’amashanyarazi. Icyo gihe abafana bari muri stade bagerageje gukoresha telefoni zabo bashaka urumuri.

Uyu wari umukino wa kabiri w’uwahoze ari umutoza w’Ikipe ya Manchester United, Ralf Rangnick, wahawe gutoza Autriche. Warangiye Denmark iwutsinze ku bitego 2-1.

Umukinnyi w'Ikipe y'Igihugu ya Denmark akaba n'umukinnyi wa Club Brugge, Andreas Skov Olsen, yavuze ko uyu mwobo ushobora kuba ureshya n'igice cya metero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .