AS Douanes yatsinze Rivers Hoopers amanota 63-57 mu mukino usoza iyo gutondeka amakipe muri BAL 2024 ikomeje kubera muri BK Arena.
Uyu mukino wabaye ku wa Gatanu, tariki 25 Gicurasi 2024. Witabiriwe na Perezida Paul Kagame wari kumwe n’umukobwa we Ange Kagame ndetse n’abuzukuru.
AS Douanes yatangiranye umukino imbaraga, Abdoulaye Harouna atsinda amanota menshi. Agace ka mbere karangiye iyi kipe yo muri Sénégal iyoboye umukino n’amanota 19-9.
Iyi kipe yo muri Sénégal yakomeje gukina (…)

AS Douanes yatsinze Rivers Hoopers amanota 63-57 mu mukino usoza iyo gutondeka amakipe muri BAL 2024 ikomeje kubera muri BK Arena.

Uyu mukino wabaye ku wa Gatanu, tariki 25 Gicurasi 2024. Witabiriwe na Perezida Paul Kagame wari kumwe n’umukobwa we Ange Kagame ndetse n’abuzukuru.

AS Douanes yatangiranye umukino imbaraga, Abdoulaye Harouna atsinda amanota menshi. Agace ka mbere karangiye iyi kipe yo muri Sénégal iyoboye umukino n’amanota 19-9.

Iyi kipe yo muri Sénégal yakomeje gukina neza no mu gace ka kabiri cyane ko abakinnyi bose babashaga gutsinda bitandukanye n’iyo bari bahanganye.

Abakinnyi nka Devine Eke na William Perry umukino wari wabagoye cyane byatumaga Rivers Hoopers itabona amanota menshi. Si ibyo gusa kuko iyi kipe yo muri Nigeria yanatakazaga imipira myinshi cyane (turnovers).

Igice cya mbere cyarangiye, AS Douanes iyoboye umukino n’amanota 37 kuri 23 ya Rivers Hoopers.

Mu karuhuko, umuhanzi Kenny Sol niwe wataramiye abitabiriye uyu mukino aho yaririmbanaga n’abafana nyinshi mu ndirimbo yaririmbye cyane ko yishimiwe bikomeye.

Mu gace ka gatatu, iyi kipe yo muri Sénégal yakomeje gukina neza ari nako Madut Akec na Harouna bayitsindiraga amanota bityo ikinyuranyo kigera mu manota 23.

Agace ka gatatu karangiye AS Douanes ikiyoboye umukino n’amanota 50 kuri 28 ya Rivers Hoopers.

Mu gace ka nyuma, iyi kipe yo muri Nigeria yagerageje kwiminjiramo agafu igerageza kugabanya ikinyuranyo ariko iminota yari yayijyanye. Umukino warangiye AS Douanes yatsinze Rivers Hoopers amanota 63-57.

Ku Cyumweru, tariki 26 Gicurasi 2024 haratangira gukinwa imikino ya ¼ aho ikipe itsindwa izasezererwa.

Al Ahly yo mu Misiri izakina na Al Ahly yo muri Libya saa Munani n’Igice, mu gihe FUS Rabat yo muri Maroc izisobanura na Cape Town Tigers yo muri Afurika y’Epfo saa Kumi n’imwe n’igice.

Iyi mikino izakomeza ku wa Mbere, tariki 27 Gicurasi 2024, aho US Monastir izakina na Rivers Hoopers saa Kumi n’imwe, mu gihe Petro de Luanda izakina na AS Douanes saa Mbiri z’ijoro.

Perezida Kagame yari kumwe n'umuryango
Perezida Kagame ni umwe mu bakurikiye umukino wa AS Douanes na Rivers Hoopers
Kenny Sol yishimiwe cyane
Kenny Sol niwe muhanzi wataramiye abitabiriye uyu mukino
Ibyamamare bitandukanye birimo Kenny Sol, Perezida wa UGB, Cyusa Jean Luc, Coach Gaël n'abandi bari mu bakurikiye uyu mukino
Abdoulaye Harouna yagiye Rivers Hoopers cyane
Alkaly Ndour agerageza gukina na bagenzi be
BK Arena yari yongeye kuzura cyane ko amatike yashize mbere y'umukino
Abafana bari benshi muri BK Arena
Aba basore bafanaga bikomeye

Amafoto: Nezerwa Salomon

Banner 1

Inkuru Ziheruka