00:00:00 IGIHE NETWORK KN KINYARWANDA EN ENGLISH FR FRANCAIS

Abitwaje intwaro binjiye mu rugo rwa Aubameyang baramucucura

Yanditswe na Iradukunda Olivier
Kuya 30 August 2022 saa 10:55
Yasuwe :

Rutahizamu wa FC Barcelona, Pierre-Emerick Aubameyang yatewe n’abajura mu rugo rwe ruherereye mu nkengero z’Umujyi wa Barcelona baramucucura.

Ibiro ntaramakuru by’i Catalonia byatangaje ko ibi byabaye kuwa Mbere tariki 29 Kanama 2022.

Uyu mukinnyi ngo yatewe n’abitwaje intwaro, babanje kwifashisha uburyo bwo gukanga abatuye mu nzu ye na we arimo.

Ati “Icyo twakwemeza ni uko uyu mukinnyi yibwe, ndetse akibwa n’abitwaje intwaro kuko abatuye iwe no hafi yaho nibo batanze ayo makuru. Amakuru dufite ni uko ubugizi bwa nabi bwabereye mu gace ka Castelldefels, gaherereye mu nkengero za Barcelona, saa saba z’ijoro.”

Ikipe ya FC Barcelona yo ivuga ko ibizi ko uyu mukinnyi yibwe ariko ubuzima bwe bukaba bumeze neza.

Yatangaje ko ubwo ubu bujura bwabaga yari yatashye ameze neza nyuma y’umukino ikipe ya Barcelona yari imaze gutsinda Real Valladolid ibitego 4-0. Nta n’imyitozo yari gukora uwo munsi.

Abagizi ba nabi bakimara kwinjira mu gipangu basabye Aubameyang kubahereza agasanduku abikamo ibintu bye by’agaciro. Nyuma yo gukuramo imikufi yose yarimo bahise bagenda.

Abashinzwe umutekano muri iki gihugu bavuga ko nta byinshi bagomba gutangaza kuri iki kirego, gusa ukekwa bamufite.

Uyu mukinnyi yakorewe ubugizi bwa nabi mu gihe bivugwa ko ari kwitegura urugendo rwerekeza mu Bwongereza kuvugana n’ikipe ya Chelsea, ishaka ko yayikinira mu mwaka w’imikino wa 2022-2023.

Ubu bujura ku bakinnyi bwaherukaga kuba mu 2020, ubwo umukinnyi wa Tottenham Hotspur, Dele Ali yaterwaga mu rugo iwe aho yari atuye mu majyaruguru y’Umujyi wa Londres.

Muri uwo mwaka kandi Jan Vertonghen na we yambuwe afatiweho icyuma aho ikipe yari yagiye mu mikino ya UEFA Champions League.

Mu 2019 undi mugizi wa nabi yafunzwe azira kwiba amasaha y’abari abakinnyi ba Arsenal barimo Mesut Özil na Sead Kolašinac, bagituye mu Mujyi wa Londres.

Pierre-Emerick Aubameyang yatewe iwe n'abagizi ba nabi baramwiba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .