00:00:00 IGIHE NETWORK KN KINYARWANDA EN ENGLISH FR FRANCAIS

Abafana ba APR FC bakubiswe ‘n’Abuzukuru ba Shitani’ (Amafoto)

Yanditswe na Ntare Julius
Kuya 23 Ukuboza 2022 saa 07:38
Yasuwe :

Abafana ba APR FC bakubitiwe kuri Stade Umuganda nyuma y’umukino w’Umunsi wa 15 wa Shampiyona iyi Kipe y’Ingabo yanganyijemo na Etincelles FC igitego 1-1 ku wa Kane, tariki 22 Ukuboza 2022.

Itsinda rizwi i Rubavu ku izina “ry’Abuzukuru ba Shitani” ni ryo ryasakiranye n’aba bafana maze ribamishamo amabuye n’ingumi birangira babiri bakomeretse barara mu Bitaro bya Gisenyi.

Hari nyuma y’umukino ubwo bamwe mu bafana ba APR FC bagize amatsinda ya The Warriors na Kicukiro Fan Club basohokaga muri Stade Umuganda bagiye kwinjira mu modoka ngo batahe, aba babanje kugura amagi iruhande rw’imodoka bari bugende barya mu nzira.

Ubwo bamwe mu basore bagize Itsinda ry’Abuzukuru ba Shitani bageraga ku modoka, bashikuje telefoni y’uwitwa Aimée usanzwe ubarizwa muri "The Warriors" wari wicaye ku idirishya ry’imwe mu modoka yari itwaye aba bafana. Uyu yatatse ko bamwibiye telefoni maze Mwema Uwamungu Prince babana muri iryo tsinda, wari ukiri hanze yitegura kwinjira, yabonye uwayimushikuje amubwira ko agomba kuyisubiza nyirayo na we arabyanga.

Mu gihe bateranaga amagambo, ni ko abandi bagize Itsinda ry’Abuzukuru ba Shitani basatiriye Mwema, uwari washikuje telefoni abonye ko bamwotsa igitutu ngo ayitange yahise ayihereza mugenzi we gusa Mwema aba yamuteye imboni kare ahita ayimwaka ari naho imirwano yahise itangirira.

Abuzukuru ba Shitani bari bamaze kuba benshi kuri Mwema havuyemo umwe wari umaze kuzuzwa umujinya n’ibyari bimaze kuba kuri mugenzi we maze amutera ingumi ku munwa iruhande rw’ibumoso, ari na ko abandi batangiraga gutera amabuye.

Mu gihe gushyamirana byari bimaze gufata indi ntera, abafana bari aho batangiye kwiruka bagana mu modoka, mu birukankaga harimo Mwema wari ugeze ku modoka, ahindukiye asanga Abuzukuru ba Shitani basigaranye mugenzi we Nyirimbabazi Japhet wo mu Itsinda rya "Kicukiro Fan Club" bari kumuhondagura ingumi n’imigeri.

Mwema yasubiye gukiza Nyirimbabazi, amugezeho amukurura ukuboko ngo bajye mu modoka, amabuye yari amaze kuba menshi yatumye abashoferi bahungisha imodoka zabo ngo batazimena ibirahuri.

Aba babiri babuze aho bagana, imodoka bahungiragamo zigiye bakomeza gikubitwa "n’Abuzukuru ba Shitani" kugeza abaturage bari biganjemo abafana ba Etincelles FC batabaye, izi nsoresore zikwira imishwaro.

Mu bahise baza gutabara Mwema na Nyirimbabazi harimo bamwe mu bafana ba APR FC bazwi ku mazina ya Nyiragasazi, Gacuma na Canga Irangi na bo bakubiswe byoroheje “n’Abuzukuru ba Shitani”. Hashimwe cyane umufana wa Rayon Sports uzwi cyane mu Mujyi wa Rubavu ku izina rya Jean Paul wabagezeho batarakomereka.

Nyuma y’uko “Abuzukuru ba Shitani” baburiwe irengero, indembe zigasigara mu biganza by’abazitabaye, aha ni ho haziye Perezida wa Etincelles FC, Ndagijimana Enock, afasha abakomeretse kujyanwa kwa muganga ku Bitaro bya Gisenyi bitabwaho ndetse bakaba bari butahe mu gitondo cyo kuri uyu wa Gatanu, tariki 23 Ukuboza 2022, nk’uko umwe mu barwaza babo yabitangarije IGIHE.

Nyirimbabazi Japhet yakomeretse ku kiganza cy’iburyo ndetse akigera kwa muganga bahise bahadoda, yakomeretse kandi hejuru y’ugutwi kw’ibumoso ndetse no ku kuboko kw’ibumoso aho yakomeretse byoroheje.

Mwema Uwamungu Prince we bamudoze ku nkokora y’ukuboko kw’ibumoso ndetse baranahapfuka. Yakomeretse kandi ku munwa aho bamuteye ingumi ndetse yari afite n’udusebe duto ku ijosi kubera gusharaturwa “n’Abuzukuru na Shitani”.

Abuzukuru ba Shitani ni agatsiko kagizwe n’urubyiruko rw’insoresore kuva ku myaka y’ubugimbi kugeza ku bafite muri 30, bahuriye ku gukora ibikorwa by’ubujura ariko bukomatanyije n’ubugizi bwa nabi.

Tariki 21 Ukuboza 2021, Polisi ikorera mu Karere ka Rubavu yarashe Niyonsenga wiyitaga DPC w’Abuzukuru ba Shitani avuye kwiba televiziyo, ibi byatumye ibikorwa by’iri tsinda bigabanuka gusa nyuma byaje kwiyongera.

Ni itsinda rihangayikishije abaturage b’i Rubavu kuko ribagirira nabi rikanabambura utwabo.

Mwema Uwamungu Prince wo muri The Warriors usanzwe uzi ho kuvuza ingoma cyane yahondaguwe n'Abuzukuru ba Shitani
Yatabawe na bagenzi be nyuma y'uko Abuzukuru ba Shitani bari bamaze gukwira imishwaro
Yari akeneye ubutabazi kuko atashoboraga no kwigenza
Nyirimbabazi Japheth wo mu Itsinda ry'abafana rya Kicukiro yatabawe na Mwema Uwamungu Prince wahindukiye asanga Abuzukuru ba Shitani baramuhondagura
Yakomeretse ku nsina y'ugutwi kw'ibumoso
Hajeho igisebe cyatewe n'ibuye yatewe n'Abuzukuru ba Shitani
Yari afite imbaraga nke nyuma yo kurwana n'itsinda ry'insoresore ry'Abuzukuru ba Shitani
Yanakomeretse ku kiganza cy'iburyo
Yatakaga cyane asaba ubutabazi
Mwema Uwamungu Prince yageze aho aryama hasi kuko imbaraga zo kwicara zari zamushiranye
Hatanzwe ubutabazi bwihuse
Abafana bakomeje kwita kuri mugenzi wabo mu gihe bari bategereje imodoka yamujyana kwa muganga
Umwe mu nshuti za Uwamungu amubaza uko amerewe
Abafana ba APR FC barimo Nyiragasazi nabo bakubiswe batabarwa n'umufana wa Rayon Sports batarakomereka
Perezida wa Etincelles FC, Ndagijimana Enock, yifashishije imodoka ye mu gutabara
Uwamungu yateruwe na bagenzi be yinjizwa mu modoka ya Perezida wa Etincelles FC
Nyirimbabazi Japhet wababaraga cyane umutwe bateyeho ibuye yicaranye na Perezida wa Etincelles FC wari ugiye kumuha ubutabazi
Perezida wa Etincelles FC, Ndagijimana Enock, asaba abantu bari benshi kumuvira mu nzira akajyana abakomeretse kwa muganga
Nyirimbabazi Japhet yagiye yicaye imbere, Mwema Uwamungu Prince yicara inyuma bombi bajyana na bamwe mu nshuti zabo bakomeje no kubarwaza ku Bitaro bya Gisenyi
Imodoka ya Perezida wa Etincelles FC ijyanye abarwayi
Abafana ba APR FC bavuye i Kigali bagiye gushyigikira ikipe yabo ntibumvaga ibimaze kubabaho
Uko abakubiswe bari bamerewe muri iri joro aho bari mu Bitaro bya Gisenyi. Uyu ni Japhet wapfutswe ikiganza
Mwema Prince yapfutswe ku nkokora

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .