00:00:00 IGIHE NETWORK KN KINYARWANDA EN ENGLISH FR FRANCAIS

Nsabimana Aimable yongereye amasezerano muri Kiyovu Sports

Yanditswe na Iradukunda Olivier
Kuya 19 Mutarama 2023 saa 06:25
Yasuwe :

Nsabimana Aimable ukina yugarira muri Kiyovu Sports yongereye amasezerano y’imyaka ibiri akinira iyi Kipe yambara Icyatsi n’Umweru.

Uyu myugariro wo hagati wabigize umwuga, yifuzwaga n’amakipe menshi harimo n’ayo hanze y’u Rwanda, ariko yahisemo kuguma muri Kiyovu Sports.

Nsabimana yabengutswe n’amakipe arimo Al Nasser yo muri Libya, yifuje kuba yayerekezamo ubwo yari amaze gutandukana na APR FC, ariko birangira agarutse mu Rwanda.

Bubinyujije ku mbuga nkoranyambaga z’ikipe, ubuyobozi bwa Kiyovu Sports bwemeje ko Nsabimana akomeje kuba umukinnyi w’iyi kipe mu myaka ibiri iri imbere.

Bwagize buti “Nsabimana Aimable yongereye amasezerano y’igihe cy’imyaka ibiri.”

Nsabimana Aimable yageze mu Ikipe y’Urucaca mu Ukwakira 2022. Ni nyuma y’aho yari yerekeje muri Jeddah SC yo muri Arabie Saoudite ariko ntibyakunda kubera ko iyi kipe itamuboneye ibyangombwa ku gihe bityo imusaba ko yakora imyitozo kugeza muri Mutarama 2023, we ahitamo kuvayo.

Nyuma yo kudahirwa n’urugendo rugana muri Jeddah SC, uyu myugariro yahisemo gukinira Kiyovu Sports kugeza imikino ibanza y’uyu mwaka w’imikino wa 2022 irangiye. Nsabimana yageze muri iyi kipe Shampiyona yaratangiye imaze gukinwa iminsi itatu.

Nsabimana akigera muri Kiyovu Sports yayisinyiye amasezerano y’amezi atatu, yarangiranye n’umukino w’umunsi wa 15 wa Shampiyona y’u Rwanda. Muri icyo gihe yanafatanyije na bagenzi be kwegukana igikombe cya "Made In Rwanda Cup" batsinze Rayon Sports ibitego 2-1.

Amakipe Nsabimana yanyuzemo ni Marines FC, APR FC na Police FC, ariko rimwe na rimwe yifashishwa no mu Ikipe y’Igihugu Amavubi.

Myugariro Nsabimana Aimable yemeye gukomeza gukinira Kiyovu Sports mu myaka ibiri iri imbere
Akigera muri Kiyovu Sports yabanje gusinya amasezerano y'amezi atatu
Nsabimana Aimable aha yari ahanganiye umupira na Twizerimana Onesme wari rutahizamu wa Police FC mbere y'uko yirukanwa kubera imyitwarire mibi
Nsabimana Aimable ni umwe muri ba myugariro bahagaze neza muri Shampiyona y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .