00:00:00 IGIHE NETWORK KN KINYARWANDA EN ENGLISH FR FRANCAIS

Gasogi United yasezereye APR FC mu Gikombe cy’Amahoro (Amafoto)

Yanditswe na Ntare Julius
Kuya 21 February 2024 saa 11:51
Yasuwe :

Ikipe y’Ingabo z’Igihugu, APR FC yasezerewe na Gasogi United muri ¼ cy’Igikombe cy’Amahoro kuri penaliti 4-3, nyuma y’uko amakipe yombi anganyije 0-0 mu mikino yombi.

Ni mukino watangiye saa Kumi n’Ebyiri, aho APR FC yari yakiriwe na Gasogi United. Amakipe yombi yari yanganyije umukino ubanza 0-0.

APR FC yihariye cyane igice cya mbere cy’uyu mukino igera cyane imbere y’izamu rya Gasogi United ariko kirangira ari 0-0. Igice cya kabiri APR FC yatangiye isimbuza, ikuramo Joseph Apam Assongue ishyiramo Mugisha Gilbert.

Gasogi United yagitangiye kotsa igitutu Ikipe y’Ingabo cyane binyuze muri rutahizamu Kabanda Serge wahushije uburyo bukomeye bw’igitego imbere y’izamu ku ishoti yateye rikomeye rica hejuru.

Bitandukanye n’igice cya mbere, igice cya kabiri Gasogi United niyo yakiyoboye cyane yugarira neza ariko isatira cyane byatumaga ibona imipira myinshi y’imiterekano irimo koruneri nyinshi. Ku munota wa 78 yabonye koruneri ariko ntiyabyara umusaruro.

Nyuma y’umunota umwe, Hamiss Hakim wa Gasogi United yateye ishoti rikomeye rigana mu izamu gusa umunyezamu Pavelh Ndzila arishyira muri koruneri na none itatanze umusaruro. Gasogi United yakomeje kwigaragaza kurusha APR FC mu gice cya kabiri ariko nayo gutsinda biba ikibazo, kugeza aho iminota 90 n’itandatu yongeweho yarangiye amakipe yombi anganya 0-0, hitabazwa za penaliti.

Ku ruhande rwa Gasogi United abakinnyi Mbirizi Eric, Iradukunda Axel, Joseph Rama, Hamissi Hakim batsinze penaliti Kabanda Serge arayihusha.

Ku ruhande rwa APR FC, Nshimirimana Ismael, Pitchou, Omborenga Fitina na Ishimwe Christian aribo batsinze penaliti, naho Victor Mbaoma na Ruboneka Jean Bosco barazihusha, umukino urangira Gasogi United igeze muri 1/2 itsinze penaliti 4-3 aho izahura na Police FC.

Mu wundi mukino wari wabereye kuri Kigali Pele Stadium ikipe ya Police FC yasezereye Gorilla FC igera muri 1/2 nyuma y’uko iyitsinze ibitego 2-1.

Mu Karere ka Huye Mukura VS yari ku rugo yatunguwe no gusezererwa na Bugesera FC yari yayisuye, nyamara umukino ubanza amakipe yombi yari yanganyije 0-0 i Bugesera. Igitego kimwe rukumbi cyatsinzwe na Gakiza Aime ku munota wa 40 nicyo cyatandukanyije impande zombi. Muri 1/2 cy’Igikombe cy’Amahoro Bugesera FC izahura na Rayon Sports.

Abakinnyi 11 babanjemo ku ruhande rwa APR FC
Abakinnyi 11 babanjemo ku ruhande rwa Gasogi United
Ruboneka Jean Bosco ni umwe mu bakinnyi bagaragaje ishyaka muri uyu mukino
Umunya-Sudani, Sharaf Eldin Shiboub Ali Abdel-Rahman ni we wari Kapiteni nyuma y'uko Niyomugabo Claude yabanje ku ntebe y'abasimbura
Mugisha Gilbert wa APR FC agerageza gutera ishoti mu izamu rya Dauda Ibrahim Bareli ufatira Gasogi United
Rutahizamu w'Umunya-Nigeria, Victor Chukwuma Mbaoma ntabwo yigeze yigaragaza muri uyu mukino
Iminota 90 yarangiye Perezida wa Gasogi United yiterera hejuru icyizere cyo gukomeza kuri we kirazamuka
Perezida wa Gasogi United, Kakooza Nkuliza Charles 'KNC' yiyambura ingofero mu minota ya nyuma y'umukino
Chairman wa APR FC, Col Richard Karasira nta byishimo yari afite ku maso ubwo umukino wari urangiye ugiye muri penaliti
Rurangayire Guy wahoze ari Umuyobozi wa Siporo muri Minisiteri ya Siporo yaje kureba uyu mukino yambaye umupira w'Urubambyingwe ndetse yicaye iruhande rwa KNC
Chairman wungirije wa APR FC, Uwayezu François Régis yarebaga umupira icyizere cyo gukomeza kiri hasi
Umuyobozi w'Abafana ba Gasogi United 'Urubambyingwe' ku Isi, Mutabaruka Angelbert yasabwe n'ibyishimo ubwo umukino wari ugiye muri penaliti
Penaliti ya mbere ku ruhande rwa APR FC yatewe ku mutambiko w'izamu na Ruboneka Jean Bosco
Umunyezamu wa Gasogi United, Dauda Ibrahim Bareli yayikurikije amaso
Kabanda Serge wa Gasogi United ni we wahushije penaliti imwe rukumbi ya Gasogi United
Penaliti yindi ya APR FC yatewe na Victor Mbaoma yakuwemo n'Umunyezamu Dauda wa Gasogi United, APR FC itaha ityo
Byari ibyishimo ku Munyezamu wa Gasogi United, Dauda Ibrahim Bareli
Umutoza w'Abanyezamu ba Gasogi United, Maniraguha Claude yapfukamye atunga amaboko mu bicu ashimira Imana yabafashije gusezerera APR FC
Byari ibyishimo bidasanzwe ku basore ba Gasogi United
Abakinnyi ba Gasogi United batereye Umutoza wabo Kirala Alain mu bicu nyuma yo gusezerera APR FC
Nyuma y'umukino KNC yinjiye mu kibuga agana mu rwambariro gushimira abakinnyi be nyuma y'akazi bari bamaze gukora

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .