Ibyo wamenya kuri Kaspersky uzwi mu mutekano w’ikoranabuhanga

Yanditswe na Gentil Rafiki
Kuya 24 Kamena 2020 saa 08:09
Yasuwe :
0 0

Tariki 4 Ukwakira 1965 nibwo Eugene Valentovich Kaspersy yabonye izuba i Novorossiysk mu cyahoze ari Leta Zunze Ubumwe z’Abasoviyeti (ni mu Burusiya bw’ubu).

Yavutse kuri se wari umwenjeniyeri na nyina wakoraga mu kubungabunga no kubika amateka. Kaspersky yakunze isomo ry’imibare akiri muto arabikurana ndetse yari n’umuhanga mu mibare dore ko igihe cyose yabaga afite umwanya yakundaga no kuba asoma ibitabo bitandukanye by’imibare kuko yabikundaga icyarimwe anakarishya ubumenyi bwe mu mibare.

Yatangiye kugaragaza impano idasanzwe mu mibare nk’aho yatangiye kwitabira amarushanwa atandukanye ku myaka mike ataruzuza na cumi n’itanu y’amavuko ndetse akagenda anahabwa ibihembo bitandukanye kuko yayitwaragamo neza.

Ku myaka cumi n’ine y’amabuko yatangiye gukurikirana amasomo y’imibare yatangwaga na Kaminuza ya Moscow. Icyo gihe kandi yari no mu rubyiruko rw’ishyaka ry’aba “communist” mu cyahoze ari Leta Zunze Ubumwe z’Abasoviyeti.

Ku myaka 16 y’amavuko, Kasperky yerekeje mu ishuri ry’imyuga rya gisirikare aho yamaze imyaka itanu akarishya ubumenyi mu mibare n’ikoranabuhanga banamutegura ko yazakorera igisirikare mu bijyanye n’ubutasi, nta gihindutse asoje amasomo ye muri 1987 yinjiye mu butasi akora ari inzobere mu bya mudasobwa n’ikoranabuhanga.

Ivuka n’ikura rya Kaspersky Lab

Mu 1989, nibwo Kaspersky yatangiye gukunda ikoranabuhanga ku buryo bukomeye aho byaturutse ku kuba imashini ye yatewe na virusi ubwo atangira kwibaza ku mikorere ya za virusi zifata ibikoresho by’ikoranabuhanga nyuma yaje kwikorera ubwe porogaramu (antivirus) yabasha kurwana no gutsinda iyo virusi yari yateye imashini ye.

Nyuma mu 1991 yaje gusezererwa mu gisirikare ajya gushaka akazi mu kigo cyigenga cy’ikoranabuhanga anabona umwanya uhagije wo gukora kuri izo porogaramu ze zo kurwanya za virusi zifata ibikoresho by’ikoranabuhanga.

Ubwo nibwo we na bagenzi be bakoze porogaramu bayita AVP (ari nayo yaje guhinduka Kaspersky) nayo yakoraga akazi ko kurinda imashini za virus ndetse iyi AVP yaje no kugenda imenyekana cyane nk’aho muri 2004 yatsinze irushanwa rikomeye ryari ryabereye i Hamburg mu gihugu cy’u Budage ihigitse izindi antivirusi byari bihanganye icyo gihe.

Eugene Kasperky mu 1997 yaje gushinga ikigo Kaspersky lab ndetse gihita gitangira kuyoborwa n’umugore we Natalia Kaspersky. Nyuma mu 2000 antivirusi ya AVP yahinduriwe izina yitwa “Kaspersky antivirus” izina ritangira ubwo kugeza magingo aya nk’ikimenyabose.

Kuva Kaspersky lab yashingwa ndetse igatangira gutanga serivisi zitandukanye z’umutekano w’ikoranabuhanga yageze kuri byinshi iba ikigo gikomeye mu mutekano w’ikoranabuhanga ndetse inakomeza kuvugurura antivirusi ya Kaspersky ku buryo ikomeza guhangana na virusi zangiza ndetse zikaniba amakuru mu ibikoresho by’ikoranabuhaga zivuka umunsi ku munsi.

Tubibutse ko uyu Eugene Kaspersky umwaka ushize yari i Kigali aho yari yitabiriye inama ya Transform Africa aho yanavuye agiranye ibiganiro byihariye na Perezida wa Repubulika y’u Rwanda, Paul Kagame ndetse akanafungura ishami rya Kaspersky Lab i Kigali mu Rwanda.

Kaspersky ubwo yari i Kigali mu nama ya Transform Africa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .