00:00:00 IGIHE NETWORK KN KINYARWANDA EN ENGLISH FR FRANCAIS

Mukansanga Salima yatoranyijwe mu bazasifura Igikombe cy’Isi cy’Abagore

Yanditswe na Iradukunda Olivier
Kuya 10 Mutarama 2023 saa 09:51
Yasuwe :

Ishyirahamwe ry’Umupira w’Amaguru ku Isi (FIFA) ryamaze gutangaza urutonde rw’abasifuzi bazasifura Igikombe cy’Isi cy’Abagore kizaba mu 2023, barimo Umunyarwandakazi Salima Mukansanga.

Nyuma yo gukora amateka yo kuba umugore w’Umunyafurika wa mbere usifuye umukino w’Igikombe cy’Isi cy’Abagabo muri Qatar ari umusifuzi wa kane, Salima Mukansanga ari mu bagore bagiye gusifura Igikombe cy’Isi cya bagenzi babo.

Urutonde rwasohotse ruriho abasifuzi 107, barimo abasifuzi bo hagati ndetse n’aba kane 33, abasifuzi bo ku ruhande 55 ndetse n’abandi 19 bazajya bifashishwa mu gukoresha ikoranabuganga ryifashisha amashusho mu misifurire [VAR].

Uyu Munyarwandakazi ukomoka mu Karere ka Rusizi ubwo yasifuraga Igikombe cy’Isi, yabifashe “nk’igitangaza giturutse ku Mana’’ kuko atari yarigeze abitekerezaho hambere.

Gutungurwa kwe kwari gufite ishingiro kuko ni ubwa mbere abasifuzi batatu b’abagore batoranyijwe ngo basifure Igikombe cy’Isi cy’Abagabo.

Mukansanga w’imyaka 34, ubwo yatoranywaga mu bazasifura Igikombe cy’Isi, yavuze ko bizafungurira imiryango abandi basifuzikazi b’Abanyafurika.

Ni ku nshuro ya ka kabiri agiye gusubira mu Gikombe cy’Isi cy’Abagore dore ko yari mu cyabereye mu Bufaransa mu 2019.

Andi marushanwa akomeye yasifuye arimo Igikombe cya Afurika cy’abagabo cyabereye muri Cameroun n’Imikino Olempiki yabereye i Tokyo mu Buyapani.

Igikombe cy’Isi cy’abagore kizatangira tariki ya 20Nyakanga, gisozwe ku ya 20 Kanama muri Australia na Nouvelle-Zélande.

Mukansanga Salima uheruka gusifura Igikombe cy'Isi cy'Abagabo, yatoranyijwe no mu bazasifura icy'abagore kizaba muri uyu mwaka wa 2023
Mukansanga yasifuye CAN y'abagabo iheruka kubera muri Cameroun

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .