Akazi k’indyankurye gategereje Mashami Vincent wemejwe nk’umutoza mukuru w’Amavubi

Yanditswe na Manzi Rema Jules
Kuya 17 Kanama 2018 saa 11:37
Yasuwe :
0 0

Nyuma y’igihe abashakira abatoza ikipe y’igihugu y’umupira w’amaguru, Amavubi, bazenguruka mu banyamahanga nk’igisubizo ku musaruro ariko bikananirana, yahawe Umunyarwanda Mashami Vincent mu gihe cy’umwaka umwe ushobora kongerwa, umukino wa mbere akazacakirana na Côte d’Ivoire.

Kuva mu 2010 Amavubi amaze guhabwa abatoza 10 barimo batanu b’abanyaburayi ari nabo bagiye bagirirwa icyizere bakamaramo igihe kinini.

Abanyarwanda bake barimo Eric Nshimiyimana na Jimmy Mulisa babashije gutoza iyi kipe bagiye bayamburwa batamazeho n’umwaka umwe, mu gihe Gilbert Kanyankole we yirukanywe ataranatoza umukino n’umwe.

Kuba Abanyaburayi nka Milutin Sredojević wayitoje hagati ya 2011–2013, Johnny McKinstry wari uyifite hagati ya 2015–2016 n’Umudage Antoine Hey uheruka baragiye bamara umwaka cyangwa ukarenga, si umusaruro udasanzwe babaga batanze.

Buri wese yabaga avuga ko intego ari ugusubiza u Rwanda mu gikombe cya Afurika, CAN, ruherukamo mu 2004 ariko bigakomeza kuba inzozi, ndetse no kwegukana CECAFA birabananira.

Amavubi yari amaze amezi arindwi atagira umutoza nta n’imikino akina, ariko habura ibyumweru bitatu gusa ngo ahatane n’igihangange muri Afurika, Côte d’Ivoire, mu gushaka itike y’igikombe cya Afurika cya 2019, aba aribwo ahabwa umutoza Mashami Vincent.

Biteganyijwe ko uyu mutoza watoje amakipe arimo APR FC, Bugesera FC akaba yaragiye anungiriza mu Amavubi ku bwa Johnny McKinstry na Antoine Hey, yerekanwa kuri uyu wa Gatanu nyuma yo gusinya amasezerano y’umwaka umwe.

Mashami afashe ikipe y’igihugu iri ku mwanya wa nyuma mu itsinda H mu gushaka itike yo gukina igikombe cya Afurika mu 2019, itsinda ihuriyemo na Guinea na Repubulika ya Centrafrique zombi zifite amanota atatu, Côte d’Ivoire ikaba nta nota ifite.

Ku wa 9 Nzeri 2018 kuri Stade ya Kigali nibwo we n’abakinnyi azaba yahamagaye bidahindutse barimo rutahizamu Kagere Meddie wamaze kubona ubwenegihugu, bazahangana na Côte d’Ivoire ya Serge Aurier ukinira Tottenham, Eric Bailly wa Manchester United, Wilfried Zaha wa Crystal Palace n’abandi bakomeye i Burayi.

Ni akazi katoroshye kuko Côte d’Ivoire izaba ishaka amanota yayo ya mbere mu itsinda nyuma yo gutsindwa umukino wa mbere na Guinea 3-2.

Mashami wagiye atoza amakipe y’igihugu mu byiciro binyuranye, we hamwe n’abandi batoza 11 bo mu gihugu, mu mwaka ushize nibwo yahawe impamyabumenyi yo mu rwego rwa A mu butoza, itangwa n’ishyirahamwe ry’umupira w’amaguru muri Afurika, CAF.

Mashami Vincent abaye umutoza wa 10 uhawe Amavubi mu gihe cy'imyaka umunani gusa
Mashami yagiye atoza ikipe y'igihugu nk'umutoza wungirije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza