Uburyo bushya bwo kwerekana amashusho bwa Disney plus na Netflix bushobora gohombya televiziyo nyinshi

Yanditswe na Iradukunda Serge
Kuya 18 Ugushyingo 2019 saa 07:50
Yasuwe :
0 0

Mu cyumweru gishize ikigo cyAbanyamerika, The Walt Disney Company cyashyize hanze uburyo bwo kwerekana amashusho binyuze kuri internet buzwi nka Disney plus, buza bwiyongera ku bwari busanzwe buzwi nka Netflix, Video Prime na Apple TV ibintu abasesenguzi bavuga ko bishobora kuzagabanya umubare w’abakurikiranaga Televiziyo.

Ibi bigo sibyo byonyine kuko hari n’ibindi biteganya gutangira ubu buryo bushya bwo kwerekana amashusho harimo nka HBO Max na Peacock.

Uku kuvuka umusubirizo kw’ibigo byerekana amashusho binyuze kuri internet, gukomeje guhangayikisha abatari bake kuko bitera kugabanuka kw’imibare y’abakoresha televiziyo, kuko ubushakashatsi bwakozwe n’ikinyamakuru Bralin buvuga ko hagati y’umwaka wa 2014 na 2015 abakoreshaga televiziyo bagabanutseho 8% kandi ko bagenda barushaho kugabanuka uko imyaka iza.

Umuyobozi wa Netflix, Reed Hastings we yabwiye Business Insider ko ikoreshwa rya televiziyo rishobora kutazarenza mu 2030 .

Bimwe mu bishingirwaho n’abasesenguzi, bavuga ko ubu buryo bushya bwo kwerekana amashusho binyuze kuri internet bushobora kuzahombya amateleviziyo harimo kuba ibiciro biri hasi ugereranyije n’ifatabuguzi ry’amateleviziyo kuko nka Apple TV plus ifatabuguzi ry’ukwezi ari $4.99 naho irya HBO Max rikaba $15.

Ubushakashatsi bwakozwe n’ikigo cyAbanyamerika, SurveyMonkey hagamijwe kureba uko ikoreshwa rya televiziyo rihaze ugereranyije no kureba Video kuri internet, bwerekanye ko mu bantu 500 bakoreweho ubushakashatsi, 250 bavuze ko bagikoresha uburyo bwo kureba televiziyo ari abari hejuru y’imyaka 60, mu gihe abakoresha uburyo bwombi ari 22% naho 27% biganjemo urubyiruko (imyaka 18-29) bo bavuze ko bakoresha uburyo bwa internet gusa.

Igiteye impungege muri ubu bushakashatsi ndetse kikarushaho gushyira mu kaga ikoreshwa rya Televiziyo ni uko abagera kuri 58.5 % bavuze ko uburyo bwo kureba amashusho hifashishijwe internet ari bwo buhendutse, ndetse 60% by’abakoresha televiziyo bakavuga ko bateganya kubireka nabo bagatangira gukoresha uburyo bwo kureba amashusho hifashishijwe internet.

Ibiciro biri hasi, kuba umuntu yakwihitiramo icyo ashaka kureba aho yaba ari hose, kutavangirwa n’amashusho yamamaza ndetse n’ubushobozi bwo gusubiza inyuma cyangwa guhagarika gato amashusho, nibyo bikomeje gutera abatari bake kuyoboka ubu buryo bushya bwo kureba filimi n’ibiganiro bitandukanye.

Imibare yashyizwe hanze mu 2019 na Netflix yerekana ko yo yonyine ubu imaze kugira abayikurikira miliyoni 151 ku Isi hose.

Uburyo bwo kwerekana amashusho hifashishijwe Internet bushobora gusiga televiziyo nyinshi zihombye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza