00:00:00 IGIHE NETWORK KN KINYARWANDA EN ENGLISH FR FRANCAIS

Ubuzima bushya muri Iraq, gutekereza Amavubi n’impamvu atatinze muri Algeria: Manishimwe Djabel twaganiriye

Yanditswe na Ntare Julius
Kuya 2 March 2024 saa 11:29
Yasuwe :

Umukinnyi wo hagati ufasha abataha izamu, Manishimwe Djabel kuri ubu ukina muri Iraq, yishimira kuba yarongeye gusubira mu bihe bye nyuma yo kubona umwanya wo gukina yari yaraburiye muri APR FC na USM Khenchela yo muri Algeria.

Manishimwe Djabel ari mu Ikipe ya Al-Quwa Al-Jawiya kugeza ubu iyoboye urutonde rwa Shampiyona ya Iraq nyuma y’imikino 17, mu gihugu avuga ko cyagaruye ituze n’umutekamo nyuma yo gushegeshwa n’intambara mu myaka yashize.

Kuri ubu, uyu mukinnyi amaze gukina imikino ine aho yabanjemo itatu, umwe awukina nk’umusimbura muri iyi Shampiyona ya Iraq ikinwa n’amakipe 20.

Djabel wamenyekanye cyane mu Ikipe ya Rayon Sports yakiniye imyaka itanu guhera mu 2014, yerekeje muri APR FC mur 2019, ayivamo mu 2023 ajya muri Mukura VS atatinzemo agakomereza urugendo rwa ruhago hanze y’u Rwanda muri USM Khenchela yo muri Algeria, ariko na yo ayimaramo amezi atanu.

Mu kiganiro yagiranye na IGIHE, Manishimwe Djabel yavuze ko impamvu yamaze igihe gito muri USM Khenchela hari ibyo batumvikanye byari mu masezerano, byatumye ashaka indi kipe muri Iraq.

Mu mboni za benshi, Iraq nk’igihugu cyamenyekanye mu ntambara ndetse n’indiri y’ibyihebe mu myaka ishize, ifatwa nk’itarabona umutekano no kwishyira ukizana ugeza ubu. Kuri Manishimwe Djabel uhakorera si ko abibona kuko nyuma y’intambara hagarutse ituze, umutekano ndetse n’iterambere.

Ati "Ubuzima muri Iraq bumeze neza cyane, nanjye nagiyeyo numva bavuga ko ari igihugu kirimo intambara ariko umutekano waragarutse, ariko hano buri wese arishyira akizana mu gihugu hose cyane cyane mu Mujyi mukuru wa Bagdad ni heza cyane, haratuje, umutekano ni wose."

Agaruka ku gihe gito yamaze muri Algeria, Manishimwe Djabel yavuze ko hari ibyo atumvikanye n’ikipe yakiniraga mu masezerano byatumye yishakira indi biba ngombwa ko batandukana.

Ati "Muri Algeria impamvu ntahatinze, hari ibintu byinshi tutagiye duhuza bitewe n’ibyo amasezerano yavugaga bituma twumvikana ko twatandukana mbanza gushaka ikipe, nyibonye numvikana na bo ko tuyasesa nerekeza hano muri Iraq.”

Iraq nk’igihugu kitazwi cyane mu mupira w’amaguru ku ruhando mpuzamahanga, Djabel yakomeje avuga ko umupira w’amaguru waho uri gutera imbere cyane haba mu bukungu, ibikorwaremezo, abakinnyi n’abatoza bakomeye ndetse n’imisifurire.

Ati "Shampiyona ya Iraq muri rusange iri ku rwego rwiza, ni Shampiyona ikomeye, amakipe yose arakomeye ari ku rwego rwiza yaba mu bukungu, mu mikinire ifite abatoza n’abakinnyi bakomeye, mu misifurire kuko igeze ku rwego rwo gukoresha VAR ndetse n’ibikorwaremezo buri kipe yo mu Cyiciro cya Mbere ifite stade nziza ikiniraho, n’abaturage bakunda umupira w’amaguru."

"Usanga ari ahantu heza ku mukinnyi wifuza gukina ku rwego rwiza. Ni yo mpamvu abakinnyi benshi bo ku Mugabane wa Afurika na Aziya bari kuyerekezamo kuko iri gutera imbere kandi ku muvuduko."

Iraq ni igihugu cyo ku Mugabane wa Aziya kiri ku mwanya wa 59 ku rutonde rwa FIFA ndetse gituwe n’Abarabu. Manishimwe Djabel yavuze ko cyakirana yombi abakigana bose, kidaheza ndetse kitarobanura aho waba ukomoka hose ku buryo ugenda wisanga n’ubwo ku mategeko y’umupira w’amaguru kitihanganira abakinnyi bakomoka mu bihugu bitaratera imbere muri ruhago.

Ati "Abanyafurika hano bafatwa neza cyane, barisanga baba bameze nk’abanyagihugu bose. Nta rondaruhu rihaba, ibyangombwa byose urabihabwa, abafana, abakinnyi bagenzi bawe n’abayobozi b’abanyagihugu bagufata nk’uko bafata mugenzi wabo."

"Ahantu hasa n’ahari akabazo gato ni ku mategeko agenga umupira w’amaguru kuko nk’abakinnyi bakomoka mu bihugu bitaratera imbere cyane usanga bagongwa n’ayo mategeko."

"Nk’urugero, ikipe iba yemerewe gutunga abakinnyi babiri gusa bakomoka mu gihugu kiri inyuma ya Iraq ku rutonde rwa FIFA, muri 18 bitabazwa mu kibuga hakajyamo umwe. Ibyo usanga ari imbogamizi gusa ntacyo wabihinduraho ahubwo bigusaba gukora cyane ngo utaba mu bashyirwa ku ruhande."

Nk’umukinnyi ukina hanze y’u Rwanda ndetse wifuza kuzamuka ku rwego mpuzamahanga, Manishimwe arifuza gukina mu Ikipe y’Igihugu aherukamo mu Ukwakira 2021 mu mukino wo gushaka itike y’Igikombe cy’Isi cya 202 nubwo amahitamo ari mu biganza by’abatoza.

Yagize ati "Kugaruka mu Amavubi nta kinini nabivugaho kuko si njye ubihitamo gusa nk’umukinnyi uwo ari we wese aba yifuza gukina mu Ikipe y’Igihugu cye, igihe bazampitamo nzitabira kandi nzitwara neza 100%."

Manishimwe Djabel yabaye umukinnyi wa kabiri w’Umunyarwanda ukina muri Shampiyona yo muri Iraq nyuma yo gusangayo Usengima Faustin ukina muri Al-Qasim SC. Ni mu gihe myugariro w’Umunya-Cameroun, Salomon Banga Bindjeme, aherutse kuva muri APR FC akerekeza muri Al-Shorta SC yo muri icyo gihugu.

Manishimwe Djabel ni umukinnyi ubanza mu kibuga muri Al-Quwa Al-Jawiya yo muri Iraq
Manishimwe Djabel amaze ukwezi kumwe gusa mu ikipe ye nshya
Manishimwe Djabel amaze gukina imikino ine muri Al-Quwa Al-Jawiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .