00:00:00 IGIHE NETWORK KN KINYARWANDA EN ENGLISH FR FRANCAIS

Mukura VS yahagaritse abakinnyi batanu banga kuva mu mwiherero

Yanditswe na Habimana Sadi
Kuya 16 Gicurasi 2021 saa 08:37
Yasuwe :
0 0

Ubuyobozi bw’ikipe ya Mukura Victory Sports bwatangaje ko bwahagaritse abakinnyi batanu barimo Duhayindavyi Gaël kubera imyitwarire mibi.

Ibi bwabitangaje nyuma yo kuba iyi kipe ikomeje kwitwara nabi kuko kuva shampiyona itangiye, yanganyije imikino ibiri gusa, indi itatu ikayitsindwa.

Ibicishije kuri Twitter, Mukura Victory Sports yatangaje ko yahagaritse abakinnyi barimo: Duhayindavyi Gaël, Iragire Said, Mutijima Janvier, Olih Jacques na Lucky Emmanuel.

Yavuze ko aba bakinnyi bose uko ari batanu, imyitwarire yabo ikemangwa n’Ubuyobozi bukuru akaba ari yo mpamvu bahise basabwa kuva mu mwiherero w’ikipe mu gihe ikibazo cyabo kikigwaho.

Gusa mu gihe ubuyobozi bwa Mukura buvuga ko bwahagaritse aba bakinnyi, bo baravuga ko batiteguye gusoboka mu mwiherero w’ikipe kuko nta mabaruwa barahabwa agaragaza icyo bahagarikiwe.

Umwe muri aba bakinnyi yabwiye IGIHE ko basabye Umuyobozi Mukuru w’iyi kipe, Gasana Jérôme, kubaha amabaruwa ntabikore, bityo nabo bahitamo kudasohoka mu mwiherero.

Yagize ati “Turamubwira tuti ntabwo turi busohoke mutatubwiye ikosa twakoze, kandi muduhe n’ibaruwa igaragaza neza icyo duhagarikiwe. Nk’ubu twasohoka tukagira ikibazo kandi bizwi ko turi mu mwiherero byagenda gute?”

Kuri iki Cyumweru, nibwo Mukura Victory Sports yakira Marines FC mu mukino usoza iyo mu itsinda D ubera kuri Stade ya Huye.

Iyi kipe yahagarariye u Rwanda muri CAF Confederation Cup ya 2018/19 ndetse ikaba yari imaze iminsi iza mu makipe ane ya mbere, kuri ubu izaba iri mu makipe umunani azarwana no kutamanuka mu cyiciro gitaha cya Shampiyona y’uyu mwaka wa 2021.

Mukura Victory Sports yahagaritse abakinnyi batanu banga kubera imyitwarire mibi
Duhayindavyi Gaël ni umwe mu bahagaritswe
Iragira Said ukina mu mutima wa ba myugariro ari muri batanu basabwe kuva mu mwiherero wa Mukura Victory Sports
Myugariro w'ibumoso, Mutijima Janvier na we yahagaritswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .