FUS Rabat yo muri Maroc yatsinze Al Ahly yo mu Misiri amanota 89-78 mu mukino wa kabiri w’iya nyuma ya BAL 2024 ishimangira ko ari imwe mu makipe yo kwitega.

Uyu mukino wa kabiri w’umunsi, watangiye Madame Jeannette Kagame nawe yageze muri BK Arena, mu gihe Perezida Paul Kagame we yakurikiye n’umukino wa mbere Al Ahly yo muri Libya yatsinze Cape Town Tigers yo muri Afurika y’Epfo amanota 87-76.

Mbere y’uy’umukino kandi nibwo hafunguwe ku mugaragaro iya nyuma y’uyu mwaka aho Itorero Inganzo Ngari ziyerekanye mu mbyino gakondo za buri gihugu aya makipe aturukamo.

FUS Rabat yatangiye umukino neza ibifashijwemo na Aliou Diarra na Kendrick Brown.

Agace ka mbere karangiye iyi kipe yo muri Maroc iyoboye umukino n’amanota 22 kuri 19 ya Al Ahly.

Agace ka kabiri umukino warushijeho kuryoha cyane ko amakipe yombi yari yamaze kuwinjiramo ari nako ikinyuranyo cyari gito cyane kuko kitarengaga amanota atanu.

Aka gace kandi, Al Ahly yagakinnye neza Patrick Gardner na Mark Steven Lyons bayitsindira amanota menshi binayifasha kwigaranzura FUS Rabat, igice cya mbere kirangira iyoboye umukino n’amanota 49 kuri 41.

Mu karuhuko, umuhanzi Adekunle Gold yataramiye abitabiriye uyu mukino mu ndirimbo ze zakunzwe cyane yaririmbanaga n’abafana bari buzuye BK Arena.

Iyi kipe yo mu Misiri yakomeje gukina neza no mu gace ka gatatu, Lyons na Tony Mitchell bayitsindira amanota menshi. Agace ka gatatu karangiye iyi kipe ikiyoboye umukino n’amanota 64 kuri 58.

Mu minota ibiri y’agace ka nyuma, FUS Rabat yahise ikuramo ikinyuranyo, amakipe yombi anganya amanota 64-64.

Aka gace kari injyanamuntu gusa FUS yagenda imbere cyane ko Devanate Jordan, Kendrick Brown na Aliou Diarra bayitsindiraga amanota menshi ari nako ikomeza kongera ikinyuranyo no kwizera intsinzi.

Umukino warangiye FUS Rabat yatsinze Al Ahly amanota 89-78 itanga ubutumwa bwo kuba ari imwe mu makipe yo guhangwa amaso muri iyi mikino, cyane ko aya ari amwe mu yahabwa amahirwe yo kwegukana irushanwa.

Iyi mikino izakomeza ku Cyumweru, tariki ya 25 Gicurasi, aho Petro de Luanda izakina na US Monastir saa Munani n’Igice, mu gihe Rivers Hoopers izisobanura na AS Douanes saa Kumi n’Imwe n’Igice.

Mu mukino wa kabiri, Perezida Kagame yamanutse yicara mu bafana
Perezida Kagame yaganiraga na Amadou Gallo Fall uyobora BAL
Miss Ishimwe Naomie ni umwe mu bitabiriye iyi mikino
Devanate Jordan ni umwe mu bakinnyi bitwaye neza muri uyu mukino
Umuhanzi Adekunle Gold yataramye mu karuhuko k'igice cya mbere
Umuhanzi Adekunle yishimiwe cyane
Aliou Diarra ni umwe mu bagoye Al Ahly cyane
Wari umukino w'imbaraga

Amafoto: Nezerwa Salomon na Yuhi Irakiza Augustin

Banner 1

Inkuru Ziheruka