Kubura amahirwe yo gukina Shampiyona y’Isi na Tour de l’Avenir ntibizahindura intego ya Habimana Jean Eric

Yanditswe na Eric Tony Ukurikiyimfura
Kuya 6 Nzeri 2020 saa 12:02
Yasuwe :
0 0

Umukinnyi usiganwa ku magare w’ikipe ya Skol Adrien Cycling Acadey (SACA) na Team Rwanda; Habimana Jean Eric, avuga ko inzozi afite ari ukuzagera ku rwego rwo gukina isiganwa rikomeye rya Tour de France.

Uyu mukinnyi w’imyaka 19, wari mu bitegura guserukira u Rwanda muri Shampiyona y’Isi y’Amagare ya 2020 izabera mu Mujyi wa Imola mu Butaliyani, ntazayitabira nyuma y’uko hemejwe ko iri rushanwa rizakinwa n’icyiciro cy’abakuru gusa mu bagabo n’abagore.

Shampiyona y’Isi y’Amagare y’uyu mwaka, yagombaga kubera mu Busuwisi, ariko bihinduka kubera amabwiriza iki gihugu cyafashe yo kubuza abantu bagera ku 1000 guhurira hamwe muri ibi bihe bya Coronavirus, kugeza tariki ya 1 Ukwakira.

Muri Kanama, Habimana Jean Eric na Uhiriwe Byiza Renus, bombi bari kubanza kumara iminsi bitoreza mu Kigo cy’Ishyirahamwe ryo gusiganwa ku magare ku Isi (UCI) mu Busuwisi mbere y’uko haba Shampiyona y’Isi y’Amagare.

Umutoza we muri SACA; Adrien Niyonshuti avuga ko isiganwa rya Tour de l’Avenir yari kwitabira, ryashoboraga kumuhesha kubona ikipe nziza imugeza ku nzozi ze zo gukina nk’uwabigize umwuga.

Ati “Yagombaga kujya mu Busuwisi akitoza, akajya muri umwe mu mikino itanga abakinnyi babigize umwuga, byari amahirwe menshi cyane ku ikipe ya SACA no ku rwego rw’igihugu ko twakongera tukabona abakinnyi babigize umwuga.”

“Ntibyakunze kubera ikibazo cya visa, yabonye ubutumire, abona buri kimwe cyose, turitegura, ariko ageze kuri ambasade batubwira ko batazi niba Tour de l’Avenir izaba cyangwa niba Jean Eric yabona visa y’amezi atatu cyangwa atandatu.”

“Iyo umazeyo amezi icyenda uri mu myaka nk’iye, yakagombye kuvayo yabonye ikipe nziza imufasha mu myaka ibiri iri imbere akaba umunyamwuga.”

Niyonshuti Adrien yakomeje avuga ko Habimana Jean Eric ari umukinnyi mwiza kandi ukiri muto ku buryo mu myaka ibiri iri imbere ashobora kubona amahirwe yo kubona ikipe nziza yakinira iri ku rwego rw’ababigize umwuga.

Ati “Ndatekereza ko mu mwaka utaha amahirwe aracyahari, Jean Eric aracyari umwana, aracyafite nk’imyaka ibiri mbere y’uko yinjira mu myaka 23 ku buryo ayo mahirwe azayabyaza umusaruro. Nk’umutoza ngomba kumufasha akagumana inzozi ze.”

Habimana Jean Eric afite inzozi zo gukina Tour de France

Uyu mukinnyi ukiri muto umaze kwitabira Tour du Rwanda inshuro imwe [mu 2020] ndetse akaba ariryo siganwa rimara igihe kirekire yitabiriye kuva atangiye gusiganwa, avuga ko afite inzozi zo gukina Tour de France.

Aganira na IGIHE, Habimana Jean Eric yagize ati “Ntabwo byampungabanya [kutajya mu Busuwisi] n’ubundi turi mu bihe bitoroshye.”

“Intego yanjye ni iyo gukina Tour de France kuko ni isiganwa rikomeye ku rwego rw’Isi, nta Munyarwanda uragira amahirwe yo kurikina, rero nkanjye mfite intego yo kuzarikina, nzabigeraho ari uko nitwaye mu masiganwa aribanziriza kandi nkaba nabona ikipe yo ku rwego rw’Isi imfasha kubona ayo mahirwe.”

Habimana avuka mu Murenge wa Karago mu Karere ka Nyabihu, hakomoka abarimo Mugisha Samuel na Nsengimana Jean Bosco ndetse bakaba bamwe mu bamukundishije umukino wo gusiganwa ku magare.

Mu 2016, yitabiriye isiganwa ry’amagare asanzwe ya ‘pneu ballon’ rya Tour de Gisagara, aba uwa gatatu ku rutonde rusange n’uwa mbere mu bakiri bato.

Kwitwara neza muri iri siganwa nibwo byatumye abengukwa n’ikipe ya Skol Fly Cycling, atangira gukinisha igare rigezweho rya siporo.

Ati “Byari bigoranye, iyo umuntu avuye kuri ‘pneu-ballon’ akajya ku igare rya siporo ntabwo aba azi gucomeka biriya birenge byacu. Ku isiganwa rya mbere nagiye gucomeka ibirenge, nshiduka abandi barenze. Rirangiye nakoze umwitozo wo gucomeka ibirenge.”

Habimana Jean Eric yigaragaje mu masiganwa atandukanye mu cyiciro cy’ingimbi, byatumye ahamagarwa n’umutoza wa Team Rwanda; Sterling Magnell, mu isiganwa ryo muri stade ryabereye muri Afurika y’Epfo, ahakura imidali ibiri ya Feza n’umwe w’Umuringa.

Kuva icyo gihe, uyu mukinnyi amaze kwitabira amasiganwa atandukanye arimo ayahuje ibihugu bikoresha ururimi rw’Igifaransa (Union Francophone de Cyclisme), Shampiyona Nyafurika ya 2019, ANOCA Zone V na Shampiyona y’Isi y’Amagare ya 2019.

Habimana Jean Eric w'imyaka 19 ni umwe mu bakinnyi ba SACA bakinnye Tour du Rwanda 2020
Habimana Jean Eric yegukanye isiganwa ryitiriwe Intwari z'igihugu muri Gashyantare uyu mwaka
Muri Kanama, Habimana Jean Eric yagombaga kwitabira imyitozo mu Busuwisi, akahakinira Tour de l'Avenir na Shampiyona y'Isi y'Amagare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .