Iki kibuga cya Basketball kigabanyijemo bibiri, cyubatswe na KEFA Sports Ltd ikunda kubaka ibibuga byinshi by’uyu mukino mu gihugu ndetse cyitezweho guteza imbere no kuzamura impano z’abakunda umukino wa Basketball muri iri shuri nk’uko byagarutsweho mu muhango wo kugitaha ku mugaragaro.

Minisitiri Munyangaju Aurore Mimosa yashimiye Umuryango Giants of Africa ku ruhare wagize ngo iki kibuga cyubakwe, asaba abana kuzakibyaza umusaruro, na bo bakaba ibihangange muri Basketball.

Ati “Kuba bubatse iki kibuga mu Agahozo-Shalom, mu bibuga umunani bihari, kuri twe ni byiza, kuri Guverinoma ni byiza no ku bakinnyi. Bivuze ko niba dushaka gutera impano mu mukino wa Basketball, tugomba kuba dufite ibibuga bigezweho kandi bifite ubuziranenge.”

Umuyobozi wa Giants of Africa, Masai Ujiri, yavuze ko bazakomeza gukora ibishoboka kugira ngo umukino wa Basketball utere imbere mu bihugu binyuranye byo kuri uyu mugabane.

Ati “Ibi biranshimisha, bishimisha buri wese kubona Giants of Africa igera ku mugabane wose izamura Basketball. Ni akazi dukora ku bwacu kugira ngo tugere ku byiza. Aba bana bose ni abahanga kuturusha, bazagera kuri byinshi birenze.”

Masai Ujiri yashimangiye ko ibyo akora byose muri siporo ya Afurika abikomora kuri Perezida Paul Kagame udahwema kuyishyigikira mu byiciro byose.

Ati “Mbikomora kuri Paul Kagame, Perezida ni inshuti yanjye. Hari ikintu cyihariye kuri twe, hari aho siporo yirengagizwa mu bihugu byinshi bya Afurika, ariko hano hari umuntu uyibamo.”

“Ibyo bisobanuye byinshi kuri njye, abikora nta kindi agendereye ahubwo kubera urukundo rw’uyu mukino. Akunda siporo cyane, ni umugisha, wenda ni ko njye mbibona ariko ni umugisha kuko siporo ihuza abantu, izana amahoro, ikanatuma abantu bagira ubuzima bwiza.”

Umwe mu bana babarizwa muri Agahozo-Shalom, Tumusiime Aniella, wiga mu mwaka wa kane, yavuze ko iki kibuga kizamufasha kugera ku nzozi yakuranye zo kugera kure muri Basketball.

Ati “Iki kibuga kirantera imbaraga na bagenzi banjye, kidusunikire gushaka kugera ku nzozi zitangaje twakuranye. Nakuze nshaka kuzakina imikino itandukanye, uyu munsi mfite inzozi zo kuzahagararira Ikipe y’Igihugu.”

Giants of Africa ifite gahunda yo kugeza ibibuga 100 mu bihugu binyuranye bya Afurika, umunani muri byo bikaba ari ibyo mu Rwanda.

Uretse iki kibuga cy’i Rwamagana n’icya Club Rafiki cyavuguruwe, hari ikindi cyubatswe ku Kimisagara kiri kumwe n’icya Handball ndetse n’ibindi bizashyirwa i Rubavu, Rusizi n’i Huye.

Masai Ujiri w’imyaka 53 uvuka muri Nigeria, abinyujije mu mushinga we Giants of Africa (GOA), afasha abana bakiri bato bo ku Mugabane wa Afurika gukura bakunda umukino wa Basketball.

Uyu mushinga wa GOA watangiye mu 2003 ukorera muri Nigeria gusa kugera mu 2014 ubwo Masai yafunguraga imipaka atangira kubikora no mu bindi bihugu bitandukanye bya Afurika birimo n’u Rwanda.

Uyu muhango waranzwe n'imbyino gakondo

Umuyobozi wa Giants of Africa, Masai Ujiri, yavuze ko bazakomeza gukora ibishoboka kugira ngo umukino wa Basketball utere imbere muri Afurika

Minisitiri wa Siporo, Munyangaju Aurore Mimosa, yashimiye Umuryango Giants of Africa ku ruhare wagize ngo ikibuga cyubakwe, asaba abana kuzakibyaza umusaruro

Minisitiri Munyangaju na Masai Ujiri batashye ibibuga bya Baskteball byubatswe mu Ishuri Agahozo-Shalom riri i Rwamagana

Amafoto: Ntare Julius