00:00:00 IGIHE NETWORK KN KINYARWANDA EN ENGLISH FR FRANCAIS

APR FC yugururiye amarembo abanyamahanga, kuri Adil yavuze: Gen Mubarakh twaganiriye (Video)

Yanditswe na Eric Tony Ukurikiyimfura, Ntare Julius
Kuya 24 Ukuboza 2022 saa 05:06
Yasuwe :

Imyaka 10 irashize APR FC yarashyizeho politiki yo gukinisha abakinnyi b’Abanyarwanda, itana n’abanyamahanga bayiherukamo mu mwaka wa 2012.

Muri icyo gihe cyose, ubuyobozi bwa APR FC bwishimira ko bwashoboye guha amahirwe abakinnyi b’Abanyarwanda bakerekana icyo bashoboye. Aba bayifashije gutwara ibikombe birindwi bya Shampiyona na bibiri by’Amahoro.

Ku rundi ruhande ariko, umusaruro ku ruhando mpuzamahanga mu mikino ya CAF Champions League na CAF Confederation Cup wabaye iyanga kuko intego zo kugera mu matsinda zaranze burundu kugeza ubu.

APR FC yari ihagarariye u Rwanda mu mikino Nyafurika ihuza amakipe yatwaye ibikombe iwayo, CAF Champions League, muri uyu mwaka yasezerewe itarenze umutaru nyuma yo gutsindwa na US Monastir ku giteranyo cy’ibitego 3-1.

Umukino ubanza wahuje aya makipe mu Karere ka Huye warangiye iyi Kipe y’Ingabo itsinze igitego 1-0, mu wo kwishyura wabereye muri Tunisia ku wa 18 Nzeri 2022 itsindwa ibitego 3-0.

Uyu mwaka yari yihaye intego yo kugera mu matsinda bidasubirwaho ariko imigambi yihaye ntiyigeze iyigeraho.

Mu mwaka wa 2020, APR FC yasezerewe na Gor Mahia yo muri Kenya mu ijonjora rya mbere ku giteranyo cy’ibitego 4-3 mu mikino yombi.

Umwaka wakurikiyeho Ikipe y’Ingabo yarijajaye itsinda Mogadishu City ibitego 2-1 ariko mu ijonjora rya kabiri ihurirayo n’uruva gusenya kuko yatsinzwe na Etoile du Sahel 5-1 mu mikino yombi. Amahirwe yari isigaranye ni ugukomeza inzira igana muri CAF Confederation Cup ariko RS Berkane yitambitse intego zayo iyikuramo ku bitego 2-1.

Mu gihe bamwe mu bakunzi n’abafana bayo bavuga ko ikwiye kongera kugaruka ku gukinisha abanyamahanga, Chairman wayo, Lt Gen Mubarakh Muganga, yemeje ko iyi kipe nisohokera u Rwanda, hari abazongerwamo bakayifasha gushaka uko yagera kure mu mikino Nyafurika.

Gen Mubarakh yabigarutseho mu kiganiro cyihariye yahaye IGIHE ku wa Gatanu, tariki ya 23 Ukuboza 2022. Yagarutse ku ngingo zitandukanye zirimo politiki ya APR FC, uko abakinnyi b’ikipe bafatwa n’ahazaza hayo.

APR FC isoje ite uyu mwaka wa 2022 n’imikino ibanza ya Shampiyona?

Gen Mubarakh Muganga: Twaraye dusoje imikino ibanza ya Shampiyona, mu by’ukuri, ku ruhande rwa APR FC ntitwatangiye neza kandi icyabiteye ni uko tumaze kuva mu mikino y’amakipe [ya Afurika], abakinnyi, intumbero bari bafite, bari bazi ko turi bugere kure mu mikino Nyafurika, tugarukira hafi batari babyiteze.

Kugira rero ngo bave muri ibyo bihe barimo, bongere kugaruka muri Shampiyona y’u Rwanda byarabavunnye, hanyuma tukiri kugira ngo turagira ibyo dushyira mu buryo, kugira ngo twongere dutangire urugamba, haba hajemo iby’umutoza wacu [Adil] byo kudahuza neza n’abakinnyi n’ibyo na we yari avuyemo, bituma noneho abakinnyi basubira inyuma cyane.

Navuga rero ko tutatangiye neza ariko ngira ngo mubonye ko aho twari tugiye gusoreza, abasore bari bamaze kuganirizwa, inshuro nkeya twabonye umwanya wo kubaganiriza, tubona bumviye ubuyobozi, bumviye n’impanuro, na bo bitekerejeho, murabona ko byagendaga neza.

Hari icyo mwishimira cyaba cyaragezweho muri uyu mwaka?

Ibyo twishimira byo ni byinshi. Umwaka ni ikintu kinini, waba uw’imikino n’uwo mu buzima busanzwe, ariko uwo mu mikino ndetse n’abakinnyi bacu, nk’uko twagiye tubivuga twe icyerekezo cyacu dukura ku buyobozi bukuru ni uko tugerageza kwereka Abanyarwanda ko bashoboye kandi na bo ubwabo bifitemo impano. Twarabigerageje birakunda, ku isoko dufite abakinnyi barenga icyenda twohereje mu mahanga, ibyo ntibyari bisanzwe ari abana b’Abanyarwanda.

Noneho no mu gihugu tukavuga tuti abo bana dufite, hamwe n’utwo tubazo bagiye bahura na two, ariko ni abakinnyi bahaye akazi amakipe mbere yahoraga avuga ko afite abanyamahanga batatu, FERWAFA iza kubongera ibaha batanu. Kubona rero Abanyarwanda 11 bahanganye n’abo bitwa ko ari abanyamahanga baguzwe ku giciro cyo hejuru ndetse wenda bifitemo ubuhanga kuko ntitwemera ko bagura abaswa nk’uko amaradiyo n’abandi bashaka kubivuga babivuga.

Baba batoranyije. Niba rero baza bagahangana na APR, twe tuvuga ngo tuba twageze ku ntego abayobozi baba badushinze, bwa mbere kwereka Abanyarwanda ko bashoboye, bwa kabiri abo Banyarwanda kubatinyura bakaba bajya ku murimo wo hanze, kugira ngo bagaragaze iyo mpano yabo, noneho no mu gihugu bagakomeza guhangana, twe tuba twumva hari kinini twagezeho twishimira.

Chairman wa APR FC, Lt Gen Mubarakh Muganga, yavuze ko bishimira uko uyu mwaka urangiye nubwo ikipe itatangiye neza

Nka APR FC mubona gute umusaruro wo gukinisha Abanyarwanda kuva mu 2012?

Muri iyo myaka 10 byatanze umusaruro, ni nk’ibyo nari maze kuvuga mu kanya, ariko na none ntibyatanze umusaruro twifuzaga cyane ariko impamvu ziba ari nyinshi. Muri iyo myaka ushobora kubara abatoza batoje APR ni bangahe? Buri umwe afite ibyo yadusigiye n’ibyo yagezeho.

Twe twavuga ko muri iyi myaka itatu ari bwo twari twafashe gahunda noneho, iriya yindi byari nko kugerageza. Iyi itatu turavuga tuti reka tuzane abatoza baduhenze, umutoza na bagenzi be, kenshi abatoza bakunze kuvuga ngo uyu aramvangira, turamubwira tuti nahere rwose ‘k’Usesengura amashusho’, azane ikipe ye yuzuye, hanyuma natwe tumutoranyiriza Abanyarwanda bitewe n’abo yifuza, dushaka abeza ku isoko tubashyiraho, ariko nk’aho iyo gahunda yakabaye igenda neza hazamo COVID-19 ku Isi hose, ntabwo ari umwihariko w’u Rwanda. Ibyo na byo biba bivangiye gahunda yacu.

Ubu ni nk’aho twavuga tuti nyuma y’imyaka itatu, ibiri dukomanga nk’uko nabivugaga, uyu ni wo twari twavuze ngo turebe uko biri bugende n’abakinnyi bose babirimo, ni cyo cyanababaje, cyatumye koko basubira inyuma kuko bashakaga kugera kure hashoboka ngo berekane ubushobozi bwabo nk’Abanyarwanda ntibyagenda rero uko bikwiriye, bituma habamo uko gutsindwa.

Hari byinshi twakuyemo nk’umusaruro, ariko hari byinshi bikibura, birumvikana kuko mu bikibura ni uko APR FC kenshi yagiye ijya mbere bitandukanye n’uko kuri iyi nshuro cyangwa inshuro ebyiri zibanza nta na rimwe twari tumenyereye kuviramo ku mukino wa mbere, uwa kabiri se, ni byo twashakaga kurenga ngo tujye mu matsinda ariko hazamo izo mbogamizi ariko icyiza, ikipe turacyayifite.

Umutoza twagize ibyago turamubura ariko na none abamwungirije yihitiyemo ndetse bafite n’ubwo bumenyi busabwa. Hari icyo twatakaje ariko ntabwo ari kinini kubera ko dufite aho guhera twubaka.

Kuri ubu umubano wa APR FC na Adil wifashe gute?

Nk’ubuyobozi icyo tuvuga bwa mbere, umutoza wacu yarakosheje nk’uko abantu bose babana, byanze bikunze nta ntungane, natwe dushobora gukosa, ariko noneho twe nk’abakoresha tuvuga ko umutoza yadukoshereje tumuha ibihano by’ukwezi kandi ntabwo yabihawe wenyine.

Yakosheje yuvura kapiteni we, Kapiteni [Djabel] arakosa kubera umutoza, tubonye iyo bombori bombori n’ibyo twari tuvuyemo mu gikombe cy’amakipe yitwaye neza, turavuga ngo reka tubanze tubahe ukwezi bitekerezeho bakosore, baze dukomeze twubake. Tugiye kumva twumva yafashe [Adil] indege yaragiye, ubwo biba bibaye ikindi kibazo.

Ariko kubera ko twari dufite ikipe kandi ikipe ari APR, twakomeje twubakira aho ngaho. Twe rero ku ruhande rwacu nk’ubuyobozi bwa APR ntacyo twishinja ariko buriya umuntu ubana n’abandi ashobora kuvuga ngo mwankoshereje aha, ubwo byaba ari ku ruhande rwe. Ariko twe nk’uko nabivuze, mu izina ry’ubuyobozi, umutoza iyo umuhembye ukamuha ibyo asaba byose kugeza no ku munsi wa nyuma, n’imodoka yacu yayisize ku kibuga cy’indege.

Ari nk’izindi kipe zitari ku murongo, iyo ni yo bari gutwara mbere, ni yo twari gutwara mbere, imishahara tugakupa, n’ibindi byose ariko twe nta na kimwe twigeze duhagarika kugeza rero aho avugiye ko yagiye mu nkiko. Iyo ibintu rero byagiye mu nkiko, umuntu abiharira inkiko. Twe ntabwo turi abacamanza, ntitwaba abakoresha kandi ngo tube n’abacamanza, ubwo natwe dutegereje ubwo butabera.

Icyakurikiyeho rero ni uko iyo umuntu yataye umurimo, amategeko y’u Rwanda afite icyo avuga, no mu mikorere amasezerano aba afite icyo avuga. Twe rero, nyuma twagaragaje ko umukozi wacu yataye akazi. Twamuhaye inzandiko inshuro eshatu, zimwibutsa ko agomba gusubira mu kazi, ntiyatubwira ko arwaye cyangwa izindi mpamvu, hanyuma twumva ibyo birego. Twanabyumvise ku rwandiko rwa gatatu, turavuga tuti ubanza ari na byo byatumye atagaruka ku kazi. Ni aho bigeze.

Nk’ubuyobozi dutegereje FIFA ari yo iyobora Ruhago ku Isi. Twese dukeka ko izararama ikavuga iti mwe mwarakosheje, cyangwa mwe ntimwakosheje ariko ni bya bindi bajya bavuga mu Kinyarwanda ngo ntawivuga amabi n’ameza. Twe rero niba umutoza wacu twaramufashe atagira n’urupapuro nk’uko n’andi makipe yaririmbaga ‘sans papier’, tukavuga tuti tubyimye amatwi kubera cya cyerekezo navugaga twamubonagamo.

Afite ubushobozi bwose ibyo ntawabihakana, yabatsinze koko nta n’impapuro afite, twatanze ‘minerval’, dutanga itike nka APR bitari no ku mushahara, ibyo biba bikwereka intumbero ikipe ifite, tukavuga tuti uwo muntu watweretse ko afite ubumenyi bwa kavukire, tumuhaye amahirwe akiga, tukanamwishyurira hari icyo yadukorera. Buriya yaradutereranye, yadutaye ku rugamba.

Twari tukimufite imyaka myinshi cyane, ni yo mpamvu twari twamuhaye imyaka ibiri, ariko ubundi ntibikunze kubaho, ariko kugira ngo atuze. Ntabwo rero waba wasinyishije umuntu muri Mata imyaka ibiri hanyuma ngo muri kwa kangahe mushwane uri umukoresha, keretse ari ugutera ibuye inyoni. Twari tumufite mu gitekerezo cy’igihe kirekire.

Erradi Adi Mohammed ntakiri umutoza wa APR FC nyuma yo kwanga kugaruka mu kazi

Bivuze ko mwatandukanye?

None umuntu yata akazi mukagumana na we kandi? Navuze ko twatanze inzandiko eshatu zimwibutsa ko agomba gusubira mu kazi, itariki 13 [Ugushyingo] yagomba kuba ari ku kazi ntiyaza, turenzaho ibyumweru bibiri twandika urundi rwandiko ntiyaza, urwa gatatu rwabaga ari urwo kumubwira ruti ko utaje, utarwaye, ukaba utatubwira impamvu, tukaba twumva uri mu mu manza ari byo bigufatira umwanya, fata umwanya rero witonze ugume muri ibyo.

Ben Moussa n’abo basigaranye bazaguma kuyobora umushinga APR FC yatangiranye na Adil cyangwa murashaka undi mutoza?

Oya, twe tubona [Ben Moussa] awurimo neza. Ni nk’uko uyu munsi, ndi Chairman ariko Etat Major ivuze ngo nakomeze akore ibindi nk’uko maze imikino ibanza yose mbirimo, ikipe ntihagarara. Habayeho kudakora neza mu musaruro byaba ari ikipe ntabwo byaba ari umuntu ku giti cye, APR ntabwo ishingiye ku muntu.

Twe rero twumva yarahisemo abatoza kandi tuba twararebye ibijyanye na bo, biri no hejuru rwose. [Adil] yahisemo Ben Moussa kubera ko yari afite ububasha bwisumbuye n’impapuro zisumbuye ku ze, aravuga ngo uyu ni we wanyungiriza, muzi ko mbere yari afite uwitwa Jameleddine ariko abona ko adafite ubwo bubasha (…). Twumva ko twakomezanya na we ariko aho twabona hari ikibura, ikipe ni ikintu gikora buri munsi ntabwo iguma aho iri, ashobora kutubwira ati ndabona byanze, ashobora kutubwira ati ndabona nihagije, ariko twe nk’ubuyobozi twumva twakomezanya n’ikipe Adil yasize, keretse bo ubwabo bahisemo gutyo.

Abafana mwakunze kubabwira ko abanyamahanga batazakandagira muri APR FC kuko bihabanye na politiki yanyu. Ni iki mwababwira?

Byose birashoboka nk’uko ubivuze, ntabwo ari ukubarema agatima, abakunzi ba APR bakurikirana ubuzima bwayo buri munsi, ariko mu byo APR ifite wenda andi makipe adafite, dufite abakunzi ba APR tukagira n’abafana.

Umufana mupfana ikibuga n’intsinzi yabonetse, iyo itabonetse, aba yiteguye kukwereka ko atishimye cyangwa intsinzi yaboneka akakwereka ko yishimye. Umukunzi mushobora kujyana muri iyo myaka cumi n’ingahe wavuze, akavuga ati wenda igihe ni igihe tuzabigeraho. Twe rero nk’ubuyobozi tugomba kuba turi hagati no hagati tukareba ikibereye izo mpande zombi.

Twe turavuga ngo muri politiki yacu nka APR, ntacyo tuzahindura mu Rwanda, tuzakomeza guha ububasha abana b’Abanyarwanda kugeza aho u Rwanda ruzerekanira ko rushoboye. Wenda u Rwanda ni na rushya, ariko mu ruhando rw’amateka y’umupira w’amaguru njya numva bavuga za Kiyovu zavutse muri kangahe, twe rero APR tuvutse ejo bundi muri mirongo icyenda na kabiri na gatatu mu Rugamba rwo Kwibohora, imyaka yacu wayibara, ariko turashaka kwereka Abanyarwanda ko ibyo bishoboka.

Icya kabiri rero, ku ruhando rw’Akarere cyangwa urundi tujya guhataniramo, ibyo ni byo rwose twatangiye gutekereza ko igihe cyose tuzashobora kubonera itike idutwara hanze, ntibizatubuza gushakamo amaraso yandi, umuntu umwe cyangwa babiri, tukajyana muri urwo rugamba rwo gushaka kure hashoboka, aho tugarukiye, wa mugani wa ya mvugo ngo ‘indege ntizima’, aho izajya izimira ubwo izajya izimana n’abanyamahanga bagende, tugaruke nk’Abanyarwanda.

Nitwongera tukayatsa ikagenda, twongere tubahe ‘lift’ cyangwa baduhe ‘lift’ ariko ni twe tubaha ‘lift’ kuko turi abakoresha. Tujyane muri urwo rugamba, aho duhagarariye bagende, tugaruke kuko twe mu Rwanda twumva politiki yo gukinisha abanyamahanga nka APR, iyo twarayisezereye. N’ubundi nka APR dukinisha Abanyarwanda kandi iyo myaka yose nta gikombe baradutwara niba nibuka neza, batwaye batwara kimwe, dukinira bibiri. Uretse umwaka umwe w’impfabusa, ngira ngo 2019, wa Zlatko [Krimpotic], ni wo tutatwaye igikombe na kimwe mu mateka y’imyaka 28, ariko indi myaka yose, twahushaga iki, tugafata iki.

Mu Rwanda rero turavuga tuti tuzakomeza guha abana b’Abanyarwanda ayo mahirwe, nitujya mu ruhando mpuzamahanga turebe cyane aho umutoza avuga ngo ntabonye uyu n’ubundi turagaruka. Ni uko tumushakishe, nitumubona tumuzane, akine hanze hanyuma dutandukane tugarutse.

Bivuze ko mu mwaka utaha w’imikino, APR FC nitwara igikombe igasohoka, abafana bazamwenyura nk’uko babyifuje?

Batangire barambagize, bitege, na bo bafite uruhare, wenda abafana bo, umufana we yakubwira ngo guhera ku mutetsi mumuzane ari umunyamahanga, umufana ni uburenganzira bwe. Ariko ku banzi ba APR bazi icyerekezo, hanyuma no ku mutoza sinamuvugira ngo mushake nimero icyenda [rutahizamu], ngo mushake nimero umunani, kuko ibyo ni iby’umutoza. Umutoza rero, umwanya yatubwira ngo uyu ni we ubura, twashakira aho.

Ku bakunzi ba APR, na bo nababwira nti bagabanye ibyifuzo ntibibe byinshi kuko ni byo navuze nti nidukora ishyano tuzafata umwe cyangwa babiri twongeremo ariko kuri urwo ruhando mpuzamahanga, aho tunaniriwe dutandukane ubwo, bajye gushakisha, hanyuma tugarukane Abanyarwanda kugira ngo tutica iyo politiki yo kuza gukinisha umunyamahanga mu Rwanda. Ayo mafaranga yaba ari ayo gupfusha ubusa, dushobora kuyatanga no mu bindi, za mituelle de santé n’ibindi.

Ni iki cyabagoye kwakira mu rugendo rwo gushaka kugera mu matsinda mu myaka itatu ishize?

Nk’Umuyobozi cyangwa uhagarariye ubuyobozi bw’Ikipe, nari nishimye birenze [ubwo APR FC yari iyoboye ku mikino ya RS Berkane na US Monastir muri Champions League] kandi si bwo bwa mbere kuko mu matsinda twigeze kugerayo ariko byari iby’icyo gihe. Ubu ho rero byari kurenza cyane kuko twashakaga gukuramo abantu ikintu cyo kwisuzugura. Abanyarwanda barashoboye. Ni ukuvuga rero ngo niba twarashoboye gutsinda icyo gitego Berkane nk’uko wabivugaga (…), ni nko gusitarira mu rugo. Icyo cyarambabaje birenze. Naho mbere tukiyoboye umukino twari twishimye birenze.

Uretse n’uwo mukino, n’uw’ejo bundi, ari na wo wavuyeho ibyo bibazo byose by’umutoza njye nafata nk’ipfunwe cyangwa nk’isoni, nta kuntu twari twatsinze i Huye, ikipe tuyirusha birengeje hanyuma twajya hariya tukabona umusaruro utandukanye n’ibyo kandi abakinnyi bakubwira ko babonaga bishoboka.

Gen Mubarakh Muganga yavuze ko mu mikino mpuzamahanga, APR FC izongeramo imbaraga z'abanyamahanga bitewe n'abo umutoza yagaragaje ko akeneye

APR FC itanga amafaranga menshi mu kwita ku bakinnyi; mubona ayo batangwaho n’umusaruro batanga bingana?

Njye sinjya numva ko gutanga ibituma abana bamera neza cyangwa Umunyarwanda uwo ari we wese amera neza bibatera ubugoryi. Byari bikwiye kubatera umurava kumva ko bakora. Ni nk’uko u Rwanda rwaciye nyakatsi, ariko umubyeyi wavukiye muri nyakatsi yavuga ngo ubu se ko twe twavukiye muri nyakatsi ntitwakuze? Urumva ni ibihe bibiri bitandukanye.

Twe rero ibyo dutanga ku bana b’Abanyarwanda muri APR ntabwo ari ibya Mirenge, nta n’ibyo twabona. Tubaha nk’ibyo duha abandi, ni nk’ibyo duha abasirikare, ariko abantu ba kera bashobora kuvuga ngo umusirikare wamuhaye ibyiza birenze wenda ni yo mpamvu biri bumutere kudakora neza kandi si ko bimeze.

Nkeka ko n’Ingabo zacu zikora neza cyane kuko ziba zabonye byose. N’umukinnyi wa APR kuvuga ngo ntitumutangeho byinshi, ajye gukodesha, arare hirya iyo, cyangwa asitare wenda kubera ko atabonye uburyo… Dufite n’umukinnyi mwiza cyane witwa Bonheur [Mugisha], yakomeretse ari kuri moto kandi icyo gihe yari akenewe cyane mu Mavubi. Iyo icyo gihe aza kuba afite akamodoka wenda ntiyari guhura n’ibyo bibazo. Numva tutabatangaho ibya Mirenge ahubwo ni rwo rwego rw’Abanyarwanda.

Nimuzareba icyerekezo cya Perezida wa Repubulika [Paul Kagame] ashyira bariya bantu mu midugudu, urebe Norvège, urebe hano Kinigi, urebe mu midugudu yose y’icyitegererezo, ni ukwereka Umunyarwanda, ruriya ni rwo rwego akwiriye kubamo. Nta mpamvu yo gufata nabi Umunyarwanda, ni yo mpamvu babaha Girinka.

Video: Byiringiro Ephter


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .