00:00:00 IGIHE NETWORK KN KINYARWANDA EN ENGLISH FR FRANCAIS

Umuvugizi wa Guverinoma yashimiye FERWAFA yahagurukiye Abayovu batutse Mukansanga Salima

Yanditswe na Ntare Julius
Kuya 25 Mutarama 2023 saa 01:58
Yasuwe :

Umuvugizi wa Guverinoma y’u Rwanda, Yolande Makolo, yashimiye Ishyirahamwe ry’Umupira w’Amaguru mu Rwanda, FERWAFA, ryahagurukiye ikibazo cy’abafana batutse Umusifuzi Mpuzamahanga, Mukansanga Salima.

Hari ku wa Gatanu, tariki ya 20 Mutarama 2023, mu mukino Gasogi United yari yakiriyemo Kiyovu Sports kuri Stade ya Bugesera aho amakipe yombi yawusoje nta yirebye mu izamu ry’indi.

Uyu mukino wayobowe hagati n’Umusifuzi Mpuzamahanga, Mukansanga Salima. Bimwe mu byemezo yagiye afata ntibyavuzweho rumwe n’abafana ba Kiyovu Sports ari na ho mu mukino hagati batangiye kumuhata ibitutsi mu ndirimbo bagira bati "Urashaje, Urashaje.’’

Nyuma y’umukino ubwo Mukansanga yaganaga mu rwambariro yanyuze ku bafana ba Kiyovu Sports batangira kuririmba mu ndirimbo zuzuye ibitutsi bagira bati "Malaya, Malaya, Malaya.’’

Ubwo Mukansanga yari arenze uruzitiro rw’ikibuga cya Stade ya Bugesera, umwe mu bafana yamanutse ajya guhura na we ngo amusagarire ariko abashinzwe umutekano barahagoboka.

Ku mugoroba wo ku wa Kabiri, tariki 24 Mutarama 2023, FERWAFA yasohoye itangazo yanyujije ku rubuga rwa yo rwa Twitter ryamagana imyitwarire y’abafana ba Kiyovu Sports.

Yagize iti "FERWAFA yamaganye imyitwarire idahwitse yaranze abafana ba Kiyovu Sports mu mukino w’Umunsi wa 16 wa Primus National League, wabahuje n’Ikipe ya Gasogi United tariki 20 Mutarama 2023 kuri Stade ya Bugesera aho bamwe bagaragaye batuka umusifuzi w’umukino.’’

Iri shyirahamwe ryavuze ko iyi dosiye iri gusuzumwa ndetse izafatwaho umwanzuro bidatinze.

Ryakomeje riti “Komisiyo Ishinzwe Imyitwarire yamaze gushyikirizwa iyo dosiye kugira ngo ikurikirane icyo kibazo hakurikijwe amategeko ngengamyitwarire ya FERWAFA. Imyanzuro y’iyo komisiyo izatangazwa mu gihe cya vuba.”

FERWAFA yashimangiye ko itazigera yihanganira abafana bitwara nabi n’abasagarira abasifuzi ku bibuga.

Umuvugizi wa Guverinoma y’u Rwanda, Yolande Makolo, yashimiye FERWAFA yagize icyo ikora kuri iyi myitwarire ndetse abwira Mukananga Salima ko bamuri inyuma.

Yagize ati "Nishimiye ko FERWAFA yagize icyo ikora kuri iyi myitwarire idahwitse. Turi kumwe nawe, Mukansanga Salima."

Ibikorwa nk’ibi byaherukaga mu mwaka ushize w’imikino ubwo Etincelles FC yahanwaga kudakinira umukino umwe ku kibuga isanzwe yakiriraho, kubera abafana bayo bari basagariye umusifuzi ku mukino wa AS Kigali, bashaka kumukubita.

Iki gihe abakinnyi Bizimana Omar, Mudeyi Souleyman na Uwihoreye Ismaël bahanishijwe buri wese kudakina imikino ibiri n’ihazabu y’ibihumbi 10 Frw.

Umuvugizi wa Leta y'u Rwanda, Yolande Makolo, yashimiye FERWAFA yahagurukiye abafana ba Kiyovu Sports batutse Umusifuzi Mukansanga Salima
Umusifuzi Mpuzamahanga Mukansanga Salima ni we wari hagati mu mukino w'Umunsi wa 16 Gasogi United yakiriyemo Kiyovu Sports kuri Stade ya Bugesera
Uyu musifuzi hari ibyemezo yafashe ntiyabihurizaho na bamwe mu bafana ba Kiyovu Sports
Batangiye kumuhata ibitutsi
Umwe mu bafana ba Kiyovu Sports yatangiriwe n'abashinzwe umutekano agiye gusagarira Mukansanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .