00:00:00 IGIHE NETWORK KN KINYARWANDA EN ENGLISH FR FRANCAIS

Amavubi yabonye intsinzi ya mbere mu gihe kirenga umwaka (Amafoto)

Yanditswe na Byiringiro Osée Elvis
Kuya 19 Ugushyingo 2022 saa 08:16
Yasuwe :

Ikipe y’Igihugu, Amavubi, yatsinze Sudani igitego 1-0 mu mukino wa kabiri wa gicuti, biba intsinzi ya mbere nyuma y’umwaka.

Ni umukino wa Kabiri wa gicuti wabaye ku Cyumweru tariki 19 Ugushyingo 2022, ukurikira uwa mbere amakipe yari yanganyijemo 0-0.

Uyu umukino watangiye ukinirwa hagati mu kibuga ariko ubona Amavubi ari kurusha Sudani kwiharira umupira.

Nko mu minota ya mbere, Niyigena Clement yateye umupira muremure Serumogo awufunga neza ariko awuhinduye imbere y’izamu myugariro wa Sudani awushyira kuri koruneri.

Ku munota wa 21, Tuyisenge Arsène yatanze umupira mwiza unyuze mu bakinnyi batatu, asanga Gerard Gohou atsinda igitego cya mbere arobye umuzamu ku munota 21.

Amavubi yakomeje gusatira ariko imipira Raphael York na Gerard Gohou bateraga yajyaga hanze cyangwa umuzamu Darasha Ali akayifata. Ku munota wa 33, Sahabo Hakim yongeye guha Gohou umupira mwiza ariko umuzamu Ali asohoka neza arawurenza.

Sudani yarushwaga mu kibuga hagati yabonye uburyo ku munota wa 35 ariko umupira abakinnyi bayo bateye umuzamu Ntwari Fiacre awufata neza.

Ku munota wa 39 Amavubi yabonye Coup Franc, Rafael York awuteye Habimana Glen akorera ikosa umuzamu wa Sudani. Umukino wakomeje gukinirwa mu kibuga hagati iminota ibiri y’inyongera irangira ntayongeye kureba mu izamu ry’indi.

Igice cya mbere cyarangiye Amavubi atsinze Sudani igitego 1-0 cya Gerard Gohou ari nacyo cye cya mbere mu ikipe y’igihugu.

Igice cya kabiri cyatangiranye impinduka ku mpande zombi, Niyonzima Ally yasimbuye Bizimana Djihad, Nshuti Savio asimbura Tuyisenge Arsène mu gihe Ishimwe Pierre yasimbuye Ntwari Fiacre.

Amavubi yatangiye igice cya kabiri asatira, aho ku munota wa 52 York yateye koruneri Gohou ateye mu izamu umukinnyi wa Sudani awukoraho, umusifuzi atanga Penaliti ariko uw’igitambaro avuga ko habayeho kurarira Penaliti bayikuraho.

Ku munota wa 56 Hakizimaba Muhadjiri yasimbuye Habimana Glen, maze ku munota wa 58 atera Coup franc ariko umupira ujya hanze gato y’izamu.

Ku munota wa 62 York yakinaga acumbagira maze asimburwa na Muhozi Fred, Mugenzi Bienvenue nawe asimbura Gerard Gohou. Amavubi yakomeje gusatira ari nako Mugenzi na Muhadjiri bahushaga uburyo bwinshi bw’ibitego.

Sudani nayo yatangiye kwihagararaho maze izamukana umupira neza yihuta bateye umupira umuzamu Ishimwe awukuramo, Elsawi Elsamani yongejemo umupira ujya hejuru y’izamu.

Byageze ku munota wa 75 Sudani iri hejuru, yiharira umupira mu gihe Amavubi yacungiraga ku mipira itakaje akazamuka yihuta.

Ku munota wa 80 Sudani yakoze impinduka Eltayeb Yasir asimburwa na Toto Siddig, Mohammed Mazin asimbura Ibrahim Taguleldin. Ni mu gihe Sahabo Hakim yasimbuwe na Ishimwe Gilbert ku ruhande rw’ u Rwanda.

Sudan yakomeje guhusha uburyo yabonabaga cyane cyane ku mipira Niyonzima Ally yabaga atakaje.

Umukino warangiye u Rwanda rutsinze Sudan igitego 1-0, rwongera kubona intsinzi nyuma y’umwaka kuko rwaherukaga gutsinda Mozambique nabwo igitego 1-0 tariki 24 Werurwe 2021.

Umukino ubwo wari urangiye, habaye imirwano yaturutse kugushondana kwa Hakizimana Muhadjiri na myugariro wa Sudani wamukoreraga amakosa, yatumye Hakizimana arakara batangira kurwana Polisi yitambika.

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .