Cameroun, imwe mu makipe ya Afurika ari mu gikombe cy’Isi irakina umukino ubanza na Mexique saa 18.00, iheruka gutsinda umukino mu gikombe cy’Isi mu 2002, Arabiya Saudite igitego 1-0.

Aya makipe yombi ahuje amateka mu gushaka itike y’igikombe cy’Isi, Mexique yakoresheje abakinnyi 47 n’abatoza bane ngo babone itike yo gukina iyi mikino yo muri Brazil mu gihe Cameroun yarangije amajonjora iyobowe n’abatoza babiri irangiza ari iya mbere.

Umutoza wa Mexique, Miguel Herrera, yavuze ko rutahizamu wa Manchester United Javier Hernandez "Chicharito" ko agomba kubanza hanze, Giovani dos Santos agahabwa umwanya.

Umutoza Herrera yahisemo kubanza hanze Chicharito

... aha umwanya Giovani dos Santos

Herrera yagize ati " Umukino ubanza ni ingenzi , abasore bafite mu mitwe yabo gutsinda Cameroun. Turifuza gukuraho amateka mabi ko Mexique idashobora kurenga ¼ nkuko byagenze mu bikombe bitanu biheruka."

Ku ruhande rwa Cameroun, nyuma yo kwanga guhaguruka i Yaounde batabonye agahimbazamusyi, ntibiremezwa niba kapiteni wabo, Samuel Et’o akina nyuma yo gukora imyitozo mike muri iki Cyumweru nubwo Jean Makoun yasubiye mu myitozo.

Aya makipe amaze guhura kabiri, Mexique yatsinze Cameroun igitego 1-0 mu 1993, mu mukino wa gicuti.

Rafael Marquez wakiniye FC Barcelona ni kapiteni wa Mexique

Samuel Eto'o yakinanye na Marquez muri FC Barcelona, ntibiremezwa niba ameze neza kuri uyu mukino

Cameroun iheruka gutsinda umukino w’igikombe cy’Isi mu 2002, batsinda Arabiya Saudite igitego 1-0, mu mikino y’iki gikombe 13 batsinzwe 8 banganya ine.

Umunyacameroun Fabrice Olinga niwe mukinnyi muto muri iri rushanwa yujuje imyaka 18 muri Gicurasi.

Mexique irakirira Cameroun kuri Arena das Dunas, ntiratsindira ikipe ya Afurika mu mikino ya nyuma y’igikombe cy’Isi yanganyije umukino umwe itsindwa ibiri.

Aya makipe ari mu itsinda A, hamwe na Brazil yaraye itsinze Croatia ibitego 3-1.

Abafana ba Mexique bafite inyota yo kugera muri 1/4 mu bikombe bitanu bishize

Abakinnyi bashobora kubanzamo: Mexique vs Cameroun saa 18.00

[email protected]