Mukura VS yegukanye igikombe cy’Amahoro nyuma y’imyaka 26 igishakisha

Yanditswe na Evariste Nsengimana
Kuya 13 Kanama 2018 saa 12:01
Yasuwe :
1 0

Mukura VS yegukanye igikombe cy’Amahoro cya 2018 kuri uyu wa 12 Kanama, nyuma yo gutsinda bigoranye ikipe ya Rayon Sports kuri penaliti 3-1, yongera kumwenyura nyuma y’imyaka 26 idatwara igikombe cy’igihugu.

Iyi kipe yo mu Majyepfo y’u Rwanda mu Karere ka Huye, iminota 90 y’umukino yarangiye inganya na Rayon Sports 0-0, zongezwa 30 nayo irangira gutyo, zikizwa na penaliti.

Mukura VS yaherukaga gutwara igikombe cy’Amahoro mu 1992 gikurikira icyo yari yatwaye mu 1990.

Rayon Sports yahabwaga amahirwe menshi ntiyitwaye neza kuri penaliti kuko abakinnyi nka Rwatubyaye Abdul yayiteye hejuru y’izamu, Mugume Yassin ayita mu ntoki z’umunyezamu Ingabire Regis wa Mukura VS. Mukunzi Yannick, niwe wenyine winjije penaliti ya Rayon Sports.

Mukura VS yageze ku mukino wa nyuma yo gusezerera APR FC, mu gihe Rayon Sports yo yasezereye Sunrise FC muri ½ cy’irangiza.

Abafana benshi ba Mukura VS, yahise ibona n’itike yo gusohokera igihugu muri Total CAF Confederation Cup, bagarage ibyishimo dore ko imyaka yari imaze kuba myinshi akabati k’ibikombe k’ikipe yabo kararitswemo n’ibitagangurirwa.

Abinyujije kuri Twitter, Umunyamabanga wa Leta muri Minisiteri y’Ububanyi n’Amahanga, Ubutwererane, n’Umuryango w’Ibihugu bya Afurika y‘Iburasirazuba, Nduhungirehe Olivier, yashimiye Mukura VS ku ntsinzi yabonye.

Yagize ati “Funga twaje, Mukura twaje! Urakoze cyane Mukura VS kuba wegukanye igikombe cy’Amahoro utsinze Rayon Sports kuri penaliti.”

Akomeza avuga ko Mukura VS yatwaye igikombe cy’igihugu ku ya 5 Nyakanga 1990 itsinze Stir F.C nabwo kuri penaliti 4-2, uyu mukino akaba yari awuriho.

Mukura VS yegukanye igikombe cy’Igihugu mu 1978, 1986, 1990 na 1992, yatsinzwe ku mukino wa nyuma wacyo inshuro eshatu mu myaka 10 gusa. Mu 1999 yatsinzwe na APR FC, muri 2005 itsindwa na Rayon Sports naho mu 2009 itsindwa na Atraco FC.

Umukino w’umwanya wa Gatatu wahuje APR FC na Sunrise FC, warangiye APR FC iwegukanye ku gitego 1-0.

Nyuma yo gutwara iki gikombe, Mukura VS yahawe igihembo cya miliyoni 10 Frw, ikazahagararira u Rwanda mu mikino ya CAF Confederation Cup ya 2019, Rayon Sports ihabwa miliyoni eshatu naho APR FC ihabwa miliyoni ebyiri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza