00:00:00 IGIHE NETWORK KN KINYARWANDA EN ENGLISH FR FRANCAIS

Umukino wasojwe imburagihe kubera umusimbura wibagiriwe ibyangombwa mu Gakenke

Yanditswe na Ntare Julius
Kuya 5 Ukuboza 2022 saa 12:45
Yasuwe :

Umukino wa Shampiyona y’Icyiciro cya Mbere mu Bagore wahuzaga AS Kigali yari yakiriye Freedom Women Football Club yo mu Karere ka Gakenke ku wa Gatandatu, tariki 3 Ukuboza 2022 kuri Stade ya Kigali warangiye imburagihe nyuma y’uko umusimbura witeguraga kwinjira mu kibuga yibagiwe ibyangombwa bimwemerera kuwukina.

Saa Mbili n’Igice zo ku wa Gatandatu, ni bwo Freedom Women FC yafashe imodoka iva mu Gakenke mu Ntara y’Amajyaruguru yerekeza i Kigali gukina umukino w’Umunsi wa Gatandatu.

Iyi kipe yageze kuri Stade ya Kigali Saa Yine na 50, ni ukuvuga ko yari ifite isaha imwe yo kwitegura uyu mukino wagombaga gutangira Saa Sita n’igice kuko nyuma yawo hari uwa Shampiyona y’Abagabo aho AS Kigali y’Abahungu yanyagiyemo Kiyovu Sports ibitego 4-2.

Freedom Women FC yaserukanye abakinnyi 16, barimo 11 bagombaga kubanza mu kibuga na batanu b’abasimbura. Muri bo harimo abanyezamu babiri gusa ndetse uw’umusimbura yateje ikibazo cyatumye umukino utarangirira iminota 90.

Umukino watangiye AS Kigali yitwara neza nk’uko byari byitezwe na benshi kuko mu minota 40 gusa yari ifite ibitego 4-0, byatsinzwe na rutahizamu Ukwinkunda Jeannette watsinzemo bibiri, ibindi byinjizwa na Usanase Zawadi na Mukeshimana Dorothée.

Ikibazo cyaje kuvuka ku munota wa 42 w’umukino ubwo umunyezamu wa Freedom Women FC, Uwamahoro Chantal, yagiraga ikibazo cy’ukuboko nyuma yo kugongana n’umukinnyi wa AS Kigali, yitabwaho n’abaganga ariko ntibyakunda ko yakomeza umukino biba ngombwa ko hafatwa icyemezo cyo gusimburwa.

Umunyezamu wari wicaye ku ntebe y’abasimbura Nyinawumuntu Shamim yatangiye kwishyushya ngo asimbure.

Igihe yegeraga umusifuzi wa kane, yamusabye icyangombwa cyerekana ko ari umukinnyi wa Freedom Women FC, uyu yagiye kugishaka mu ibahasha irimo ibindi byangombwa biri kumwe n’ibya bagenzi be asanga umutoza wungirije Muragijimana Vincent wari wazanye n’ikipe kubera ko umukuru Cyuzuzo yari arwaye, yibeshye kitari mu bindi yagisize mu Karere ka Gakenke.

  Internet yaritabajwe bifata ubusa

N’ubwo Nyinawumuntu yaburiye icyangombwa ku kibuga byarashobokaga ko cyaboneka hakoreshejwe ikoranabuhanga kuko cyari gushakirwa kuri email Ishyirahamwe ry’Umupira w’Amaguru mu Rwanda, FERWAFA ryoherereje Perezida wa Freedom WFC, Hakuzimana Sadi Corneille imuha ibyangombwa by’abakinnyi be bose.

Ibi na byo ntibyakunze kuko mu minota itatu Komiseri w’umukino Kagabo yahaye Perezida Hakuzimana ngo abe yabonye iki cyangombwa kuri internet, telefoni ye ngendanwa yari ifite ikibazo cyatumaga igenda gahoro cyane hagakubitiraho no kuba harasibwe ubutumwa bwose bwa WhatsApp ye aho yari afite amafoto y’ibyangombwa by’abakinnyi be bose. Ibi byatumye bemera bahebera urwaje bayoboka inzira y’ibiganiro.

Ku ikubitiro babwiye abasifuzi ko umunyezamu Nyinawumuntu abakinnyi ba AS Kigali basanzwe bamuzi ko babadohorera baramuka babyemeye bagakorera kuri icyo cyizere umusimbura akaba yakwinjira mu kibuga. Ibi babivuganaga amarangamutima menshi basaba ko AS Kigali yabyemera kuko n’ubundi mbere y’umukino yari yabadohoreye yemera guhindura imyenda y’umuhondo, ikinisha ifite ibara ry’ubururu nyuma y’uko abashyitsi bari bazanye umuhondo usa n’uwabakiriye.

Ibi na byo byafashe ubusa, umusifuzi abereka ko we akurikiza amategeko, niba umukinnyi adafite ikarita ya FERWAFA imuha uburenganzira bwo gukina shampiyona atemerewe gukina uyu mukino.

Uburyo bwa kabiri bwari ukwerekana urutonde rwifashishijwe ku mukino wabanjirije uyu aho Freedom Women FC yakinnye na APAER WFC uyu Nyinawumuntu Shamim ari kuri uru rutonde, ibi na byo byafashe ubusa.

Umusifuzi wo hagati yasabye Freedom WFC ko niba umunyezamu wayo w’umusimbura afite umuziro utuma atakina uyu mukino hakifashishwa umukinnyi usanzwe akina hagati mu kibuga.

Abatoza b’iyi kipe yo mu Gakenke batakambiye umusifuzi bamubwira ko uwo bizeye wakozeho ibisa n’ibyo ari Uwimana Grace usanzwe akina nka rutahizamu nyamara basanga afite imvune ku kuboko asanzwe akinana yagiriye mu myitozo amaranye ukwezi n’icyumweru. Ibi nabyo biba bibaye impfabusa.

Ubu buryo bwa gatatu bwanze, ubuyobozi bwa Freedom Women FC bwabwiye abasifuzi ko ibitari byageragejwe mbere bitakunda ahubwo umukino wahagarara bakemera gutsindwa ibitego 4-0.

Abasifuzi bahamagaye ba kapiteni b’amakipe yombi Manishimwe Joseline wa Freedom Women FC na Nibagwire Sifa Gloria wa AS Kigali Women FC, uyu usanzwe ari na Kapiteni w’Ikipe y’Igihugu y’Abagore, bemeza ko umukino uhagararira ku munota wa 42.

Nyuma yo gusoza umukino imburagihe, Freedom WFC yasubiye mu Karere ka Gakenke.

Mu rugendo rwerekezayo, igitsimbura igeze mu Nyakabanda mu Karere ka Nyarugenge ho mu Mujyi wa Kigali, internet ya telefoni ngendanwa ya Perezida Hakuzimana yaje kumukundira, icyangomwa cy’umusimbura Nyinawumuntu arakibona, byari ibyishimo ariko byaziye imburagihe kuri Freedom WFC.

Hakuzimana yacyoherereje Hakizimana Ambroise ushinzwe Gahunda z’Abasifuzi muri FERWAFA na Kapiteni wa AS Kigali Women FC, Nibagwire Sifa Gloria nk’ibimenyetso byo kubereka ko umukinnyi bamwangiye ubusa nyamara asanzwe afite icyangombwa.

Aganira na IGIHE, Perezida wa Freedom Women FC, Hakuzimana Sadi Corneille, yatangaje ko nyuma y’ibyababayeho bagiye gutegereza raporo ya Komiseri Kagabo hanyuma bakazagira icyo bavuga nyuma yayo.

Freedom Women FC yashinzwe mu 2013, isanzwe ikinira imikino yayo ku kibuga cya Nemba mu Murenge wa Nemba mu Karere ka Gakenke. Yari ku rutonde rw’amakipe yagombaga kumanuka mu Cyiciro cya Kabiri umwaka ushize ariko iza kurokoka kubera icyemezo cyo kongera amakipe akina mu cyiciro cya mbere.

Komisiyo y’Amarushanwa ya FERWAFA ni yo yafashe icyemezo ko nta kipe izamanuka mu Cyiciro cya Kabiri kugira ngo umubare w’amakipe wiyongere mu bagore. Yabimenye bamwe mu bakinnyi bayo baramaze gushaka andi makipe, yongera gusa n’iyiyubaka bushya.

Freedom Women FC iri ku mwanya wa 11 n’amanota atatu mu makipe 12, urutonde ruyobowe na AS Kigali Women FC ifite amanota 18 mu mikino itandatu imaze gukinwa.

Iyi kipe umwaka ushize yahawe ingengo y’imari ya miliyoni 6 Frw, mu gihe uyu mwaka zagabanyijwe zigera kuri 4 Frw igomba gukoresha mu kugura ibikoresho by’ikipe, kugura abakinnyi, kwishyura imishahara n’icumbi abakinnyi bahuriramo, kubagaburira, kwishyura ingendo z’ikipe mu mikino no gutegura imikino yayo.

Ikipe ya Freedom Women Football Club isanzwe yambara imyenda y'ibara ry'umuhondo
Ikibuga cya Nemba mu Murenge wa Nemba mu Karere ka Gakenke ni cyo Freedom Women Football Club isanzwe yakiriraho imikino yayo yo mu rugo
Freedom Women FC muri uyu mwaka yahawe ingengo y'imari ya miliyoni 4 Frw
AS Kigali ni yo iri ku mwanya wa mbere muri Shampiyona y'Icyiciro cya Mbere mu Bagore
AS Kigali Women FC ifite amanota 18 mu mikino itandatu imaze gukinwa
Perezida wa Freedom WFC, Hakuzimana Sadi Corneille, yabwiye IGIHE ko bategereje raporo ya Komiseri w'umukino
Cyuzuzo ni we Mutoza wungirije wa Freedom Women FC yo mu Gakenke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .