00:00:00 IGIHE NETWORK KN KINYARWANDA EN ENGLISH FR FRANCAIS

FERWAFA ntivuga rumwe n’Umutoza Spittler ku makipe yakina n’Amavubi imikino ya gicuti

Yanditswe na Ntare Julius
Kuya 27 February 2024 saa 10:55
Yasuwe :

Ishyirahamwe ry’Umupira w’Amaguru mu Rwanda (FERWAFA) rigiye gukora inama yo guhitamo ibihugu bizakina n’Amavubi imikino ibiri ya gicuti muri Werurwe 2024 nyuma yo kudahuza n’Umutoza w’Ikipe y’Igihugu, Torsten Spittler, wari wahisemo ibihugu byo mu Barabu.

Ingengabihe ya FIFA igena ko muri Werurwe hagati ya tariki 18–26 buri mwaka hakinwa imikino ibiri ya gicuti ari na yo mpamvu n’Ikipe y’Igihugu "Amavubi" iri gushakirwa amakipe izakina na yo, cyane ko nyuma y’Umunsi wa 23 n’uwa 24, Shampiyona izahagarara.

Kugeza ubu, u Rwanda ntiruramenya ibihugu ruzakina na byo nyuma y’uko habayeho kudahuza ku mahitamo hagati ya FERWAFA n’Umudage Torsten Spittler utoza Amavubi.

Hashize ibyumweru bibiri Umutoza Spittler amenyesheje ubuyobozi bukuru bwa FERWAFA ko ari mu biganiro n’ibihugu bya Qatar na Bahrain byo ku Mugabane wa Aziya ndetse ko hari amahirwe menshi ko bizemerera u Rwanda imikino ya gicuti.

Ibi bamwe mu bayobozi ba FERWAFA ntibabikozwa, cyane ko imikino ya gicuti y’Amavubi izaba igamije kwitegura Bénin izakira Amavubi tariki ya 3 Kamena 2024, mu gushaka itike yo gushaka itike y’Igikombe cy’Isi 2026.

FERWAFA irifuza ko Amavubi yakina na bimwe mu bihugu byo mu Burengerazuba bwa Afurika birimo Guinée n’ikindi cyakwiyongeraho gishobora kuba Burkina Faso.

Amakuru yizewe agera kuri IGIHE yemeza ko mu gitondo cyo kuri uyu wa Kabiri, tariki 27 Gashyantare, abareberera Ikipe y’Igihugu; ubuyobozi bwa FERWAFA ndetse n’Umutoza Torsten Spittler bagiye guhurira mu nama ifata umwanzuro ntakuka kuri iki cyemezo.

Impamvu yo gutinda kwemeza iyi mikino ya gicuti ahanini ikaba yatewe no gutegereza ko CAF imenyesha u Rwanda niba ruzakina imikino y’amajonjora y’ibanze yo gushaka itike ya CAN 2025, ingengabihe ikaba yarasohotse tariki 22 Gashyantare 2024.

U Rwanda rukaba rutarashyizwe muri iri jonjora rya mbere kuko hagenwe amakipe azarikina hakurikijwe urutonde rwa FIFA, hafatwa amakipe umunani ya nyuma muri Afurika.

U Rwanda ruyoboye itsinda C n’amanota ane, Afurika y’Epfo ikurikiraho n’amanota atatu, Nigeria, Zimbabwe na Benin zifite abiri naho Lesotho ikaza ku mwanya wa nyuma n’inota rimwe.

Ubuyobozi bukuru bwa FERWAFA n'abareberera Ikipe y'Igihugu ntibavuga rumwe ku bihugu byakina n'Amavubi imikino ya gicuti
Amavubi ntaramenya amakipe yazakina na yo imikino ya gicuti nubwo hasigaye iminsi itageze ku kwezi
Abatoza b'Amavubi bategereje icyemezo cya nyuma gifatwa kuri uyu wa Kabiri ku bihugu bizakina imikino ya gicuti n'Amavubi

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .