Abasifuzi babiri b’Abanyarwanda, Didier Gaga na Ruhamiriza Jean Sauveur bashyizwe mu bazayobora imikino ya BAL 2024 iteganyijwe gutangira tariki 9 Werurwe 2024, hakinwa Kalahari Conference muri Afurika y’Epfo.
Didier Gaga ari mu basifuzi 10 bazayobora imikino ya Kalahari Conference izatangira gukinwa tariki 9 kugeza 17 Werurwe 2024 i Pretoria muri Afurika y’Epfo.
Iri tsinda rigizwe n’amakipe arimo Cape Town Tigers (Afurika y’Epfo), FUS Rabat (Maroc), Petro de Luanda (Angola) na Dynamo BBC (Burundi).
Ni mu gihe, Ruhamiriza Jean Sauveur we azasifura muri Nile Conference izakinirwa mu Misiri hagati ya tariki 19 kugeza 27 Mata 2024.
Iri tsinda rizakinwa n’amakipe arimo Al Ahly (Misiri), Al Ahly Benghazi (Libya), Bangui SC (Centrafrique) na City Oilers (Uganda).
Si ku nshuro ya mbere aba basifuzi bagiye kuyobora iyi mikino kuko basanzwe ari mpuzamahanga bibahesha gusifura amarushanwa menshi arimo BAL, Igikombe cya Afurika n’andi menshi.
