Ni imikino yatangiye kubera muri BK Arena kuri uyu wa Gatanu tariki 24 Gicurasi 2024, igamije kumenya uko amakipe akurikiranye mbere yo gukora tombora ya ¼ ari na bwo amakipe azatangira gukina akuranwamo.

Al Ahly yatangiye umukino neza itsinda amanota icyenda Cape Town Tigers itarabona na rimwe.

Uko iminota yazamukaga niko Cape Town yatangiye kwinjira mu mukino Dhieu Abok Deng ayitsindira amanota menshi.

Agace ka Mbere karangiye iyi kipe yo muri Afurika y’Epfo iyoboye umukino n’amanota 25-21.

Mu gace ka kabiri, Al Ahly yagatangiranye imbaraga zikomeye abarimo Kevin Marquis Murphy na Robert Golden bayitsindira amanota menshi.

Igice cya mbere cyarangiye Al Ahly yigaranzuye Cape Town Tigers iyitsinda amanota 47 kuri 41.

Mu karuhuko k’iki gice umuhanzi Juno Kizigenza niwe wabimburiye abandi mu gutarama muri iri rushanwa.

Indirimbo yaririmbye zirimo Peace of Mind yasubiranyemo na Shemi bari kumwe ku rubyiniro, Kurura yakoranye na Bushali, Igitangaza yafatanyije na Bruce Melodie na Kenny Sol ndetse na Yaraje yitiriye Album aheruka gushyira hanze.

Mu gace ka gatatu, iyi kipe yo muri Libya yagaragaje ak’inda ya bukuru by’umwihariko ibifashijwemo no gutsindirwa n’abakinnyi benshi.

Ni mu gihe iyo muri Afurika y’Epfo yagenderaga kuri Dhieu Abok Deng cyane bityo gutsinda amanota menshi bikayigora.

Aka gace karangiye, Al Ahly ikomeje kuyobora umukino n’amanota 72 kuri 58 ya Cape Town Tigers.

Mu ntangiriro z’agace ka nyuma, Al Ahly yatsinze amanota menshi ariko kageze hagati itangira kwirara byatumye Cape Town izamura icyizere.

Iyi kipe yo muri Afurika y’Epfo yagerageje kugabanya ikinyuranyo ariko ntibyagira icyo bihindura.

Umukino warangiye Al Ahly yatsinze Cape Town Tigers amanota 87-76.

Umukino wa kabiri uteganyijwe saa 20:00 ukaba urahuza Al Ahly yo mu Misiri na FUS Rabat yo muri Maroc.

Nyuma y’iyi mikino hazatondekwa uko amakipe akurikiranye ari nabwo hazamenyekana uko agomba kuzahura muri ¼, azakina akuranwamo kugeza ku mukino wa nyuma hamenyekanye iyegukana igikombe cy’uyu mwaka igasimbura Al Ahly yo mu Misiri cyangwa ikacyisubiza.

Perezida Paul Kagame yakurikiye uyu mukino ari kumwe na Minisitiri wa Siporo, Munyangaju Aurore Mimosa
Uyu mukino witabiriwe n'ingeri zose
Solo Diabate azamukana umupira
Abafana bari benshi muri BK Arena ahatangiye kubera imikino ya nyuma ya BAL 2024
Juno Kizigenza yabimburiye abandi mu gutarama muri iri rushanwa
Cartier Ducali Diarra agerageza gutsinda amanota abiri
Dhieu Abok Deng yafashije Cape Twon Tigers cyane
Abafana bari benshi muri BK Arena
Abafana bamenyerewe mu Rwanda bari babucyereye

Amafoto: Nezerwa Salomon na Yuhi Irakiza Augustin

Banner 1

Inkuru Ziheruka