Al Ahly Benghazi yasezereye Al Ahly yo mu Misiri iyitsinze amanota 86-77 mu mukino wa ¼ mu ya nyuma ya Basketball Africa League ikomeje kubera muri BK Arena.

Uyu mukino wa mbere wa ¼ wabaye ku Cyumweru, tariki 26 Gicurasi 2024 wari umwe mu yitezwe cyane ko wahuzaga ikipe ifite igikombe giheruka n’indi nshya ariko yagaragaje imbaraga zikomeye.

Ni mukino watangiye wegeranye amakipe yombi yigana nk’uko byari byitezwe. Agace ka Mbere karangiye Al Ahly yo muri Libya iyoboye umukino n’amanota 15 kuri 14 ya Al Ahly yo mu Misiri.

Mu gace ka kabiri, umukino washyushye amakipe yombi atangira gutsinda amanota menshi.

Abarimo Patrick Gardner na Ehab Amin bigaragazaga ku ruhande rwa Al Ahly yo mu Misiri, mu gihe ahandi bari Lual Acuil na Robert Golden.

Igice cya mbere cyarangiye Al Ahly yo muri Libya iyoboye umukino n’amanota 38 kuri 36 ya Al Ahly yo mu Misiri.

Muri aka karuhuko, umuhanzi Alyn Sano yataramiye abitabiriye umukino aho yaririmbye nyinshi mu ndirimbo ze zakunzwe nka Hono, Say Less, Biryoha bisangiwe n’izindi.

Iyi kipe yo muri Libya yakomereje aho yasoreje igice cya mbere kuko mu minota ibiri y’agace ka gatatu gusa yari imaze kongera ikinyuranyo cyageze mu manota 12.

Majok Deng na Acuil bakomeje gufasha iyi kipe kongera ikinyuranyo, agace ka gatatu karangira iyi kipe yo muri Libya ikiyoboye umukino n’amanota 55 kuri 49.

Mu gace ka nyuma ntacyo iyi kipe yo mu Misiri yahinduye, ahubwo iyo muri Libya yakomeje kongera ikinyuranyo ibifashijwemo na Robert Golden, Majok Deng na Lual Acuil.

Umukino warangiye Al Ahly yo muri Libya yatsinze Al Ahly yo mu Misiri amanota 86-77 igera muri ½ cya BAL yitabiriye ku nshuro ya mbere.

Iyi kipe izahura n’izava hagati ya US Monastir na Rivers Hoopers zizisobanura ku wa Mbere.

Undi mukino wa ¼ urahuza FUS Rabat yo muri Maroc na Cape Town Tigers yo muri Afurika y’Epfo saa 17:30.

Omar Tarek ashaka aho atanga umupira
Ehab Amin ni umwe mu bakinnyi beza ba Al Ahly SC
Wari umukino urimo ishyaka ryinshi
Tony Rasean Mtchell Jr agerageza gutsinda amanota atatu
Solo Diabate agerageza gutsinda amanota atatu
Abanya-Libya bari babucyereye bagiye gufana ikipe yabo
Igikombe gihabwa ikipe yegukanye BAL cyagejejwe mu Rwanda kuri iki Cyumweru
Wari umukino uryoheye ijisho
Abakinnyi ba Al Ahly yo muri Libya bishimira intsinzi ikomeye

Amafoto: Nezerwa Salomon

Banner 1

Inkuru Ziheruka