Mu gihe Shampiyona ya Tanzania ikomeje, Ally Niyonzima n’umukunzi we bagiye i Dubai (Amafoto)

Yanditswe na Bukuru JC
Kuya 16 Nzeri 2020 saa 08:32
Yasuwe :
0 0

Umukinnyi wa Azam FC, Niyonzima Ally n’umukunzi we Muni Bosslady, berekeje i Dubai mu gihe Shampiyona ya Tanzania izakomeza muri iki cyumweru.

Niyonzima usanzwe ukinira Ikipe y’Igihugu ‘Amavubi’ yasinyiye Azam FC yo muri Tanzania mu ntangiriro z’ukwezi gushize, aho bivugwa ko yatanzweho ibihumbi 30$ (hafi miliyoni 29 Frw) n’umushahara wa 2500$ (hafi miliyoni 2.5 Frw) ku kwezi.

Ku wa 16 Kanama 2020 nibwo umukunzi we, Muni Bosslady, yamusanze muri Tanzania, batemberana ku Nyanja y’Abahinde muri Zanzibar.

Kuri uyu wa Gatatu, Muni Bosslady yasangije abamukurikira kuri Instagram amashusho ye na Niyonzima agaragaza berekeje i Dubai.

Ally Niyonzima ntabwo yakiniye Azam FC mu mikino ibiri ibanza ya Shampiyona ya 2020/21 bitewe n’uko atarabona icyangombwa kimwemerera gukorera muri Tanzania (Work permit) gitangwa buri mwaka.

Azam FC yatsinze Coastal Union ibitego 2-0 ku wa Gatanu, izasubira mu kibuga ku Cyumweru tariki ya 20 Nzeri, yakirwa na Mbeya City FC mu mukino w’umunsi wa gatatu wa Shampiyona ya Vodacom Premier League.

Muni Bosslady ukundana na Niyonzima Ally yavukiye mu Rwanda mu Karere ka Rubavu nyuma ajyana n’ababyeyi be muri Nouvelle-Zélande.

Uyu mukobwa uvuka kuri nyina w’Umunyarwandakazi na se w’Umuhinde ubu avanga akazi k’ubuganga no kumurika imideli byo adakora kinyamwuga.

Mu mwaka wa 2019 nibwo byatangiye kumenyekana ko yinjiye mu rukundo n’umukinnyi w’Umunyarwanda Ally Niyonzima.

Niyonzima Ally ntajya akunda kuvuga cyangwa kugaragaza ko akundana na Muni Bosslady mu gihe uyu mukobwa budashobora kwira adasangije abamukurikira ku mbuga nkoranyambaga amafoto cyangwa amashusho agaragaza ko akundana n’uyu mukinnyi ukina mu kibuga hagati.

Niyonzima yerekeje muri Tanzania nyuma yo gusoza amasezerano y’amezi atandatu yari yasinyanye na Rayon Sports mu ntangiriro z’uyu mwaka.

Uretse Rayon Sports, Niyonzima Ally yakiniye Mukura Victory Sports, AS Kigali na APR FC zo mu Rwanda.

Muni Bosslady na Niyonzima Ally bamaze igihe bari mu munyenga w'urukundo
Muni Bosslady yasangije abamukurikira kuri Instagram amashusho ye na Niyonzima berekeje i Dubai
Mu gihe Shampiyona ya Tanzania ikomeje, Ally Niyonzima n’umukunzi we bagiye i Dubai
Niyonzima usanzwe ukinira Ikipe y’Igihugu ‘Amavubi’ yasinyiye Azam FC yo muri Tanzania mu ntangiriro z’ukwezi gushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .