Bigoranye cyane, Cape Town Tigers yo muri Afurika y’Epfo yasezereye FUS Rabat yo muri Maroc yahabwaga amahirwe, iyitsinze amanota 91-88, igera muri 1/2 cy’Imikino ya nyuma ya BAL 2024 iri kubera muri BK Arena.

Uyu mukino watangiye wegeranye cyane mu manota, Aliou Diarra na Samkelo Cele bigaragaza ku mpande zombi. Agace ka mbere karangiye FUS Rabat iyoboye umukino n’amanota 17 kuri 15 ya Cape Town Tigers.

Mu gace ka kabiri, Tigers itahabwaga amahirwe yakomeje kwihagararaho Cele na Dhieu Abok Dieng bakomeza kuyitsindira amanota.

Ku rundi ruhande, FUS Rabat ntabwo yari mu bihe byayo cyane ko yarwanaga no kuva inyuma.

Igice cya Mbere cyarangiye Cape Town Tigers iyoboye umukino n’amanota 44 kuri 41 ya FUS Rabat.

Iyi kipe yo muri Maroc yasubiye mu gace ka gatatu yiminjiriyemo agafu, Kendrick Brown na Mohammed Anas Zeghloul bayifasha gukuramo ikinyuranyo no kuyobora umukino.

Tigers yari mu mukino bikomeye yongeye kuwiharira mu minota ya nyuma, isoza agace ka gatatu ikiyoboye n’amanota 63 kuri 59 ya FUS Rabat.

Ku munota wa gatandatu w’agace ka nyuma, Dhieu Abok Deng umwe mu bo Cape Town Tigers igenderaho yagize imvune akurwa mu kibuga ari ku ngobyi.

Tigers yakomeje gukinana ishyaka ubona ifite umukino ariko iyi kipe yo muri Maroc igaragaza ak’inda ya bukuru mu minota ya nyuma.

Amanota atatu yo ku isegonda rya nyuma yatsinzwe na Cele yatumye amakipe yombi anganya amanota 83-83 bityo hashyirwaho iminota itanu y’inyongera.

Muri iyi minota amakipe yasimburanaga mu kuyobora umukino ari nako yasunikwaga bikomeye n’abafana benshi bari muri BK Arena ari nako bafanaga bikomeye.

Umukino warangiye, Cape Town Tigers yatsinze FUS Rabat yahabwaga amahirwe iyitsinze amanota 91-88, igera muri 1/2 cy’Imikino ya nyuma ya BAL 2024 ku nshuro ya mbere mu mateka.

Iyi kipe izahura n’izava hagati ya Petro de Luanda na AS Douanes zizisobanura ku wa Mbere saa 20:00, mu mukino uzakurikira uwa US Monastir na Rivers Hoopers uteganyijwe saa 17:00.

Abakinnyi ba Cape Town Tigers bishimira intsinzi ikomeye babonye
Byari ibyishimo ku bakinnyi ba Tigers
Abafana ba FUS Rabat ntako batagize ariko byanze
Samkelo Cele wigaragaje cyane muri uyu mukino, ashimirwa na bagenzi be
Chriss Eazy yahagurukije abafana bari muri BK Arena
Umuhanzi Chriss Eazy yishimiwe bikomeye
Devanate Jordan agerageza gutsinda amanota atatu
Chriss Eazy yageze kuri Bana yafatanyije na Shaffy bihindura isura

Amafoto: Nezerwa Salomon

Banner 1

Inkuru Ziheruka