Haruna yarahiye ko atazongera gusinyira ikipe yo muri Tanzania

Yanditswe na Ngabo Roben
Kuya 11 Ugushyingo 2018 saa 10:08
Yasuwe :
0 0

Kapiteni w’Ikipe y’Igihugu y’u Rwanda, Amavubi, Haruna Niyonzima wari umaze imyaka irindwi akina muri shampiyona ya Tanzania, yarahiye ko atazongera gusinyira ikipe yo muri iki gihugu.

Kuri uyu wa Gatanu tariki 10 Ugushyingo 2018 Haruna Niyonzima yagaragaye mu mukino wa gicuti wahuje AZAM FC n’ikipe ye Simba Sports Club aho batahanye intsinzi y’igitego kimwe ku busa.

Nyuma y’uyu mukino Niyonzima yabwiye IGIHE ko atishimiye ubuzima abayemo muri Simba SC kuko umwanya wo gukina abona udahagije.

Ati “Maze iminsi mu bibazo ariko sindibagirwa ko naje muri Simba mu kazi. Ntabwo navuga ko nishimye kuko sindashobora gukora ako kazi. Ndacyategereje ko umutoza azafata umwanzuro akankoresha. Nibwo nzishima kuko nzakora icyo naguriwe.”

“Ku ruhande rumwe nishimira ko ikipe yanjye yitwara neza ariko ku rundi mbabazwa no kuba ntakoreshwa ariko njye nemera ko byose bibaho ku bushake bw’Imana ubwo nzakomeza ntegereze.”

Byavuzwe ko nyuma yo kurangiza amasezerano ye muri Simba SC mu mpeshyi ya 2019 ashobora gusubira muri Yanga Africans, ikipe yakiniye imyaka itandatu ariko uyu mugabo yateye utwatsi aya makuru.

Ati “Ntekereza ko imyaka maze aha (muri Tanzania) ihagije. Ntekereza ko ibyiza ari uko narangiza amasezerano muri Simba SC nkajya gushakira ahandi. Aha abantu bakorera ku gitutu gikabije. Benshi ntibabizi ariko hano birakabije igitutu ndakirambiwe ngomba kujya ahandi kuko ndacyari umukinnyi mwiza wakwifuzwa.”

Haruna Niyonzima washoboraga kwirukanwa muri Simba ariko ikagorwa n’ingingo ziri mu masezerano ye zatuma bamwishyura amafaranga menshi, bivugwa ko yifuzwa n’amakipe atandukanye arimo ayo muri Afurika y’Epfo nka Baroka FC ya Shaban Hussein Tchabalala n’andi yo muri Aziya.

Haruna Niyonzima yamaze imyaka itandatu akina muri Yanga Africans
Niyonzima yarahiye ko atazongera gusinyira amakipe yo muri Tanzania kubera igitutu ashyirwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza