Federer w’imyaka 38, yazamutse imyanya ine kuri uru rutonde rwakozwe hagendewe ku mafaranga yinjijwe n’abakinnyi bagati ya tariki ya 1 Kamena 2019 na tariki ya 1 Kamena 2020.

Muri miliyoni 86.2£ yinjije muri uyu mwaka turi gusoza, harimo miliyoni 81£ yakuye mu bafatanyabikorwa bakorana cyangwa yamamariza.

Cristiano Ronaldo ni uwa kabiri (na miliyoni 85£), agakurikirwa na Lionel Messi (£84m) na Neymar (£77.5m) mu gihe umukinnyi wa Basketball ubanziriza abandi kuri uru rutonde ari LeBron James na miliyoni 71.5£.

Abandi batanu baza mu 10 ba mbere ku rutonde ni Stephen Curry (Basketball), Kevin Durrant (Basketball), Tiger Woods (Golf), Kirk Cousins (American Soccer) na Carson Wentz (American Soccer).

Umuyapanikazi ukina Tennis, Naomi Osaka, uheruka gutangazwa nk’umugore winjije menshi kurusha abandi bakinnyi ku Isi, ni uwa 29 kuri uru rutonde rwatangajwe ku wa Gatanu.

Mu cyumweru gishize, Osaka w’imyaka 22, umaze kwegukana amarushanwa abiri akomeye, yashyize iherezo ku myaka ine Serena Williams yari amaze ari we mugore winjiza amafaranga menshi.

Osaka yinjije miliyoni 30.7£, arusha miliyoni 1.15£ Serena Williams w’imyaka 38.

Umwanditsi mukuru wa The Forbes, Kurt Badenhausen, yatangaje ko “icyorezo cya Coronavirus cyakomye mu nkokora imishahara y’abakinnyi b’umupira w’amaguru; Lionel Messi na Ronaldo, bigaha amahirwe Roger Federer.”

Abakinnyi 100 bashyizwe kuri uru rutonde ni abo mu mikino 10, baturuka mu bihugu 21 bitandukanye mu gihe abagore babiri gusa aribo babarimo.

Bose hamwe binjije miliyari 3.6$ muri uyu mwaka ushize, ni ukuvuga ko icyo giteranyo kiri munsi ku rwego rwa 9% ugereranyije n’amafaranga abakinnyi 100 ba mbere binjije mu 2019.