Brazil yakomeje muri 1/4 cy’irangiza itsinze Chili kuri penaliti 3-2, umukino wari warangiye banganyije igitego 1-1 banakinnye iminota 30 y’inyongera, Brazil izahura n’itsinda hagati ya Colombia na Uruguay.

Brazil yabonye igitego ku munota wa 18 cyatsinzwe na David Luiz ku mupira watewe na Thiago Silva. Ni igitego cya mbere Luiz atsindiye igihugu cye.

Ku munota wa 38, Alexis Sánchez yishyuye ku mupira yaherejwe na Eduardo Vargas. Iki nicyo gitego cya mbere Brazil itsinzwe muri 1/8 cy’irangiza kuva mu 1998.

Igice cya mbere cyarangiye Chili iyoboye umukino n’ikigeranyo cya 57 % cyo kugumana umupira nubwo Brazil yabarushije gutera mu izamu, amashoti 6 kuri 2.

Rutahizamu Hulk yaje gutsinda igitego ku munota wa 55 cyanzwe n’umusifuzi Howard Webb kuko yawukoze n’ukuboko.

Luis Gustavo yabonye ikarita ya kabiri y’umuhondo ituma atazakina umukino wa ¼.

Umutoza wa Brazil, Luiz Felipe Scolari yakoze impinduka ya mbere akuramo Jô wasimbuye Fred aza guhusha igitego asigaye wenyine ku munota wa 75.

Mu minota 30 y’inyongera, Scolari yashyizemo Willian mu mwanya wa Oscar. Brazil iyobora umukino mu minota 15 ya mbere.

Chili yashoboraga kubona igitego cy’intsinzi ku munota wa nyuma ariko umupira watewe na Pinilla ukubita umutambiko w’izamu.

Byabaye ngombwa ko hitabazwa penaliti, Brazil ikomeza nyuma y’aho Gonzalo Jara ateye iya nyuma ikubita igiti cy’izamu.

David Luiz, Marcelo na Neymar batsindiye Brazil mu gihe Hulk (ikurwamo na Bravo) na Willian (yawuteye hanze) bazihushije.

Ku ruhande rwa Chili, Mauricio Panilla Panilla (wakuwemo n’umunyezamu), Alexis Sánchez (ikurwamo na Cesar) na Jara Jara (umupira ukubita igiti cy’izamu) bazihushije, ebyiri zinjizwa na Charles Aránguiz na Marcelo Diaz.

Kimwe nko mu 2010, Brazil isezerera Chili muri 1/8, umupira wa Jara wakubise igiti cy’izamu.

Umunyezamu wa Brazil Jules Cesar yatowe nk’umukinnyi mwiza w’uyu mukino.Igitego cya Sánchez cyabaye icya 138.

Mu mikino 7 y’igikombe cy’Isi amakipe yakiranuwe na penaliti, iyabanje gutera niyo yatsinze. Brazil yaherukaga gukina iminota y’inyongera mu 1998 ubwo yasezereraga u Buholandi kuri penaliti.

Muri ¼, Brazil izahura n’itsinda hagati ya Colombia na Uruguay nazo zo muri Amerika y’Epfo.

[email protected]