00:00:00 IGIHE NETWORK KN KINYARWANDA EN ENGLISH FR FRANCAIS

Hashingirwa kuki hemezwa ikigo cyangwa urwego rutanga Maillot Jaune ya Tour du Rwanda?

Yanditswe na Eric Tony Ukurikiyimfura
Kuya 29 Mata 2021 saa 10:11
Yasuwe :
0 0

Muri uyu mwaka wa 2021, Visit Rwanda yahawe kuzatanga umwenda w’umuhondo ‘Maillot Jaune’ igenerwa umukinnyi uyoboye abandi ku rutonde rusange rw’irushanwa ry’amagare rya Tour du Rwanda kubera ko ari ikigo kimenyekanisha u Rwanda binyuze mu bukerarugendo.

Kugeza mu 2019, umwambaro w’umuhondo uhabwa umukinnyi uyoboye abandi muri Tour du Rwanda igiye kuba ku nshuro ya 13 kuva ibaye mpuzamahanga, watangwaga n’iyahoze ari Minisiteri y’Umuco na Siporo ‘MINISPOC’.

Gusa, mu mwaka ushize wa 2020, uyu mwambaro wavanywe muri iyo Minisiteri kuri ubu yahindutse iya Siporo gusa, uhabwa Rwanda Tea mu gihe mu irushanwa rya 2021 rizaba hagati ya tariki ya 2 n’iya 9 Gicurasi, uzatangwa na VISIT RWANDA.

Mu kiganiro yagiranye na IGIHE, Kamuzinzi Freddy uyobora Tour du Rwanda, yavuze ko kimwe mu by’ingenzi bishingirwaho hatoranywaho ikigo gihabwa ‘maillot jaune’ ari uko kigomba kuba kimenyekanisha u Rwanda.

Ati “Urebye, nk’uko wari uvuze Rwanda Tea, ukareba Visit Rwanda, hari ikintu gihuza ibyo bigo bibiri; hari ijambo ‘Rwanda’, icyo ni cyo cya mbere. Turashaka kumurika, kumenyekanisha igihugu cyacu.”

“Si izina gusa tureba, ahubwo ni ukureba tuti ‘Icyo kigo kimenyekanisha gute igihugu cyacu?’ Rwanda Tea imenyekanisha icyayi cy’u Rwanda, Visit Rwanda imenyekanisha ubukerarugendo butuma abantu baza gutembera mu Rwanda. Ibyo ni byo navuga dushingiraho cyane tureba uwo duha Maillot Jaune.”

Abajijwe impamvu habaho ihinduka ry’ibigo bitanga uyu mwambaro w’umuhondo, Kamuzinzi yavuze ko biterwa n’uko nta kigo kiriyemeza kuwutanga mu myaka myinshi.

Yasobanuye kandi ko byose bituruka ku bushobozi ibyo bigo biba byashyize muri Tour du Rwanda nubwo yirinze kuvuga ingano yabwo.

Ati “Ikindi kuvuga ngo uyu mwaka turahindura, ntabwo ari iby’ikigo kimwe, muri uyu mwanya ntabwo turabona ikigo kimwe cyifata ngo cyiyemeze gifate ‘maillot jaune’ imyaka myinshi, ariko cyikaba cyujuje ibyo narimvuze mbere, kimenyekanisha igihugu cyacu. Birashoboka ko umwaka utaha twaba tukiri kumwe na Visit Rwanda cyangwa tugafata ikindi kigo ”

Yakomeje agira iti “Byose ni inkunga ikigo gishyiramo ntabwo ari ubuntu, natwe ni ho dukura iyo ngengo y’imari dukoresha kugira ngo icyo gikorwa kibashe kugenda neza. Habaho ibiganiro ariko ibigenderwaho bya mbere ni ibyo navuze. Iyo atabyujuje ntabwo tuvugana na we, iyo atari ikigo kimenyekanisha Igihugu.”

Ku bijyanye no kuba hari ibigo by’abikorera cyangwa bitegamiye kuri Leta byakwemererwa gutanga uyu mwambaro, Umuyobozi wa Tour du Rwanda yavuze ko bishoboka kuko hari ibigamije kumenyekanisha u Rwanda.

Ati “Ibigo by’abikorera harimo nk’ibikora ibijyanye na Made in Rwanda, ntabwo twakwanga ko nabyo bifata maillot jaune, ariko uyu munsi birazwi ko ibikomeye ari Visit Rwanda, irigaragaza no hanze, indi ni Rwanda Tea yewe na Rwanda Coffee, mbere y’uko haza COVID-19 twabiganiragaho na NAEB [Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi] ku buryo uyu mwaka bari kuzana na Rwanda Coffee.”

Uretse umwambaro w’umuhondo uhabwa umukinnyi uyoboye isiganwa uzatangwa na Visit Rwanda, byari biteganyijwe ko uruganda rw’ibinyobwa rwa SKOL ari rwo ruzongera gutanga umwambaro w’umukinnyi wegukanye agace k’isiganwa, ariko rwikuye mu baterankunga muri iki cyumweru.

Umwenda uhabwa umukinnyi urusha abandi guterera imisozi uzakomeza gutangwa na Cogebanque, uw’urusha abandi Sprint uzatangwa na SP, uw’umukinnyi ukiri muto witwaye neza utangwe na Prime Insurance, Umunyafurika uri imbere y’abandi ahembwe na RwandAir, Umunyarwanda mwiza azongera guhembwa na Gorilla Games mu gihe umwenda w’Ikipe yahize izindi uzakomeza gutangwa na Inyange Industries.

Amakipe yemerewe kuzitabira Tour du Rwanda 2021

Amakipe ane y’ibihugu

  • Team Rwanda
  • Team Eritrea
  • Team Algeria
  • Team Ethiopia

Amakipe akina amarushanwa yo ku mugabane/UCI Continental Teams

  • Benediction Ignite/Rwanda
  • SACA/Rwanda
  • Pro-Touch/USA
  • Bike Aid/yo mu Budage
  • TSG TERENGGANU /Malaysie
  • Medellin/Colombia
  • Tarteletto-Isorex/U Bubiligi
  • Wildlife Generation Pro Cycling

Amakipe y’ababigize umwuga

  • Total Direct Energie/France
  • Team B&B Hotels/France
  • Androni Giocatolli Sidermec/Italie

Amakipe akina amarushanwa akomeye ku Isi/World Tour Teams

  • Israel Start-Up Nation/Israel

Uduce tugize Tour du Rwanda 2021

  • Agace ka mbere: Tariki ya 2 Gicurasi: Kigali Arena- Rwamagana (ibilometero 115,6)
  • Agace ka kabiri: Tariki ya 3 Gicurasi: Kigali- Huye (ibilometero 120.5)
  • Agace ka gatatu: Tariki ya 4 Gicurasi: Nyanza- Gicumbi (ibilometero 171,6)
  • Agace ka kane: Tariki ya 5 Gicurasi: Kimironko - Musanze (ibilometero 123,9)
  • Agace ka gatanu: Tariki ya 6 Gicurasi: Nyagatare- Kimironko (ibilometero 149,3)
  • Agace ka gatandatu: Tariki ya 7 Gicurasi: Kigali (KBC)- Kigali (Mont Kigali) (ibilometero 152.6)
  • Agace ka karindwi: Tariki ya 8 Gicurasi:Kigali (Nyamirambo)- Mont Kigali ( ITT- ibilometero 4.5)
  • Agace ka munani: Tariki ya 9 Gicurasi: Kigali (Canal Olympia)- Kigali (Canal Olympia) (ibilometero 75,3)
Umunyarwanda Mugisha Samuel yegukanye Tour du Rwanda ya 2018, ari nayo iheruka kuba iri ku rwego rwa 2,2.
Umunya-Eritrea Merhawi Kudus ni we wabaye umukinnyi wa nyuma wambaye maillot jaune yatanzwe na MINISPOC mu 2019
Mu 2020, Mailot Jaune ya Tour du Rwanda yatanzwe na Rwanda Tea
Visit Rwanda yahembaga umukinnyi wahatanye kurusha abandi, uyu mwaka ni yo izatanga 'maillot jaune' ya Tour du Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .