Kuri iki Cyumweru, tariki 12 Gicurasi 2024 Ikipe y’Ingabo irakina umukino usoza iya Sahara Conference, aho ikina na AS Douanes yo muri Sénégal.
APR BBC isabwa intsinzi byanze bikunze kugira ngo yizere kubona itike y’imikino ya nyuma izabera i Kigali tariki 24 Gicurasi kugeza kuya 1 Kamena 2024.
Ikipe y’Ingabo irakina idafite Adonis Filer wagize imvune ikomeye mu mukino batsinzwemo na River Hoopers amanota 78-71 ku wa Gatandatu, ndetse na Noel Obadiah ushidikanywaho.
Muri rusange, uyu mukino urakomeye cyane kuko AS Douanes iraba iri imbere y’abafana kandi nayo ntabwo irizera kubona itike. Ikindi irajya mu kibuga itifuza gusubirwa na APR BBC yayitsinze mu mukino ubanza.
Ubwo umukino wo ku wa Gatandatu, wari urangiye, agahinda niko kagaragara mu maso y’abakinnyi n’abatoza ba APR BBC cyane ko gutsindwa na Rivers byagabanyije amahirwe yo kubona itike y’imikino ya nyuma.
Mu gushaka kumenya impumeko iyi kipe yaramukanye kuri iki Cyumweru n’umwuka biteguranye uyu mukino w’ishiraniro, IGIHE yaganiriye n’Umunyamakuru wa B&B FM Kigali, Nsengiyumva Sidick uri kumwe nayo i Dakar.
Abajijwe amakuru mashya ku mvune ya Adonis na Noel, Nsengiyumva yavuze ko Noel ashidikanywaho, mu gihe Adonis we irushanwa ryarangiye.
Yagize ati “Adonis yagize imvune ikomeye y’umunsi wo ku gatsinsino yanyuze mu cyuma ndetse biteganyijwe ko abagirwa i Dakar. Biragaragara ko umwaka we warangiye. Noel we yababaye mu mikaya, abaganga bari kumwitaho hari amahirwe make y’uko ashobora gukina.”
Muri iri tsinda ryiswe Sahara Conference, Rivers Hoopers yamaze kubona itike y’imikino ya nyuma, APR BBC iri ku mwanya wa kabiri aho inganya intsinzi ebyiri na US Monastir na AS Douanes ya nyuma gusa aya makipe atandukanywa n’ibitego azigamye.
Bivuze ko muri aya makipe nta n’imwe irizera gukurikira Rivers. Iyi mikino ya nyuma irakomeye cyane kuko Ikipe y’Ingabo isabwa gutsinda AS Douanes mu mukino uteganyijwe saa 19:30 bityo ntitegereze ibiva mu wundi mukino.
Uyu mukino urahuza US Monastir na Rivers Hoopers yo yamaze kubona itike bituma iyi kipe yo muri Tunisia ihabwa amahirwe imbere ya y’iyo muri Nigeria itagifite icyo iharanira.
Mu gihe, APR BBC yatsindwa, US Monastir igatsinda Rivers Hoopers, Ikipe y’Ingabo yasezererwa ikaba iya mbere yo mu Rwanda inaniwe kugera i Kigali mu mikino ya nyuma kuva BAL yatangira gukinwa mu 2021.
