Musanze FC yatsinze Mukura VS abafana bakora igitaramo

Yanditswe na N.Kubwimana Janvière
Kuya 20 Mutarama 2020 saa 08:58
Yasuwe :
0 0

Mu mukino w’umunsi wa 18 wa Shampiyona wabereye kuri Stade Ubworoherane kuri iki Cyumweru, Musanze FC yatsinze Mukura Victory Sports igitego 1-0, abafana bayo bakora igitaramo bishimira intsinzi.

Uyu mukino watangiye ku isaha ya saa cyenda, wari uryoheye ijisho ku bawubonye, aho ku mpande zombi amakipe yashakaga intsinzi biza kurangira Musanze FC ariyo iyegukanye ku gitego kimwe cyatsinzwe na Mugenzi Cédric, cyatumye iyi kipe igira amanota 19 ivuye kuri 16.

Mu mukino waherukaga guhuza aya makipe yombi, Mukura VS yari yatsinze Musanze FC yari yayisuye ibitego 4-0.

Musanze FC itozwa na Ahmed Adel, yakinnye ifite ishyaka ryo gutsinda igitego, yirinda ko Mukura VS yakongera kuyitsinda ndetse ku bw’amahirwe birangira ku munota wa 84 w’umukino, ibonye iki gitego cyatsinzwe na Mugenzi Cédric.

Mu byishimo byinshi, uyu Mugenzi Cédric uzwi nka Ramires, avuga ko yishimiye cyane intsinzi ahesheje ikipe ye, avuga ko ibanga ari ugushyira umutima kuri uyu mukino.

Ati "Nishimiye cyane iyi ntsinzi mpesheje ikipe yanjye, kandi ibanga ntarindi ni uko uyu mukino nari nawushyizeho umutima, birangira aya mahirwe nyagize."

Umutoza wa Musanze FC, Ahmed Adel, na we yavuze ko yishimiye iyi ntsinzi, asezeranya abakunzi b’iyi kipe ko bazakomeza kubashimisha.

Byari ibyishimo bikomeye ku bafana ba Musanze FC, aho bakoze igitaramo barabyina, bishimira iyi ntsinzi mu gihe abafana ba Mukura VS bari bababaye, gusa bakavuga ko bafite icyizere ko imikino ikurikira bazayitsinda.

Umutoza wa Mukura VS, Tony Hernandez, avuga ko gutakaza amahirwe y’uyu mukino byabababaje, gusa na none ngo ikibuga cyabatonze, ariko akaba afite icyizere ko imikino ikurikira bazitwara neza.

Ati "Nibyo ntabwo umukino watugendekeye nk’uko twabyifuzaga, ariko n’ikibuga cyadutonze cyane, gusa n’ubwo bitagenze neza imikino ikurikiraho twiguye kwitwara neza."

Musanze FC yari imaze iminsi irimo ibibazo bitandukanye muri komite, byanatumye abafana batangira gucika intege ariko kuri iyi nshuro bari bitabiriye ku kibuga ari benshi aho banatahanye ibyishimo, basaba ikipe yabo gukomereza aho bagejeje, nabo bayizeza kuzayishyigikira.

Musanze FC yihimuye kuri Mukura Victory Sports yari yayinyagiye mu mikino ibanza ya Shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .