00:00:00 IGIHE NETWORK KN KINYARWANDA EN ENGLISH FR FRANCAIS

Prof Lyambabaje yiyemeje kuzamura siporo muri Kaminuza y’u Rwanda ikaba mpuzamahanga

Yanditswe na Eric Tony Ukurikiyimfura
Kuya 13 Gashyantare 2021 saa 01:08
Yasuwe :
0 0

Umuyobozi mushya wa Kaminuza y’u Rwanda, Prof Lyambabaje Alexandre, yavuze ko mu byo bazibandaho harimo guteza imbere siporo y’umuntu ku giti cye n’iy’amarushanwa kugeza ku rwego mpuzamahanga.

Prof Lyambabaje yabivuze mu muhango w’ihererekanyabubasha wabaye ku wa Gatanu tariki ya 12 Gashyantare.

Yavuze ko mu byo bazitaho, na siporo itibagiranye kuko ari ingenzi mu gihe ahantu hahurira abantu benshi b’urubyiruko kandi bakoresha umutwe cyane, mu byo bakenera harimo kuruhuka.

Ati “Siporo ntabwo tuyifata nk’ikintu kiri ku ruhande kuko tuba twifuza y’uko iyo umunyeshuri yize cyane, yakoze, hari abavuga ngo iyo umutwe wakoze cyane ni ngombwa kuruhuka. Uburyo bwo kuruhuka rero buri ukwinshi.”

“Hari uruhuka, agashaka aho yicara n’abandi bagatebya, hari n’ukenera gukora siporo kugira ngo umubiri ukore neza, noneho abe yibagiwe gato ibyo mu makayi, aze kongera asubiremo yige. Hari uruhuka abyina, agahamiriza cyangwa ugakina Chess, ibyo ni ngombwa ko ahantu bateraniye urubyiruko rwinshi bishobora kuboneka kandi bigakorwa neza. Iyo ni siporo yo ku muntu ku giti cye.”

Yakomeje avuga ko bazazamura urwego rw’amarushanwa ya siporo muri Kaminuza y’u Rwanda kuko igira uruhare rukomeye mu kumenyekanisha ikigo, ikanafasha abayikora kwiteza imbere.

Ati “Hari noneho na siporo yo mu marushanwa usanga bigira uruhare runini cyane mu kumenyekanisha ikigo. Uretse gutuma wa wundi uyikora agira ibyiza ayikuramo, nk’umuntu wakinnye nabibabwira kuko ibyiza bibamo ni byinshi, iyo ukinnye neza ukaba umuhanga, hari aho ushobora kugera bikaba byakuzanira umutungo ugaragara.”

Umuyobozi wa Kaminuza y’u Rwanda yatanze urugero rw’uburyo ubwo yigaga mu Bufaransa, yinjizaga amafaranga menshi binyuze mu gukina, aruta ayo yahabwaga yo kumufasha kwiga neza.

Ati “Niga mu Bufaransa, amafaranga nahabwaga kubera gukina umupira yarutaga ayo nabonaga kubera ko ndi umunyeshuri.”

Prof Lyambabaje yavuze ko uretse kwinjiriza amafaranga umuntu uyikora, siporo ari ingenzi mu kumufasha kubana neza n’abandi, bityo bazafatanya n’inzego zitandukanye mu kuyiteza imbere muri Kaminuza y’u Rwanda ikagera ku rwego mpuzamahanga.

Ati “Ikindi, yigisha imibanire myiza n’abandi, ukamenya kwihangana, ukamenya ko rimwe na rimwe utsinda cyangwa ugatsindwa, ukamenya na none ko ugomba kubahiriza amategeko. Ntabwo ari ubumenyi si n’ikoranabuhanga, ni imyitwarire, siporo igira uruhare runini mu kubaka imyitwarire y’abantu.”

“Ni ngombwa ko muri iyi myaka tureba imbogamizi zihari, zaba ibibuga cyangwa ubushobozi, hanyuma ngira n’amahirwe ko nk’abayobozi benshi ba siporo mu gihugu bagiye banyandikira bambwira bati turiteguye kuza gukorana na Kaminuza, nkaba numva byagombye gushoboka ko Kaminuza yakongera igateza imbere siporo ya buri muntu ku giti cye, ariko noneho na siporo iganisha mu marushanwa ku rwego rw’Igihugu, ku rwego rw’akarere no ku rwego mpuzamahanga.”

Abakurikiranira hafi siporo mu Rwanda, benshi bahuriza ko urwego yariho muri Kaminuza y’u Rwanda mu myaka yashize, kuri ubu rwasubiye inyuma, bikagaragarira mu musaruro ubonwa n’amakipe ayihagararira mu marushanwa atandukanye arimo Shampiyona y’Icyiciro cya Kabiri mu mupira w’amaguru, Shampiyona ya Basketball, iya Volleyball n’indi mikino.

Kimwe mu bitungwa agatoki ni uko hakuweho ’bourse’ zahabwaga abafite impano mu mikino itandukanye, byahagaze hagati y’umwaka wa 2008 n’uwa 2009.

Prof Lyambabaje Alexandre yiyemeje kuzamura siporo muri Kaminuza y’u Rwanda ikagera ku rwego mpuzamahanga
Prof Lyambabaje Alexandre yabaye umukinnyi ukomeye muri Volleyball

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .