Mu gitondo cyo kuri uyu wa Gatandatu, tariki ya 4 Nyakanga 2026, ni bwo iyi kipe yo muri Sudani yatangaje ko yahaye akazi umutoza mushya w’ikipe ya kabiri, uzayitoza mu mwaka utaha w’imikino wa 2026/27.

Yagize iti “Ikipe yacu ysinyishije amasezerano y’umwaka umwe Guy Bukasa ukomoka muri Repubulika Iharanira Demokarasi ya Congo, kugira ngo atoze ikipe ya kabiri nk’Umutoza Mukuru, anareberere amakipe y’abato mu byiciro byose.”

Bukasa wahawe akazi muri iyi kipe yo muri Sudani, yari asanzwe ari Umutoza Mukuru w’Ikipe y’Igihugu ya RDC y’abatarengeje imyaka 23, akaba yarayigezemo mu 2025 avuye muri St-Éloi Lupopo.

Mbere y’uko ahabwa akazi muri iyi kipe, bivugwa ko Bukasa yifujwe n’amakipe arimo Police FC itarabona umutoza nyuma yo gutandukana na Ben Moussa, ndetse akaba yaranashakwaga na Singida Black Stars yo muri Tanzania.

Al Hilal SC kandi iherutse kwemeza Umunya-Portugal, Alexander Miguel Crespo Santos, kugira ngo abe ari we uzayitoza mu marushanwa ihanze amaso arimo na CAF Champions League.

Al Hilal SC ya kabiri ikina Shampiyona yo muri Sudani mu gihe inkuru iba iri gukina Shampiyona y’u Rwanda, ariko mu mikino ya nyuma amakipe yombi akagurana, iy’abato ikaba ari yo ikina BK Pro League kuko inkuru iba yasubiye iwabo gukina imikino ya kamarampaka.

Iyi kipe ni yo yegukanye Igikombe cya Shampiyona y’u Rwanda cya 2025/26, nyuma yo kugira amanota 75, ikarusha arindwi APR FC yabaye iya kabiri ikegukana igikombe mu makipe yo mu Rwanda.

Guy Bukasa watoje Rayon Sports yagizwe Umutoza Mukuru wa Al Hilal SC ya kabiri

Guy Bukasa wavuzwe muri Police FC yerekeje muri Al Hilal SC ya kabiri no gutoza amakipe y'abato