Meteo Rwanda yasobanuye iby’imvura idasanzwe imaze iminsi igwa

Yanditswe na IGIHE
Kuya 7 Mutarama 2018 saa 11:16
Yasuwe :
0 1

Guhera mu mpera z’Ukuboza 2017 mu bice bitandukanye by’igihugu haguye imvura, bitera bamwe urujijo kuko bitari bimenyerewe.

Icyakora, icyatangaje kinatungura benshi ni imvura yatangiye kugwa kuwa 31 Ukuboza 2017 ikageza mu gitondo cyo kuwa 1 Mutarama 2018, ikagwa mu bice byinshi by’igihugu ndetse ikanakomeza kugwa no mu yindi minsi yakurikiyeho.

Mu itangazo Ikigo cy’Igihugu gishinzwe Iteganyagihe (Meteo Rwanda) cyasohoye, cyatangaje ko iyo mvura idasanzwe yatewe n’ubwiyongere bw’ubushyuhe mu Nyanja y’u Buhinde.

Rigira giti “Ibi bihe by’imvura biraterwa no kwiyongera k’ubushyuhe mu Nyanja y’u Buhinde. Byatumye havuka inkubi y’umuyaga bituma kandi mu Karere u Rwanda ruherereyemo higanza isangano ry’imiyaga binongera ubuhehere bw’umwuka ari nabyo bitera kugusha imvura itari imenyerewe muri Mutarama.”

Meteo ikomeza ivuga ko ubwo bushyuhe bwo mu nyanja buzaba bwagabanyutse guhera tariki 7 Mutarama 2017, ibihe bigasubira uko byari bisanzwe.

Iki kigo cyongeyeho ko igihembwe cy’ihinga A kiri ku musozo, bivuze ko imvura y’Umuhindo iri kugenda iba nkeya, gisaba Abanyarwanda bireba gufata ingamba zikwiriye.

Ubusanzwe ukwezi kwa Mutarama kubonekamo imvura nkeya kuko kuba gusatira Gashyantare ibonekamo izuba ryinshi.

Imvura idasanzwe imaze iminsi igwa mu ntangiriro za Mutarama 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza