Ibi biti byatewe mu Ishuri ry’Imyuga n’Ubumenyingiro rya Nyamata (Nyamata TSS) no mu nkengero zaryo.

Uretse ibyo, hari n’ibindi biti 1500 iyi banki yatangaje ko itegenya gutera mu bindi bice by’igihugu biherereyemo amashami yayo, nyuma ikazakurikizaho gahunda yo kubikurikirana ngo byose bikure neza.

Bamwe mu bitabiriye iki gikorwa harimo abakozi ba Access Bank Rwanda, abanyeshuri ba Nyamata TSS, abahagarariye Umurenge wa Nyamata n’itsinda ry’abanyeshuri ribungabunga ibidukikije ryaturutse muri Lycée de Kigali.

Iki gikorwa kije kandi cyubakira kuri gahunda ngari ya leta yo gutera miliyoni ibiti 100 mbere ya 2027, ikanatera ibindi by’imbuto ziribwa birenga miliyoni 6,4 mu turere 11 ku ikubitiro.

Umuyobozi Mukuru wa Access Bank Rwanda, Faustin R. Byishimo yavuze ko impamvu y’icyo gikorwa ari ukwifatanya muri iyi gahunda igamije kwimakaza ubuzima bwiza, ashimangira ko igiti ari ubuzima.

Ati “Iyo ibidukikije bibungabunzwe n’abantu bagira ubuzima bwiza. Ibi ni ibikorwa tuzakomeza no mu yindi mishinga ibungabunga ibidukikije.”

Ku bijyanye n’icyifuzo cy’abo mu itsinda ryo muri Nyamata TSS rishinzwe kubungabunga ibidukikije ryasabye Access Bank ibikoresho birimo n’imiti yo kwifashisha mu kubungabunga ibiti byatewe, Byishimo yaryijeje ko bazafasha mu kubibona.

Mu Karere ka Bugesera by’umwihariko mu Murenge wa Nyamata biyemeje ko uyu mwaka uzarangira bateye ibiti birenga ibihumbi 60, nk’uko Umuyobozi Ushinzwe Ubuhinzi mu Murenge wa Nyamata, Hakizimana François Xavier, yabyemeje.

Ati “Ubu tumaze gutera ibiti birenga ibihumbi 50, n’ibindi bisigaye uyu mwaka uzarangira tubiteye. Twashyizeho ingamba zitandukanye zo gukurikirana imikurire yabyo.”

Guverinoma y’u Rwanda yiyemeje ko mu 2030 izaba imaze kugabanya imyuka ihumanya ikirere ingana 38% mu 2030, ibintu izafashwamo na gahunda yo gutera ibiti kuko bigabanya imyuka yanduye yoherezwa mu kirere.

Umuyobozi Mukuru wa Access Bank Rwanda, Faustin R. Byishimo n'abakozi b'iyo banki bateye ibiti 1500 mu Karere ka Bugesera

Nyuma yo gutera ibiti mu Ishuri ry'Imyuga n'Ubumenyingiro rya Nyamata, abakozi ba Access Bank baganiriye ku buryo bwo gukurikirana ibyo biti ngo bikure neza

Mu gikorwa cyo gutera ibiti mu Karere ka Bugesera, abakozi ba Access Bank bifatanyije n'abanyeshuri bo mu Ishuri ry'Imyuga n'Ubumenyi ngiro rya Nyamata

Abakozi ba Access Bank bifatanyije n'abanyeshuri bo muri Lycée de Kigali gutera ibiti mu Bugesera