00:00:00 IGIHE NETWORK KN KINYARWANDA EN ENGLISH FR FRANCAIS

Kuva mu ngarani kugera ku Gikombe cy’Isi; N’Golo Kanté ni muntu ki?

Yanditswe na Mugisha Christian
Kuya 25 January 2022 saa 09:19
Yasuwe :

N’Golo Kanté ukinira Ikipe ya Chelsea FC yo muri Shampiyona y’Icyiciro cya Mbere mu Bwongereza ndetse n’Ikipe y’Igihugu y’u Bufaransa, yabayeho mu buzima bushaririye ndetse butangaje, ariko uyu munsi ari mu bihangange biyoboye muri ruhago y’Isi.

Kanté uzwi ku izina ry’akabyiniriro ka “NG”, ni umukinnyi w’umuhanga ubarwa mu ba mbere bakina bugarira hagati mu kibuga mu mupira w’amaguru ku Isi.

Ababyeyi be bavukiye kandi banatura muri Mali, ariko baza kwimukira mu Bufaransa mu 1980, aho Kanté yavukiye mu Mujyi wa Paris mu 1991.

Kanté amaze kugira imyaka 11, se yitabye Imana ndetse na mushiki we mukuru, Niama, aza kwitaba Imana azize indwara y’umutima mbere gato y’Igikombe cy’Isi cya 2018.

N’Golo Kanté yahawe iri zina (N’Golo) bivuye ku Mwami witwaga Ngolo Diarra wayoboye Ubwami bwa Bamana hagati mu 1766 na 1795.

Kanté yavuze ko yahawe iri zina kubera ibigwi by’uyu mwami wakuze aciriritse ariko akaza kuvamo Umwami ukomeye.

Ati “Ababyeyi banjye banyise iri zina kubera Umwami wa Mali waryitwaga, yakuze aciriritse ariko aza kuvamo Umwami ukomeye. Nanjye natoraguraga imyanda. Amateka yanjye ni meza kuko nanjye natangiriye hasi.”

Ubuzima bukomeye uyu mukinnyi yanyuzemo butangaza benshi ndetse ni isomo rikomeye ryo kutiheba no kudacika intege ku ntego zawe no mu buzima busanzwe.

Urugendo rwa N’Golo Kanté mu mupira w’amaguru

Muri Gicurasi 2012 ni bwo Kanté yakinnye umukino we wa mbere nk’uwabigize umwuga ari muri Boulogne yo mu Cyiciro cya Kabiri ubwo yakinaga na FC Monaco mu Bufaransa.

Umwaka ukurikiye, yakinnye mu Cyiciro cya Gatatu mu Bufaransa mbere y’uko akinira Caen yari mu Cyiciro cya Kabiri akaza kuyizamura mu Cyiciro cya Mbere (Ligue 1).

Nyuma yaho, mu 2015, N’Golo Kanté yakiniye Leicester City FC yo muri Premier League, aho yatwariye Igikombe cya Shampiyona y’u Bwongereza, ahava yerekeza muri Chelsea mu 2016, akaba ari yo akinira ubu.

Ubwo yari amaze guhakana ko atakinira Ikipe y’Igihugu ya Mali inshuro zigera kuri ebyiri (2015 na Mutarama 2016), muri Werurwe 2016 yahamagawe bwa mbere mu Ikipe y’Igihugu y’u Bufaransa y’Ingimbi.

Muri Kamena 2016, yaserukiye bwa mbere Ikipe y’Igihugu Nkuru y’u Bufaransa mu marushanwa ya Euro 2016 aho umukino we wa mbere wabaye uwo bahuyemo n’Ikipe y’Igihugu ya Romania.

Ku wa 17 Gicurasi 2018, N’Golo Kanté yakiniye u Bufaransa mu Gikombe cy’Isi cyabereye mu Burusiya ahamagawe n’umutoza Didier Deschamps. Yakinnye imikino irindwi muri iryo rushanwa.

Yahamagawe kandi no mu Irushanwa rya Euro 2020 ryabereye mu mijyi 11 yo mu bihugu bitandukanye by’u Burayi.

N’Golo Kanté avuga ko ubuzima bwamwigishije byinshi ndetse azi icyo bisaba kugira ngo bugende neza.

Ati “Nzi uko bimera gukemura bimwe mu bibazo [duhura nabyo] iyo turi ku gitutu, nzi no gukomeza gukora kugira ngo ngire icyo ngeraho.”

Ubuzima bwihariye bwa N’Golo Kanté

NG usengera mu idini ya Islam, abana n’umugore we Jude Littler, bafitanye abana batatu ari bo Cassius, Prince na Jackson Cisse bavutse mu 2006, 2008 na 2010.

Aryoherwa no gukina umukino wa Tennis nyuma y’umupira w’amaguru, ndetse akunda indirimbo zo mu bwoko bwa karaoke cyane cyane indirimbo ya Vegedream yitwa “Ramenez la coupe à la maison.”

N’Golo Kanté uzwiho gucisha macye, atwara imodoka yo mu bwoko bwa MBW, Mini cooper.

Ubwo N’Golo Kanté yakinaga mu ikipe y'abana akiri muto
Mu 2018, N’Golo Kanté yari mu Ikipe y'u Bufaransa yatwaye Igikombe cy'Isi
N’Golo Kanté ateruye igikombe cya UEFA Champions League yatwaranye na Chelsea mu mwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .