00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo by’ingutu bitegereje Perezida mushya wa Kiyovu Sports

Yanditswe na Byiringiro Osée Elvis
Kuya 9 June 2024 saa 08:17
Yasuwe :

Tariki 26 Gicurasi 2024, Nkurunziza David yatorewe kuyobora Umuryango wa Kiyovu Sports muri manda y’imyaka itatu.

Ni umugabo wafashe iyi kipe nyuma y’umwaka ugoye cyane wuje ubukene no gushyamirana mu buyobozi byatumye isoza shampiyona nta nkuru, buri wese wo muri yo yiruhutsa.

Muri iyi nkuru tugiye kugaruka ku bibazo bike, uyu mugabo asabwa gukemura mu maguru mashya kugira ngo arebe ko byibura Abayovu bazongera kumwenyura bakaririmba “Merci Kiyovu” nk’uko babigenza iyo banezerewe.

Kunga Abayovu

Biragoye ko itsinda iryo ariryo ryose ryaburamo abantu batumva ibintu kimwe ariko biba ikibazo gikomeye iyo igice kiyoboye kivangirwa n’ikindi ndetse kinakirwanya nk’uko bikunze kugenda mu makipe menshi mu Rwanda.

Iyi kipe yatangiye gucikamo ibice bikomeye mu 2020 ubwo Mvukiyehe Juvénal yatorerwaga kuyobora Urucaca benshi bibaza aho avuye.

Byaje guhumira ku murari ubwo uyu mugabo yazanaga uburyo bushya bw’imiyoborere ikipe itangira gucungirwa muri Kiyovu Sports Company Ltd.

Ibi ntabwo byakiriwe neza n’Abayovu b’igihe kinini kuko babifataga nko kwamburwa ikipe yabo. Ibintu byarushijeho kuba bibi mu minsi ya nyuma ya Mvukiyehe ubwo iyi kipe yatangiraga gufatirwa ibihano n’Ishyirahamwe rya Ruhago ku Isi (FIFA), icibwa amafaranga menshi kubera kutishyura abakinnyi batandukanye.

Icyakora Nkurunziza nawe arabizi ko kongera kunga abakunzi ba Kiyovu ari kimwe mu bimutegereje cyane ko biri mu ijambo rya mbere yavuze akimara gutorerwa kuyobora Urucaca.

Icyo gihe yagize ati “Icyo tuzanye cya mbere ni ugusubiza hamwe abakunzi ba Kiyovu Sports aho bari hose kugira ngo dukorere hamwe twongere twisubize agaciro.”

Yakomeje agira ati “Kiyovu yaciye mu bihe bigoye mu minsi yashize nk’imyaka itatu ishize baratatana kubera impamvu mwese muzi ari nacyo cyateye ikibazo cy’amikoro ariko ubwo twiyemeje gukorerahamwe, mbahaye igihe gito kigakemuka.”

Perezida Nkurunziza yitezweho kongera kunga Abayovu

Kwishyura abakinnyi

Ikindi gikomeye gitegereje Nkurunziza kandi agomba gukemura mu maguru mashya ni ukwishyura imyenda y’imishahara iyi kipe ibereyemo benshi mu bakinnyi yari ifite mu mwaka ushize w’imikino.

Iyi myenda iri mu byiciro bitandukanye kuko hari abakinnyi bakomeye idafitiye umwenda, hakaba ikindi gice kiberewemo amezi abiri kuzamura kugera no kuri arindwi.

Ni amafaranga atari make kuko Kiyovu Sports yasoje shampiyona yishyura miliyoni 19 Frw y’imishahara ku kwezi.

Gukemura iki kibazo niho uyu mugabo ashobora kuzahera yubaka ikipe kuko hari abakinnyi azifuza kugumana bityo bikagenda neza nta kangononwa umukinnyi afite k’ibirarane by’umwaka ushize.

Ntiwavuga ibyo kwishyura ngo wibagirwa amande iyi kipe yaciwe na FIFA aho igomba kuzishyura arenga miliyoni 60 Frw kugira ngo yemererwe kugura abakinnyi bashya.

Perezida Nkurunziza afite akazi gakomeye kubaka ikipe ikomeye ihatanira ibikombe

Kubaka ikipe

Akandi kazi katoroshye gategereje Nkurunziza ni ukubaka ikipe kandi iri ku rwego rwo guhatana mu gihe yaba yamaze kwishyura FIFA ikamukomorera mu kugura abakinnyi.

Ni akazi gakomeye kamutegereje kuko yitezweho gusubiza Kiyovu Sports ku rwego yariho mu myaka itatu ishize aho yahataniraga Igikombe cya Shampiyona bigaragara nubwo byarangiraga iguye munsi y’urugo.

Kubaka ikipe yo kuri urwo rwego bisaba abakinnyi beza kandi bagendana no gushora amafaranga menshi.

Icyakora iyi kipe ifite abeza bo guheraho nka Richard Kirongozi ugifite amasezerano na Sharif Bayo shampiyona yasojwe atacyumvikana n’ikipe kubera kutubuhariza ibyo imugomba. Hari kandi kugerageza kugumana Niyonzima Olivier Seif n’umunyezamu Nzeyurwanda Djihad wasoje amasezerano.

Perezida mushya wa Kiyovu Sports, Nkurunziza David yatorewe kuyobora iyi kipe mu gihe cy'imyaka itatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .