00:00:00 IGIHE NETWORK KN KINYARWANDA EN ENGLISH FR FRANCAIS

Umunyezamu wa Rayon Sports yaketsweho amarozi ku mukino batsinzwemo na APR FC (Amafoto)

Yanditswe na Ntare Julius
Kuya 10 March 2024 saa 01:06
Yasuwe :

Umunyezamu wa Rayon Sports, Umunya-Sénégal Khadim Ndiaye yaketsweho gukoresha imbaraga z’umwijima ku mukino w’Umunsi wa 24, Gikundiro yakiriyemo ndetse inatsindwa na APR FC ibitego 2-0.

Byatangiye agisohoka mu modoka saa Munani n’iminota itanu ubwo Rayon Sports yari igeze kuri Kigali Pelé Stadium.

Uyu munyezamu yabanje gufungura icupa rimwe ry’ibisukika bitari amazi ariko bigaragara nk’ibirenduka, maze arijugunya imbere y’umuryango w’imodoka yazanye Ikipe, ararikandagira birameneka bitembera munsi y’imodoka.

Arangije kubikandagira yatambutse ari na ko afungura irindi cupa na none arijugunya imbere y’umuryango w’urwambariro ararikandagira, abari mu rwambariro barikanga bigirayo ngo bitabatarukira.

Yakomeje kujugunya irindi cupa mu muryango w’urwambariro, nyuma akomeza ajya mu rwambariro mu gice cy’iburyo gisanzwe gikoreshwa n’ikipe yakiriye umukino.

Ubwo amakipe yasohokaga agiye kwishyushya, kubera ko Rayon Sports yari yatinze kugera ku kibuga ni na yo yasohotse nyuma. Umunyezamu Khadime yasohotse amena bya bisukika mu nzira yanyuzemo mu rwambariro, akomeza hanze agana mu kibuga.

Ubwo yabimenaga, yanyuze ku Mutoza wa APR FC, Umufaransa Thierry Froger Christian ndetse n’abakobwa bari bashinzwe gahunda bose baramureba ubona ko batunguwe.

Yakomeje mu kibuga ubwo amakipe yombi yari ari kwishyushya, ajya mu ruziga rw’ikibuga hagati abimenamo asigamo icupa, asubira kwishyushya.

Muri uku kwishyushya, Ndiaye yabanje kuzenguruka urubuga rw’amahina abona gukomeza gusama imipira nk’ibisanzwe.

Ubwo amakipe yombi yageraga mu kibuga arangije gusuhuzanya ndetse no kwifotoza, Umunyezamu Khadime yahagaze imbere y’abasifuzi ku murongo ugabanyamo ikibuga kabiri maze afata rimwe mu macupa yarimo bya bisukika ayasuka ayizengurutsaho.

Nyuma gato yazaniwe andi macupa abiri na mugenzi we Hategekimana Bonheur wabanje ku ntebe y’abasimbura ndetse bagirana ikiganiro kigufi mbere y’uko ajya mu izamu rye.

Khadime yakomeje agana ku izamu ryo ku ruhande rw’amarembo magari ya Kigali Pelé Stadium, mu gihe amakipe yari amaze gufata imyanya.

Yahagaze iruhande rw’izamu na none afata rimwe mu macupa yari afite arunama asuka yizengurutsa. Ibi yabikoraga ari na ko Umusifuzi wa mbere wo ku ruhande Ishimwe Didier yagenzuraga bwa nyuma niba inshundura ziteguye neza kwakira umukino w’ibihangange bya ruhago Nyarwanda.

Iyi mihango ya Khadime Ndiaye ntacyo yamufashije kuko uyu mukino APR FC yawutsinze ku bitego 2-0 bya Myugariro Niyigena Clement na Niyibizi Ramadhan.

Ibi byatumye Rayon Sports ya kabiri irushwa na APR FC ya mbere amanota 13 mu gihe hasigaye imikino 16 ngo Shapiyona igere ku musozo.

Umunyezamu wa Rayon Sports, Khadime Ndiaye yatangiye imihango yo gusuka ibisukika agisohoka mu modoka y'Ikipe kuri Kigali Pelé Stadium
Yakandagiye ibi bisukika maze bitembera munsi y'imodoka Ikipe yajemo
Akirangiza gukandagira icupa rya mbere, yatangiye gufungura irya kabiri afashe n'irya gatatu mu ntoki
Kadime Ndiaye yarekuye irya mbere aho urwambariro rutangiriye
Iri cupa ubwo yarikandagiraga ibisukika byari birimo byatembye bigana hanze
Iri cupa yarikandagiye cyane ararisyonyora
Irya gatatu ibyari birimo yabimennye mu muryango w'urwambariro ryo ntiyarikandagira
Ibi bisukika warebaga bikiri mu icupa ukabona bisa n'amazi ariko wakwitegereza neza ugasanga birarenduka
Ubwo Khadime Ndiaye yari agiye kwishyushya, yatangiriye mu rwambariro amena ibi bisukika akomereza muri 'tunnel' ndetse aca n'iruhande rw'Umutoza wa APR FC, Thierry Froger Christian
Yaba Umutoza wa APR FC, Umufaransa, Thierry Froger ndetse n'abari bashinzwe gutegura uyu mukino, bitegereje Khadime Ndiaye ubwo yari ari mu mihango y'imbaraga z'umwijima
Icupa ryari ririmo ibi bisukika yaritaye mu nzira iva mu rwambariro
Uyu Munyezamu yakomereje mu ruziga rwo mu kibuga hagati aho yasutse ibindi byari mu icupa aha yakomeje guhangwa amaso n'abakozi ba APR FC bafashaga Ikipe yabo kwishyushya
Icupa yarisize mu ruziga rwo mu kibuga hagati asubira mu kibuga cye gutangira kwishyushya
Icupa ryasigaye mu ruziga rwo mu kibuga hagati nyuma yo gushyirwamo n'Umunyezamu wa Rayon Spots, Khadime Ndiaye
Uyu Munyezamu yatangiye kwishyushya azenguruka urubuga rw'amahina rw'ikibuga cye
Nyuma y'aho amakipe yari amaze kwifotoza, Khadime Ndiaye yahagaze imbere y'abasifuzi ku murongo ugabanya ikibuga mo kabiri, afata icupa rimwe ryarimo bya bisukika abisuka hasi yizengurutsa ku birenge
Umusifuzi Mpuzamahanga wayoboye umukino hagati, Ishimwe Jean Claude yarebye Umunyezamu Khadime Ndiaye akora imihango ye aramwihorera
Nyuma yo gukora imihango ye, yajugunye icupa iruhande rw'ikibuga
Abasifuzi Mpuzamahanga, Twagirumukiza Abdulkarim wari uwa kane (iburyo) yambika Ishimwe Jean Claude 'Cucuri' (ibumoso) wayoboye umukino hagati, itumanaho ribafasha kumvikana mu kibuga
Nyuma y'uko amacupa ya Khadime Ndiaye yari yashize, mugenzi we Hategekimana Bonheur yamuzaniye andi
Bagiranye ikiganiro kigufi mbere y'uko yerekeza mu izmu rye
Ageze ku izamu rye yafunguye icupa rya mbere ndetse asomaho
Yongeye kubigenza kwa kundi amena ibisukika arizengurutsa
Nyuma y'iyi mihango yose Khadime Ndiaye yerekeje mu izamu guhangana n'amashoti y'abasore ba Thierry Froger
Umusifuzi wa mbere wo ku ruhande, Ishimwe Didier yagenzuraga bwa nyuma niba inshundura ziteguye neza kwakira umukino w'ibihangange bya ruhago Nyarwanda.
Ku munota wa 79 w'umukino, Umunyezamu Khadime Ndiaye yicaye imbere y'izamu rye n'agahinda kenshi nyuma yo gutsindwa igitego cya kabiri na Niyibizi Ramadhan wa APR FC

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .