00:00:00 IGIHE NETWORK KN KINYARWANDA EN ENGLISH FR FRANCAIS

Dutsinzwe na Rayon Sports twaba dusekeje: KNC yahize bikomeye

Yanditswe na Iradukunda Olivier
Kuya 20 Ukuboza 2022 saa 03:50
Yasuwe :

Perezida wa Gasogi United FC, Kakoza Nkuliza Charles (KNC), yahize gutsinda umukino bafitanye na Rayon Sports ku wa 23 Ukuboza, avuga ko ibatsinze baba ari ikipe isekeje.

Rayon Sports izakira uyu mukino w’Umunsi wa 15 wa Shampiyona uzabera kuri Stade ya Kigali i Nyamirambo saa Kumi n’ebyiri.

Mu kiganiro yagiranye Fine FM mu gitondo cyo kuri uyu wa 20 Ukuboza 2022, Perezida wa Gasogi United, Kakoza Nkuriza Charles (KNC), yagarutse ku rugendo rwabo muri Shampiyona y’u Rwanda rukomereje ku ikipe ya Rayon Sports.

Gasogi United yahagamye amwe mu makipe akomeye hano mu Rwanda arimo Kiyovu Sports na Police FC yakuyeho amanota atatu ndetse na APR FC yakuyeho inota rimwe.

Kuba Rayon Sports itaratsindwa na Gasogi United FC na rimwe, ni imwe mu mpamvu ituma KNC avuga ko azayitsinda kuri iyi nshuro nubwo imikino ibiri iheruka yayitsinzwe.

Ati “Ikipe tugiye gukina ndayizi kandi ibyo kuba tutarayitsinda ntabwo ari byo twimirije imbere. Ikindi kandi kuri iyi nshuro tuzayitsinda ku nabi cyangwa ku neza.”

Yongeyeho ko kuva Gasogi United imaze imikino ibiri ibona amanota atatu, Rayon Sports itabona na rimwe na yo ari impamvu ituma itazamuhagarara imbere.

Ati “Tumaze imikino itanu tudatsindwa, none se ni gute iyo kipe idaheruka gutsinda yaduhagarara imbere? Hari ibintu mujya mukinisha, Gasogi United ntabwo ikiri ya kipe ya kera.”

Yakomeje agira ati “Mwafashe Rayon Sports murayibeshyera, murayisigiriza, murayitaka, mukanayishuka. Ibyo byose ugiye mu mibare usanga nta mukinnyi wa Rayon Sports uhagarara imbere y’uwa Gasogi United.”

Yisekera cyane, Kakoza Nkuriza Charles yongeye kuvuga ko gutsindwa na Rayon Sports kuri iyi nshuro, Gasogi United FC yaba ari ikipe “isekeje”.

Shampiyona y’u Rwanda igiye gukinwa umukino wayo wa nyuma mu mikino ibanza, Rayon Sports iri ku mwanya wa kabiri n’amanota 28, irarusha Gasogi United amanota atatu aho iri ku mwanya wa gatanu.

KNC yavuze ko Rayon Sports itazaba mu nzara ku wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .