{Ikipe ya Vital’o yo mu Burundi yatsinze ku mukino wa nyuma APR FC yo mu Rwanda ibitego 2 ku busa. Hamis Tambwe na Deo Ndayishimiye nibo bahaye intsinzi iyi kipe yabo maze itwara igikombe cya mbere mu myaka 39 iri rushanwa rimaze.}

Hamissi Tambwe niwe watowe nk’umukinnyi mwiza w’irushanwa ndetse aba umukinnyi watsinze ibitego byinshi, kuko iri rushanwa rirangiye atsinze ibitego bitandatu. Akaba yahawe igihembo na guverineri Mohammed Kibir.
APR FC yakinnye uyu mukino idafite Mugiraneza Jean Baptitse (Migy) na Nsabimana Eric.

Ni ku nshuro ya kane ikipe ya APR FC itsindirwa ku mukino wa nyuma ikinira hanze y’u Rwanda. Mu 1996 yatsindiwe i Dar Es Salaam ibitego 2-1 na Simba, i Nairobi mu 2000 itsindwa na Tusker ibitego 3-0 ndetse no mu 2005 Villa SC iyitsindira i Mwanza ku bitego 3-0.

Umukino wari wabanje wo gushaka umwanya wa gatatu, El Mereikh Al Fasher yatsinze Rayon Sport igitego 1-0, cyatsinzwe na Suliman Mubarak.
Rayon Sport yagiye muri CECAFA idafite abakinnyi bayifashije gutwara shampiyona kapiteni wayo Hategekimana Aphrodis (Kanombe) na Johnson Bagoole wagiye muri Sofapaka yo muri Kenya.

Vital’o yahembwe ibihumbi 30$, APR FC ihabwa ibihumbi 20$ naho ibihumbi 10$ bisigara muri Sudan y’Amajyepfo mu ikipe ya El Mreikh Al Fasher.