00:00:00 IGIHE NETWORK KN KINYARWANDA EN ENGLISH FR FRANCAIS

Rudasingwa wa Rayon Sports yasezerewe mu Bitaro bya CHUK: Ibisubizo byatanzwe n’abaganga

Yanditswe na Ntare Julius
Kuya 24 February 2024 saa 08:37
Yasuwe :

Rutahizamu wa Rayon Sports, Rudasingwa Prince, yasezerewe mu Bitaro bya Kaminuza ya Kigali, CHUK, nyuma yo gusuzumwa n’abaganga bagasanga nta kibazo kinini yagize ubwo yakoraga impanuka mu kibuga.

Rudasingwa yagiriye impanuka mu kibuga ubwo yagonganaga na mugenzi we Myugariro wa Musanze FC, Muhire Anicet, mu mukino w’umunsi wa 22 wa Shampiyona wabereye kuri Kigali Pelé Stadium.

Musanze FC yatsinze Gikundiro igitego 1-0 cya Tuyisenge Pacifique ku munota wa 73 w’umukino.

Iyi mpanuka yabaye ku munota wa 89 w’umukino ubwo ku mupira muremure waganaga mu izamu rya Musanze FC wari utanzwe na myugariro w’iburyo wa Rayon Sports, Serumogo Ally, Muhire Anicet yazamutse agahurira na Rudasingwa mu kirere akamutera umutwe.

Rudasingwa yamanutse yataye ubwenge yikubita hasi abanje ijosi maze atabarizwa na bagenzi be babonaga ko hakenewe ubutabazi bwihuse.

Umuganga wa Rayon Sports, Mugemana Charles, yabwiye IGIHE ko ubutabazi bwa mbere babanje kumukorera ari ugutangira ururimi ngo atatumira bityo ubwonko bukaba bwabura umwuka bikaba byamuviramo kubura ubuzima.

Yagize ati" Icya mbere twakoze ni ugufata ururimi rwashoboraga kumanuka mu muhogo rukaba rwafunga umwanya unyuramo umwuka. Iyo bigenze bityo umwuka winjira ubura aho uca bityo ubwonko bukaba bwabura umwuka bikaviramo umuntu gupfa."

"Tumaze kubona ko ururimi turufite twafashe akuma tugashyira mu kanwa ku buryo iminwa idahura akabura umwuka kuko yari yataye ubwenge. Hanyuma nibwo twamuzanaga hano kwa muganga [ku Bitaro bya Kaminuza ya Kigali, CHUK]."

"Tukihagera akiryama ku gitanda nibwo yagaruye ubwenge maze arambaza ati ’ Aha ni he, twageze dute?’ Bisa n’aho atari azi ibyabaye."

Rudasingwa ubwo yasezererwaga mu bitaro bya CHUK

Mugemana yavuze ko impanuka nk’izi zisanzwe mu kibuga, atanga ingero z’abandi bakinnyi byabayeho. Ati " [Manishimwe] Djabel agikina muri Rayon Sports ibisa n’ibi byamubayeho."

Rudasingwa Prince yakomeretse ku musaya w’iburyo, iruhande rw’ijisho n’iruhande rw’umunwa iburyo ari na rwo yagwiriye.

Ubwo twageraga ku bitaro bya Kaminuza ya Kigali, CHUK, Saa Tatu n’igice z’ijoro twasanze yagaruye ubwenge, ashobora kweguka, kubazwa agasubiza adategwa avugira kuri telefoni.

Nyuma y’isaha yahawe umutobe ashobora kwinywesha ntawe umufashije.

Ibisubizo byatanzwe n’abaganga byerekanye ko Rudasingwa Prince nta kibazo gikomeye yagize.

Saa tanu n’iminota 10 z’ijoro nibwo Rudasingwa Prince yinjijwe mu cyumba kindi aho yanyujijwe mu cyuma ngo abaganga barebe niba nta kibazo yagize haba mu mutwe aho yagonganye na Muhire wa Musanze FC n’ijosi yagwiriye.

Yahamaze iminota 20 maze Saa Tanu n’iminota 36 asohoka muri icyo cyumba acungwa ku kagare k’abarwayi.

Nyuma y’iminota 20 nibwo Umuganga w’Ibitaro bya CHUK yazanye Ibisubizo by’ibizamini.

Umuganga yabwiye abarwaza ba Rudasingwa ko yagize ikibazo cyo kunyeganyega k’ubwonko [concussion] igihe yagonganaga na mugenzi nyuma bugasubira mu mwanya wa bwo ari na yo mpamvu yagiye yataye ubwenge.

Umuganga yababwiye ko mu by’ukuri atari ikibazo gikomeye kuko nyuma y’uko ubwonko busubiye mu mwanya wabwo nta kindi kibazo kiri bubeho keretse isereri n’isesemi ashobora kugira by’igihe gito.

Nyuma yakorewe n’ibindi bizamini birimo gutera k’umutima, uko ibihaha bikora ndetse n’urwungano rw’inkari byose basanga bimeze neza.

Nyuma yo kubwirwa ko nta kibazo yagize, yabwiye abari bamugaragiye bose ati" Noneho twataha kandi ndijyana ntawe unkozeho."

Saa Sita n’iminota 25 z’ijoro nibwo Rudasingwa Prince, Umunyamabanga wa Rayon Sports, Patrick Namenye; Team Manager, Mujyanama Fidèle; Umuganga w’Ikipe, Mugemana Charles n’abari barwaje uyu Rutahizamu basohotse mu Bitaro bya Kaminuza ya Kigali, CHUK barataha nyuma yo gusezererwa n’abaganga.

Uyu rutahizamu akaba yahawe ikiruhuko cy’iminsi itanu nyuma akazasubira muri CHUK bakongera kumurebera niba yarakize neza ari na bwo azahabwa igisubizo cya nyuma cy’igihe yasubira mu kibuga.

Ubwo Rudasingwa yajyanwaga kwa muganga, mugenzi we bagonganye Muhire Anicet yajyanywe hanze y’ikibuga bikomeza kwanga maze akurwa kuri Stade ajyanwa ku Bitaro bya Nyarugenge nyuma y’isaha n’igice arasezererwa akomezanya i Musanze na bagenzi be mu modoka y’Ikipe.

Abaganga bahise bihutira mu kibuga batabarana ingoga
Mitima yari yagize ubwoba bwinshi nyuma yo kubona ibibaye
Imbangukiragutabara yinjiye mu kibuga ako kanya
Impanuka Rudasingwa yagize, yakangaranyije abantu benshi ku kibuga
Byabaye ngombwa ko hitabazwa iyi modoka kugira ngo igeze Anicet kwa muganga kuko yari akomeje kumererwa nabi
Umukinnyi wa Musanze FC ubwo yinjizwaga mu modoka ajyanywe ku bitaro bya Nyarugenge
Bagenzi be nibo bafashije abaganga kumwinjiza mu modoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .