00:00:00 IGIHE NETWORK KN KINYARWANDA EN ENGLISH FR FRANCAIS

Jimmy Greaves wakiniye u Bwongereza yitabye Imana

Yanditswe na Bukuru JC
Kuya 19 Nzeri 2021 saa 03:31
Yasuwe :
0 0

Uwahoze ari rutahizamu wa Tottenham n’ikipe y’Igihugu y’u Bwongereza, Jimmy Greaves, yitabye Imana kuri iki Cyumweru afite imyaka 81.

Greaves yatangiye gukina umupira w’amaguru nk’uwabigize umwugari ari muri Chelsea mbere y’uko yerekeza muri Milan AC, Tottenham Hotspur na West Ham.

Yatsinze ibitego 44 mu mikino 57 yakiniyemo u Bwongereza ndetse ni umwe mu bari bagize ikipe yabwo yatwaye Igikombe cy’Isi mu 1966.

Yitabye Imana ari we ufite agahigo ko gutsinda ibitego byinshi mu mateka y’Icyiciro cya Mbere mu Bwongereza, aho yinjije ibitego 357 mu gihe yatsindiye Tottenham ibitego 266 mu mikino 379.

Ibitego 41 yatsinze mu mwaka w’imikino wa 1960/61 ubwo yakiniraga Chelsea ni umuhigo utaragerwaho muri iyo kipe mu gihe kandi ari uko bimeze no ku bitego 37 yatsinze akinira Totteham mu 1962/63.

Itangazo ryashyizwe ahagaragara na Tottenham rigira riti “Tubabajwe cyane no kumenya urupfu rw’umunyabigwi Jimmy Greaves, ntabwo ari umukinnyi wadutsindiye ibitego byinshi ahubwo yari umugabo uzi gutsinda igihugu cyagize.”

Rikomeza rigira riti “Jimmy yaguye iwe mu rugo mu masaha ya kare muri iki gitondo, yari afite imyaka 81.”

Mu mukino we wa mbere yakinnye muri Tottenham, Greaves yatsinze ibitego bitatu ihura na Blackpool mu Ukuboza 1961, atsinda ibindi ku mukino wa nyuma wa FA Cup mu 1962 ndetse n’ibindi bitatu inshuro ebyiri mu Cup Winners’Cup yakinwe mu 1963 ubwo iyi kipe yabaga iya mbere yo mu Bwongereza yegukanye igikombe cy’i Burayi.

Greaves yabanaga n’umugore we, Irene, abana bane, abuzukuru n’abuzukuraza 10.

Yatsinze ibitego 132 mu mikino 169 yakiniyemo Chelsea hagati ya 1957 na 1961 mbere y’uko ajya muri Milan AC aho yatsinze ibitego icyenda mu mikino 14 muri Serie A, ariko ahita asubira mu Bwongereza gukinira Tottenham.

Yavuye muri Spurs mu 1970, ajya muri West Ham mbere yo guhagarika gukina ruhago afite imyaka 31 mu mwaka w’imikino wa 1970/71.

West Ham United irafata umunota wo kwibuka uyu mugabo mbere y’umukino ihuramo na Manchester United kuri iki Cyumweru.

Minisiteri w’Intebe w’u Bwongereza, Boris Johnson, ni umwe mu bagaragaje ko babajwe n’urupfu rwa Jimmy Greaves.

Yagize ati “Nababajwe no kumva amakuru ya Jimmy Greaves. Azibukwa nka rutahizamu w’umunyabigwi ndetse nk’umwe mu bikomerezwa bya ruhago y’u Bwongereza. Nifatanyije n’umuryango we, inshuti n’abafana be.

Ubwo yari amaze gusezera gukina umupira w’amaguru, Greaves yagiye mu itangazamakuru, akora mu kiganiro “Saint and Greavsie” yafatanyaga na Ian St John wakiniye Liverpool hagati ya 1985 na 1992.

Mu 2012, yarwaye ‘stroke’[guturika imitsi yo mu bwonko] idakabije, ariko arwara n’ikabije mu 2015. Mu mwaka ushize, yahawe umudali wa ‘MBE’ n’Umwamikazi Elizabeth II.

Jimmy Greaves wari mu ikipe y'u Bwongereza yatwaye Igikombe cy'Isi mu 1966, yitabye Imana afite imyaka 81
Ubwo Harry Kane yari yasuye Greaves wakiniye Tottenham
Jimmy Greaves yitabye Imana mu gitondo cyo kuri iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .